Toro Voleka Vua na Kalou

E Kila “ni da sa Kuvu-ni-soso”

“AU SEGA ni vakabauta ni na vosoti au vakadua o Jiova, au qai vakasamataka niu na bikai tu ena icolacola bibi qo ena noqu bula taucoko.” A vola qori e dua na yalewa lotu vaKarisito me baleta na nona cala ena veigauna sa sivi. Koya gona, na ca ni lewaeloma e vaka e dua na icolacola bibi. Na iVolatabu ena vakacegui ira era veivutunitaka dina na nodra cala. Raica mada na nona vosa na daunisame o Tevita ena Same 103:8-14.

E kila o Tevita ni “yalololoma ko Jiova” qai sega ni ‘veivunauci se vaqara cala tiko ga.’ (Tikina e 8-10) Ena vinakata sara ga o Jiova me vakaraitaka na nona yalololoma ke raica e dua na vuna vinaka me cakava vaka kina. O Tevita na dauniserekali e madila na vosa e vakayagataka e tolu na vakatautauvata me baleta na levu ni nona yalololoma vei keda na Kalou.

“Me vaka na kena cecere ki vuravura ko lomalagi, sa vakakina na kena levu ni nona yalololoma vei ira era sa rerevaki koya.” (Tikina e 11) Nida dagava na lomalagi ena bogi, eda sega ni katuma rawa na kedrau veiyawaki na kalokalo kei na vuravura. E vakaraitaka vei keda o Tevita na levu ni nona yalololoma o Jiova, e ivakaraitaki ni nona loloma dei. Na yalololoma qori era vakila o “ira era sa rerevaki koya” na Kalou—o ira era “yalomalumalumu, era doka dina na nona veiliutaki,” e tukuna e dua na vuku.

“Me vaka na kena yawa na vanua e cadra kina na siga ki na vanua sa dromu kina na siga, sa vakayawataka vakakina vei keda ko koya na nodai valavala ca.” (Tikina e 12) Eso tale na vakadewa e tukuna “me vaka na kena yawa na tokalau mai na ra.” E vakacava na veiyawaki ni vanua e rua qori? Erau vanua veiyawaki duadua meda bau vakasamataka. E tukuna e dua na ivoladusidusi ni iVolatabu: “E vaka ni o vukaca tiko na vanua yawa duadua o bau vakasamataka, ke o vuka tiko ga vaka ina tokalau, o sa na yawa tiko ga mai na ra.” E vakaraitaka vei keda o Tevita ni gauna e veivosoti kina o Jiova, e dau kauta laivi vakayawa sara ga vei keda na noda ivalavala ca.

“Me vaka sa lomana na luvena e dua na tamata [tama], sa lomani ira vakakina ko Jiova era sa rerevaki koya.” (Tikina e 13) Ni dua na tama o Tevita, e kila tale ga na ka e vakila e dua na tama dauloloma. Na tama qori ena daulomani ira na luvena, vakabibi ena gauna era rarawa kina. E vakadeitaka vei keda o Tevita ni Tamada vakalomalagi ena yalololoma vei ira na luvena e vuravura, vakauasivi nira veivutuni ena yalo “sa ramusu, ka bibivoro” ena vuku ni nodra valavala ca.—Same 51:17.

Ni tukuna oti na tolu na vakatautauvata, a vakatakila o Tevita na vuna e dau lomani keda kina na tamata ivalavala ca o Jiova: “Ni sa kila ko koya na nodai bulibuli; sa nanuma ga ni da sa kuvu-ni-soso.” (Tikina e 14) E kila o Jiova nida buli mai na kuvunisoso, e tu na noda malumalumu qai vakaiyalayala na ka eda rawa ni cakava. Ni kila tu o koya na keda ituvaki ivalavala ca, e “tu vakarau me veivosoti” o Jiova ke da veivutuni dina.—Same 86:5, NW.

E uqeti iko beka na vosa oya i Tevita me baleta na yalololoma i Jiova? A vulica na marama e tukuni ena itekivu ni ulutaga qo, na ka e tukuna na iVolatabu me baleta na nona tu vakarau na Kalou me veivosoti, qai uqeti koya me tukuna: “Au sa vakila niu rawa ni toro voleka vei Jiova, e vaka e tauluva tale ga vei au e dua na icolacola bibi.” * Vakacava mo vulica e levu tale na ka me baleta na yalololoma ni Kalou kei na ka mo cakava mo rawa ni vakila kina na yalololoma qori. De dua o na vakila tale ga ni tauluva vei iko e dua na icolacola bibi.

Wili iVolatabu e Vakatututaki ena Okosita:

◼ Same 87-118

[iVakamacala e ra]

[Tikina bibi ena tabana e 13]

“Au sa vakila niu rawa ni toro voleka vei Jiova, e vaka e tauluva tale ga vei au e dua na icolacola bibi.”