E robota na vuravura raraba na leqa ni kawatamata. Ena so na matanitu, levu era dravudravua ra qai vakaloloma. So tale era rairai vutuniyau. Me rawa ni wasei vakatautauvata na veika meda bula kina e vuravura, ena gadrevi e dua ga na matanitu me liutaka na vuravura taucoko.​—Wilika Dauvunau 4:1; 8:9.

E levu era na sega ni duavata kei na vakasama me dua e liutaka na vuravura taucoko baleta ni na sega ni dua na tamata ena vakayacora vinaka na itavi qori. Ke dua e digitaki era na sega ni duavata kece kina na lewe i vuravura. O cei e se bera vakadua ni vakayagataka vakatani nona kaukaua ena gauna e veiliutaki kina? Koya gona, na vakasama ni dua me liutaki vuravura taucoko e vakarerevaki.​—Wilika Vosa Vakaibalebale 29:2; Jeremaia 10:23.

Na Kalou o Jiova e sa digitaki Luvena o Jisu me na liutaka na kawatamata me tawamudu. (Luke 1:32, 33) E kila vinaka tu o Jisu na ivakarau ni bula e vuravura. Ni se bula voli e vuravura, a vakabulai ira na tauvimate, vakavulici ira na yalomalumalumu, qai dau veimaliwai kei ira na gone. (Marika 1:40-42; 6:34; 10:13-16) Koya gona, e ganiti Jisu dina ga me iLiuliu.​—Wilika Joni 1:14.

Na Kalou e sa digitaki Luvena me liutaki vuravura mai lomalagi. (Taniela 7:13, 14) Ena sega ni gadrevi vua me tiko i vuravura me qai liutaki ira na kawatamata, me vaka ga e dua na iliuliu ni matanitu e sega ni gadrevi vua me tiko ena siti kece era vakarurugi ena nona lewa.​—Wilika Maciu 8:5-9, 13.

Era na ciqomi Jisu beka na lewe i vuravura me iLiuliu? Sega. Era na ciqomi koya ga o ira era vinakata na ka dodonu e tukuni ena iVolatabu. O Jiova ena vakarusai ira kece era sega ni ciqoma na iLiuliu yalololoma qai lewadodonu e sa digitaka.​—Wilika Maciu 25:31-33, 46.

O Jisu e sa vakasoqoni ira tiko na tamata yalomalumalumu mai na veimatanitu qai vakavulici ira ena ivakarau ni nona dauloloma na Kalou, me vaka ga e dua na ivakatawanisipi e vakasoqoni ira na nona sipi. (Joni 10:16; 13:34) O ira qori era sa mai gumatua ni tokoni Jisu kei na nona veiliutaki. (Same 72:8; Maciu 4:19, 20) O ira era yalodina ena veiliutaki i Jisu era kacivaka tiko ena duavata e veiyasai vuravura ni sa Tui o koya.​—Wilika Maciu 24:14.

Sa vakarau yavala o Jisu me vakayagataka na nona kaukaua me vakabulai ira na kawatamata mai na nodra cakacaka vakailawaki na veimatanitu. E sa digitaki ira tale ga eso na nona imuri yalodina mera lai tui vata kei koya ra qai liutaka na vuravura mai lomalagi. (Taniela 2:44; 7:27) Na Matanitu ena liutaka o Jisu ena vakavuna me roboti vuravura na veikilai kei Jiova qai vakalesuya mai na parataisi a vakayali taumada ena itekitekivu ni bula ni kawatamata.​—Wilika Aisea 11:3, 9; Maciu 19:28.