Me Sauma na iVolatabu

Na Cava ena Sotava o Lotu?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. E vinaka na lotu kece?

E levu na matalotu era lewena tu na tamata vinaka era via vakamarautaka na Kalou. E kilai ira na Kalou qai kauaitaki ira. Ia e ka ni rarawa nira dau vakayagataka na lotu eso mera cakava kina na ka ca. Era dau vakararawataki ira mada ga na kedra meca ena gauna makawa na iliuliu ni lotu. (2 Korinica 4:3, 4; 11:13-15) E vakamacalataki tu ena nius nikua ni so na iliuliu ni lotu era dau tokona na cakacaka ni batikadi, na ivalu, se ra dau vakacacani ira na gone.​—Wilika Maciu 24:3-5, 11, 12.

E tukuna na iVolatabu ni rua na mataqali lotu, na lotu dina kei na lotu lasu. Na lotu lasu e sega ni vakavulica na ka dina me baleta na Kalou. Ia e vinakata na Kalou o Jiova mera kila e levu na ka dina me baleti koya.​—Wilika 1 Timoci 2:3-5.

2. Na cava ena sotava o lotu?

E sega ni vinakata na Kalou mera vakamuai cala na tamata ena lotu era tukuna tiko nira lomani koya, ia era sega ni vakavulica na ka dina me baleti koya. Era dau taleitaka mada ga na lewe ni lotu qori mera dau veitokani kei na vuravura e lewa tu qo o Setani na Tevoro. (Jemesa 4:4; 1 Joni 5:19) E vakamacalataka na Vosa ni Kalou nira vaka na saqamua na lotu era nuitaka na matanitu vakatamata, era sega ni nuitaka na Kalou. E vakatokai koya na saqamua qo na iVolatabu me “Papiloni na Ka Levu,” na yaca qori e kau mai na matanitu makawa a tekivu kina na lotu lasu ni oti ga na Waluvu ena siga i Noa. E sa voleka sara na gauna me yaco kina vakidacala na veivakarusai ni Kalou vei ira na lotu era dau veivakacalai qai veivakalolomataki.​—Wilika Vakatakila 17:1, 2, 5, 17; 18:8, 23, 24.

 3. Sala cava ena kauta mai kina i vuravura na marau na Kalou?

E itukutuku marautaki ni sa voleka ni vakarusai o lotu lasu, nira na sereki kina na lewe i vuravura mai na nona veivakalolomataki. Ena sega tale ni veivakacalai o lotu lasu se vakavu veisei tale tiko. O ira kece na bula era na duavata ni qarava na Kalou dina duadua ga.​—Wilika Aisea 11:9; Vakatakila 18:20, 21; 21:3, 4.

4. Na cava era na cakava na tamata vinaka?

Na Kalou o Jiova e sega ni guilecavi ira na tamata vinaka era lewe tu ni lotu lasu e veiyasai vuravura. E sa vakasoqoni ira tiko ena gauna qo mera duavata ena nona vakavulici ira ena ka dina.​—Wilika Maika 4:2, 5.

E vinakata o Jiova mera lewe ni nona vuvale o ira era via qaravi koya. E levu na ka vinaka eda vakila nida qaravi Jiova, dina ga nira sega ni taleitaka na noda itokani kei ira na wekada. Eda veitokani kei na Kalou, eda lewe ni dua na “vuvale” vou e dau veilomani, eda nuitaka tale ga na bula tawamudu.​—Wilika Marika 10:29, 30; 2 Korinica 6:17, 18.

Me ikuri ni ivakamacala, raica na tabana e 15 kei na 16 ni ivola, Na Cava Sara Mada e Kaya na iVolatabu?, tabaka na iVakadinadina i Jiova.

[iTaba ni Credit Line ena tabana e 16]

The Complete Encyclopedia of Illustration/​J. G. Heck