Taro na Dauwiliwili . . .

E tiko na italatala yalewa ni iVakadinadina i Jiova?

▪ Io, e vica vata na milioni na yalewa iVakadinadina i Jiova e veiyasai vuravura era italatala. Era dua na ilawalawa levu era dau vunautaka na itukutuku vinaka ni Matanitu ni Kalou. E parofisaitaki ira na italatala yalewa qori na Same 68:11: “Sa solia na vosa [o Jiova]: Ka ra lewe vuqa sara [“na yalewa,” NW] era dautukuna voli.”

Ia kua ni nanuma ni tautauvata na nodra cakacaka vakaitalatala na yalewa iVakadinadina i Jiova kei na so na italatala yalewa ena veimatalotu. E tiko e dua na duidui levu. Na sala cava era duidui vakalevu kina?

Era duidui o ira era rogoca na nodra vunau. O ira na italatala yalewa, vakabibi ena lotu ni veivanua vaKarisito, era taura tu na itavi ni veiliutaki ena loma ni nodra ivavakoso, ra qai vunau ga vakalevu vei ira na lewe ni ivavakoso. Ia o ira na italatala yalewa ni iVakadinadina i Jiova, era na vunau ga vakalevu ena saula ni ivavakoso, vakabibi vei ira na lewenivanua era sotava ena nodra cakacaka vakavunau e veivale kei na so tale na vanua.

Dua tale na sala e duidui kina na nodra cakacaka vakaitalatala na yalewa iVakadinadina i Jiova mai vei ira na italatala yalewa ena veimatalotu tale eso, oya na nodra itavi ena loma ni ivavakoso. O ira na italatala yalewa ena lotu ni veivanua vaKarisito kei na so tale na veimatalotu era dau liutaki ira qai vakavulici ira na lewe ni nodra ivavakoso ena ivakavuvuli ni nodra lotu. Ia o ira na italatala yalewa ni iVakadinadina i Jiova era na sega ni veivakavulici ena ivavakoso ke tiko e dua na tagane papitaiso. Era veivakavulici ga o ira na tagane e ganiti ira na veivakavulici.​—1 Timoci 3:2; Jemesa 3:1.

E vakamacalataka na iVolatabu nira lesi ga na tagane mera qarava na itavi ena ivavakoso. Dikeva na ituvatuva e tuvanaka na yapositolo o Paula ena gauna e volavola kina vua na nona itokani o Taito, e ivakatawa tale ga: “Au a biuti iko tiko mai Kiriti mo . . . lesi ira tale ga na qase ena koro yadua.” E tomana o Paula ni o koya yadua e lesi e dodonu me “sega ni beitaki ena dua na ka, e dua ga na watina.” (Taito 1:5, 6) E solia tale ga na ivakasala qori o Paula vei Timoci ena nona ivola me baleta na ituvatuva ni ivavakoso: “Ke dua e via qarava na itavi vakaivakatawa, e sa vinakata tiko na cakacaka vinaka. E dodonu gona me kua ni beitaki ena dua na ka na ivakatawa, me dua ga na watina . . . me yacova na ivakatagedegede ni veivakavulici.”​—1 Timoci 3:1, 2.

Na cava e soli ga kina vei ira na tagane na itavi ena ivavakoso? E tukuna o Paula: “Au sega ni vakatara me veivakavulici na yalewa, se me lewa na tagane, me galu ga. Ni a buli e liu o Atama qai muri o Ivi.” (1 Timoci 2:​12, 13) Koya gona, na ituvatuva ni nona veibuli na Kalou e dusia na vuna e solia kina vua na tagane na itavi ni veivakavulici kei na veivakatawani.

O ira na italatala i Jiova era muria na ivakaraitaki i Jisu Karisito na nodra iLiuliu. E vola na tisaipeli o Luke na ka e baleta na cakacaka vakavunau i Jisu: “E lako o Jisu ina veikoro lelevu kei na veikoro lalai me lai vunautaka na itukutuku vinaka ni matanitu ni Kalou.” Oti sa qai lesi ratou na nona imuri o Jisu meratou cakava na cakacaka vata ga ya: “Eratou mani tekivu ena nodratou lakova na koro kece ena yalava ya, eratou vunautaka na itukutuku vinaka.”​—Luke 8:1; 9:2-6.

O ira na italatala i Jiova nikua​—tagane se yalewa​—era vakaitavi wasoma ena kena vakayacori na ka a yalataka o Jisu: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”​—Maciu 24:14.

[iYaloyalo ena tabana e 23]