Me Sauma na iVolatabu

E iVola ni Parofisai na iVolatabu?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. E dau tukuni vakamatailalai ena iVolatabu na parofisai?

E rawa ga ni tukuna vakamatailalai na veika e se bera ni yaco na Kalou Cecere Duadua. (Emosi 3:7) Me kena ivakaraitaki, a se parofisaitaki makawa ni na basika e dua ena vakatokai me Mesaia se Karisito. Na Mesaia ena kawa i Eparama na turaga yalodina. O koya tale ga na Tui ena vakalesuya mai na bula uasivi vei ira era talairawarawa ra qai sega tale ni tauvimate. (Vakatekivu 22:18; Aisea 53:4, 5) Ena basika mai Peceliema na kawa yalataki qo.​—Wilika Maika 5:2.

A vakadinadinataki ni o Jisu na Mesaia. A se parofisaitaka tu na iVolatabu ni vo e 700 vakacaca na yabaki ni na vakasucuma na Mesaia e dua na yalewa se sega ni taratagane, ena cati tale ga. Ena solia na nona bula ena vuku ni nodra ivalavala ca e levu, qai bulu vata kei ira na vutuniyau. (Aisea 7:14; 53:3, 9, 12) E tukuna tale ga na iVolatabu ni vo e 500 vakacaca na yabaki ni na vodoka e dua na asa i Jerusalemi, ena volitaki tale ga ena 30 na tikinisiliva. A yaco dina na ka kece qori.​—Wilika Sakaraia 9:9; 11:12.

2. E parofisaitaka na Kalou na tikinisiga?

Ni vo e 500 vakacaca na yabaki, a parofisaitaka na iVolatabu na yabaki ena basika kina na Mesaia. Na balavu ni gauna ena basika mai kina e cakacakataki me wiki ni veiyabaki, e kena ibalebale ni dua na “wiki” e vitu na yabaki. Ni soqoni na 7 kei na 62 na wiki, na kena isoqoni e 69 na wiki ni veiyabaki. E tautauvata qori kei na 483 na yabaki. Eda na tekivu wiliwili mai na yabaki cava? E tukuni ena iVolatabu ni na tekivu na wiliwili mai na yabaki a yaco kina i Jerusalemi na dauveiqaravi ni Kalou o Niemaia me taravaka tale na siti. E vakadeitaki ena itukutuku makawa kei Perisia ni qori na yabaki 455 B.S.K. (Niemaia 2:1-5) Ni oti tale e 483 na yabaki, a qai papitaiso o Jisu me Mesaia ena yabaki 29 S.K. me vaka ga a parofisaitaki.​—Wilika Taniela 9:25.

3. E sa vakayacori tiko nikua na parofisai ena iVolatabu?

A parofisaitaka o Jisu ni na yaco na veika lelevu ena noda gauna. E parofisaitaka na itukutuku vinaka ni Matanitu ni Kalou ena vakacegui ira era lomana na Kalou e veiyasa i vuravura. Na Matanitu qori ena vakaotia na ka ca kece e yaco tu nikua.​—Wilika Maciu 24:14, 21, 22.

E tukuna vakamatailalai na parofisai ena iVolatabu na veika ena yaco ena gauna eda donuya tu qo. Na iVolatabu e tukuna nira na vakacacana na vuravura na kawatamata se mani vakacava na veivakatorocaketaki eda cakava. Ena rewailagi na leqa e vu mai na ivalu, dausiga, uneune, kei na matedewa. (Luke 21:11; Vakatakila 11:18) Era na sega ni muria na tamata na ivakatagedegede savasava. Ena gauna dredre tale ga qo, era na vunautaka na imuri i Jisu na itukutuku vinaka ni Matanitu ni Kalou ena veimatanitu.​—Wilika Maciu 24:3, 7, 8; 2 Timoci 3:1-5.

4. Ena vakacava na noda bula ena veigauna se bera mai?

Sa vakarautaka tu na Kalou Cecere Duadua na veika vinaka vei ira na yalodina. Ena liutaki vuravura mai lomalagi na Mesaia o Jisu Karisito kei ira na digitaki. Era na veiliutaki ena Matanitu ena lewa me duanaudolu na yabaki. Era na vakaturi na mate qai rawa tale ga nira bula tawamudu. Kena ikuri, ena vakabulai ira kece na tamata era na bula ena gauna oya. Sa na sega tale na tauvimate kei na mate.​—Wilika Vakatakila 5:10; 20:6, 12; 21:4, 5.

Me ikuri ni ivakamacala, raica na tabana e 23-25 kei na 197-201 ni ivola Na Cava Sara Mada e Kaya na iVolatabu? e taba toka qo.