Parofisai 4. Sega na Veilomani Vakaveiwekani

“Ena . . . sega na veilomani ena vuvale.”—2 TIMOCI 3:1-3, God’s Word Bible

● O Chris e cakacaka vata tiko kei na dua na ilala ena Noca kei Welesi, qori ena nodra vukei o ira e vakayacori vei ira na ivalavala kaukaua e vale. E kaya o Chris: “Au se nanuma tiko e dua na marama keirau sa sota oti e liu, ia au sa sega ni kilai koya tale ni a mokulaki sara tu vakaca. Na levu ni veika rarawa e caka vei ira eso tale na yalewa e vakadredretaka meda bau veiraimata.”

KA E YACO DINA. Ena dua na vanua mai Aferika, e rauta ni dua mai na tolu na yalewa e vakasagai ni se gone. A vakayacori e dua na vakatataro ena vanua vata ga oya qai laurai kina ni sivia e dua na ikatolu na tagane era nanuma ni donu na nodra mokulaki watidra. Ia e sega ni vakayacori ga vei ira na yalewa na ivalavala kaukaua e vale. Me kena ivakaraitaki mai Kenada, voleka ni 3 mai na 10 na tagane e mokulaki se vakalolomataki ira na kedra isa.

KA ERA TUKUNA E LEVU. Sa dede na kena vakayacori voli mai na ivalavala kaukaua e vale. A sega ni kauaitaki vakalevu ga ena veigauna sa oti me vaka sa yaco tu nikua.

E DINA OYA? Sa kauaitaki vakalevu sara ena vica na yabaki sa sivi na ivalavala kaukaua e vale. Ia na kena kauaitaki vakalevu na leqa qori e vakalailaitaka beka na iwiliwili ni ivalavala kaukaua e vale? Sega. Sa qai yali tiko ga na veilomani vakaveiwekani ena levu na vanua.

CAVA MADA O NANUMA? Sa vakayacori tiko na ka e tukuni ena 2 Timoci 3:1-3? Sa yali beka ena vuvale na loloma eda sucukaya mai?

Na ikalima ni parofisai e sa vakayacori tiko nikua e baleta na noda itikotiko, na vuravura. Raica mada na ka e tukuna na iVolatabu me baleta na parofisai qori.

[Tikina bibi ena tabana e 7]

“E tukuni ni dua vei ira na cala e sega ni ripotetaki tu ena dua na gauna balavu, na ivalavala kaukaua e vale. Ena kena ivakatautauvata, sa vakayacora oti vaka35 na ivalavala kaukaua vua e dua na yalewa o kena isa, sa qai qiriti na ovisa.”—GUSUNIVOSA NI DOMESTIC ABUSE HELPLINE MAI WELESI.