E Veisautaka na Bula na iVolatabu

NA CAVA a raica e dua na turaga mai Sikoteladi ni vinaka cake ena nona rawaka vakabisinisi? Na cava a uqeta e dua na turaga mai Brazil me muduka na nona ivakarau ni bula dukadukali kei na nona vakayagataka na wainimategaga na cocaine? A rawa vakacava ni muduka na nona gunu sivia e dua na turaga ni Slovenia? Wilika mada na ka eratou tukuna.

“E Nanumi ga ni Vinaka tu na Noqu Bula.”​—JOHN RICKETTS

SUCU: 1958

VANUA: SIKOTELADI

KA E KILAI KINA: RAWAKA VAKABISINISI

NOQU BULA E LIU: Au susu ena vuvale e rawaka vinaka vakayago. Ni vakaitutu ena mataivalu ni Peritania o tamaqu, keitou toki kina vakalevu. Keitou vakaitikotiko mai Sikoteladi, Igiladi, Jamani, Kenya, Malesia, Ailadi, kei Saipurusi. Au lai vuli ena koronivuli curuibure e Sikoteladi niu se qai yabaki walu. Ni toso na gauna, au lai vakoroi sara ena univesiti e Cambridge.

Niu yabaki 20, au tekivu cakacaka ena bisinisi ni waiwai me walu na yabaki. Au cakacaka e liu e Sauca Merika, dewa i Aferika, oti au gole sara ena Ra kei Ositerelia. Au lai tauyavutaka e Ositerelia e dua na kabani ni voli sea, oti au volitaka tale.

Dua na ilavo vinaka au rawata, au mani cegu mai na cakacaka niu yabaki 40. Sa qai noqu cakacaka tu na saravanua. E vakarua na noqu vodo motopai wavoki e Ositerelia, au wavokiti vuravura tale ga vakadua. E nanumi ga ni vinaka tu na noqu bula.

VEISAUTAKI AU NA IVOLATABU: Ni bera niu cegu mai na cakacaka, au dau via vakavinavinakataka vua na Kalou na noqu marautaka tiko na bula. Au gole ina lotu Jaji, au se lewena sara na lotu qori niu se itabagone. Ia e sega ni yavutaki vakalevu ena iVolatabu na kena ivakavuvuli. Oti au lai lotu vei ira na Momani, ia au sega ni taleitaka nira sega ni nuitaka na iVolatabu.

Era sikovi au mai ena dua na siga na iVakadinadina i Jiova. Au raica nira yavutaka na nodra ivakavuvuli ena iVolatabu. Era wilika sara vei au na 1 Timoci 2:3, 4, e tukuni kina ni inaki ni Kalou “me bula na veimataqali tamata kece, mera kila tale ga na ka dina.” Au qoroya nira sega wale ga ni vakabibitaka na iVakadinadina na kilaka, ia era vakabibitaka na ka dina ena iVolatabu.

Au kila na ka dina qori niu vulica na iVolatabu kei ira na iVakadinadina i Jiova. Kena ivakaraitaki, au vulica ni rau sega ni tiki ni letoluvakalou na Kalou kei Jisu; erau sega tale ga  ni duabau. (Joni 14:28; 1 Korinica 11:3) Au marau sara ga niu kila na ka dina qori. Au rarawataka ga niu vakalusi gauna ena noqu saga meu kila e dua na ivakavuvuli lasu, e sega tale ga ni matata na kena ibalebale!

Sega ni dede au sa gole ina nodra soqoni na iVakadinadina i Jiova. Au qoroya na nodra veikauaitaki kei na ivakatagedegede cecere ni itovo era muria, au nanuma ni sa bau totoka sara ga na nodra itovo ra qai rerevaka na Kalou. Au vakadeitaka ena loloma dina era vakaraitaka niu sa kunea na lotu dina.​—Joni 13:35.

KENA YAGA: Niu papitaiso oti, au sotavi Diane e dua na yalewa totoka. A susugi ena vuvale iVakadinadina i Jiova, au taleitaki koya ena nona itovo vinaka. Ni toso na gauna, keirau vakamau sara. Na noqu veitokani kei Diane kei na nona dau veitokoni, e dua na sala e vakalougatataki au kina o Jiova.

Keirau vinakata vakalevu me keirau lai veiqaravi ena vanua e gadrevi vakalevu kina na veivuke ena kena vunautaki na itukutuku vinaka ena iVolatabu. Ena 2010, keirau toki i Belize, e Merika e Loma. O ira na lewenivanua keirau vunau kina era lomana na Kalou ra qai via vulica e levu tale na ka me baleti koya.

Au lomavakacegu sara ga niu sa kila na ka dina me baleta na Kalou kei na nona Vosa na iVolatabu. Sa noqu cakacaka vakatabakidua na vunau, au qai marau niu vakavulici ira e levu ena iVolatabu. Sega ni dua na ka e uasivia na noda raica ni veisautaka na nona bula e dua na ka dina, me vaka ga au vakadinadinataka. Au sa qai kunea na sala vinaka duadua meu vakavinavinakataka kina vua na Kalou na noqu marautaka tiko na bula.

“Era Kauaitaki au Dina.”​—MAURÍCIO ARAÚJO

SUCU: 1967

VANUA: BRAZIL

KA E KILAI KINA: IVAKARAU NI BULA DUKADUKALI

NOQU BULA E LIU: Au susu mai Avaré, e dua na taoni lailai ena yasayasa o São Paulo. Levu ga vei ira na tiko e keri era cakacaka.

A mate o tamaqu niu se kunekunetaki tiko. Niu se gonetagane lailai, au dau dara na isulu i tinaqu ena gauna e dau gole tu kina. Au vukivuki vakayalewa ra qai raici au eso tale meu vakasalewalewa. Ni toso na gauna, au veiyacovi kei ira na tagane e duidui na nodra yabaki.

Niu voleka ni yabaki 20, au dau vaqarai ira na tagane kei na yalewa ena valenigunu, valenidanisi, kei na valenilotu, me keimami veiyacovi. Ena gauna ni soqo ni marau, au dau vakaisulu me vaka na yalewa meu danisi ena tayabe e vakatokai na samba​-school parade. Au bau kilai levu sara ga.

Era noqu itokani tale ga o ira na vakasalewalewa, yalewa ca, kei ira era bobula tu ena wainimategaga. Eso vei ira era vakamuai au meu vakayagataka na cocaine, sega ni dede au sa bobula kina. Ena so na gauna keimami vakayagataka na wainimategaga ena bogi taucoko. Ena so tale na gauna, au dau vakayagataka duadua ga ena siga taucoko. E  lutu vakaca kina na yagoqu, era mani nanuma e levu niu tauvi AIDS.

VEISAUTAKI AU NA IVOLATABU: Ena gauna qori au sotavi ira kina na iVakadinadina i Jiova. Era kauaitaki au dina. E dua na tikinivolatabu era wilika vei au na Roma 10:13, e tukuna: “Nira na bula o ira kece era masuta na yaca i Jiova.” Qori e uqeti au sara ga meu raica ni bibi me vakayagataki na yaca i Jiova. Ena levu na gauna, niu vakayagataka oti ena bogi taucoko na cocaine, au na dolava na katubaleka qai dagava na lomalagi. Au dau tagi niu kerei Jiova ena masu me vukei au.

E tarai au na nona rarawataka vakalevu o tinaqu niu vakasabusabutaka na noqu bula ena wainimategaga, au nanuma kina meu sa kua ni vakayagataka. Au mani vakadonuya meu vulica na iVolatabu kei ira na iVakadinadina i Jiova. Era vakadeitaka ni na vakaukauataki au qori meu biuta na wainimategaga—a qai yaco dina na ka era kaya!

Ni toso tiko noqu vuli iVolatabu, au liaca ni dodonu meu veisautaka na noqu ivakarau ni bula. Sa bau dredre dina meu biuta na vakasalewalewa ni sa noqu ivakarau ni bula ena dua na gauna balavu. Ia a yaga sara na noqu biuta na veika e vakaleqai au tiko, me vaka na noqu yawaki ira na noqu ilala makawa, au sa sega tale ga ni lako ina valenigunu kei na valenidanisi.

A sega ni rawarawa na noqu veisau, ia e veivakacegui niu kila ni kauaitaki au o Jiova, e kila tale ga na veika dredre au sotava tiko. (1 Joni 3:19, 20) Au muduka na noqu vakasalewalewa ena 2002, au papitaiso tale ga ena yabaki qori meu iVakadinadina i Jiova.

KENA YAGA: A vulica tale ga na iVolatabu o tinaqu ni marautaka vakalevu na veisau au cakava. E ka ni rarawa ni a tekivu tale ga ena gauna qori na nona strouk. Ia e sega ni seavu na nona lomani Jiova kei na ka dina ena iVolatabu.

E noqu cakacaka tu vakatabakidua me walu na yabaki na vunau, au vakayagataka vakalevu na noqu gauna meu veivakavulici ena iVolatabu. E se vinakati ga ena so na gauna meu valuta na gagadre ca. Ia e veivakayaloqaqataki niu kila niu na vakamarautaki Jiova keu vakatulewataka meu kua ni rawai ena gagadre ca qori.

Na noqu toro voleka vei Jiova kei na noqu cakava na ka e vakamarautaki koya, e vukei au meu kua ni beci au. Au sa marau ena gauna qo.

‘Au Vakabeleti ena Gunu.’​—LUKA ŠUC

SUCU: 1975

VANUA: SLOVENIA

KA E KILAI KINA: DAU GUNU SIVIA

NOQU BULA E LIU: Au sucu e Ljubljana na koroturaga kei Slovenia. A totoka tu na bula me yacova na nona vakamatei koya ga o tamaqu niu yabaki va. Ni yaco na ka vakaloloma qori, e cakacaka vakaukaua o tinaqu me vakarautaka na veika vakayago keirau gadreva kei na tuakaqu.

Au toki vei noqu bu niu yabaki 15. Au marautaka na tiko e kea ni levu na noqu itokani era tiko voleka. Sa levu  tale ga na galala e soli vei au ni laurai vata kei na gauna au se tiko kina kei tinaqu. Niu yabaki 16, au tekivu vakailala kei ira era dau gunu ena muanimacawa. Au vakatubu ulu, sakulevu noqu isulusulu, au vakatavako tale ga.

Au vakatovolea na veimataqali wainimategaga, ia au sega ni biuta rawa na gunu niu taleitaka vakalevu. Toso na gauna au sega wale ga ni gunuva e vica na bilo waini, au sa gunuva e dua na tavaya se sivia ena dua ga na gauna. Au dau kila vinaka na ka meu cakava me kua kina ni kilai niu mateni. Ia e kilai ga ena levu na gauna niu gunu nira boica vei au. Qori mada ga era se sega ni kila niu a gunuva e vica vata na tavaya waini se bia, qai tarava yani na vodka!

Ena levu na gauna, au dau taubeni ira na noqu itokani ni oti na danisi, dina ga ni levu cake na ka au gunuva. Au rogoca ena dua na siga ni tukuna ena veibeci e dua na noqu itokani niu vakabeleti ena gunu. E vakararawataki au sara ga qori.

Au vakasamataka na ka au sa cakava tu ena noqu bula. Au nanuma niu sa tawayaga. E vaka me sa sega tu ni vakainaki na ka kece au cakava ena noqu bula.

VEISAUTAKI AU NA IVOLATABU: Au liaca ena gauna qori ni sa veisau e dua keirau vuli vata, sa yalomalua. Au via kila na vu ni nona veisau, au sureti koya sara ena dua na valenikana. Ni keirau veitalanoa tiko, a vakamacalataka ni sa vulica tiko na iVolatabu kei ira na iVakadinadina i Jiova. E wasea mai eso na ka e sa vulica tiko, e ka vou kece vei au qori niu sega ni susugi mai na vuvale lotu. Au sa dau tiko ena nodra soqoni na iVakadinadina, au vuli iVolatabu tale ga kei ira.

Au vulica ena iVolatabu e levu sara na ka dina, e yaga qai veiuqeti. Kena ivakaraitaki, au vulica nida sa bula tu qo ena gauna e vakatoka na iVolatabu me “iotioti ni veisiga.” (2 Timoci 3:1-5) Au vulica tale ga ni sa voleka ni vakarusai ira na tamata ca ena vuravura qo na Kalou, ena vakadonuya tale ga mera marautaka na bula tawamudu ena Parataisi na tamata vinaka. (Same 37:29) Qori e uqeti au sara ga meu vakavinakataka na noqu bula meu rawa ni maliwai ira tale ga na tamata vinaka.

Au wasea sara vei ira na noqu itokani na ka dina au vulica tiko ena iVolatabu. Era vakalialiai au e levu, ia e vukei au qori meu raica nira sega ni itokani dina. Au liaca ni itokani au digia e vakavuna vakalevu na noqu gunusivia. Era dau nanamaki ina muanimacawa mera baci mateni.

Au sega tale ni vakailala kei ira, au sosomitaka qori ena noqu veitokani kei ira na iVakadinadina i Jiova nira dau veiuqeti. E veivakayaloqaqataki na noqu veimaliwai kei ira, nira lomana dina na Kalou ra qai saga vakaukaua mera muria na nona ivakatagedegede. Toso na gauna, au sa rawa ni muduka na noqu gunu sivia.

KENA YAGA: Au vakavinavinaka vei Jiova niu sa sega ni vakararavi ena alakaolo meu marau kina. Au sega ni kila se na vakacava tu noqu bula keu tomana tiko ga noqu ivakarau ni bula makawa. Ia au vakadeitaka qo ni sa vinaka na noqu ivakarau ni bula.

Sa vitu qo na yabaki na noqu marautaka tiko na noqu veiqaravi ena valenivolavola ni tabana ni iVakadinadina i Jiova e Slovenia. E vakainaki dina noqu bula niu sa mai kilai Jiova, au qaravi koya tale ga.