Na yalomalumalumu e sega ni viavialevu se dokadoka. O koya e yalomalumalumu ena sega ni beci ira na tamata. Ena kila tale ga ni tamata ivalavala ca qai vakaiyalayala na nona kaukaua.

A sega ni dokadoka o Mosese ni soli vua na lewa. Vakalevu e dau kilai ni dua e yalomalumalumu se dokadoka ni soli vua eso na lewa. E kaya na dauvolaivola ni ikatinikaciwa ni senitiuri o Robert G. Ingersoll: “Levu era rawa ni vosota na ituvaki dredre. Ia ke o via kila se mataqali tamata vakacava e dua, solia vua na lewa.” E ivakaraitaki vinaka ni yalomalumalumu ena tikina qori o Mosese. Ena sala cava?

A solia o Jiova vei Mosese na lewa ena nona lesi koya me liutaki ira na Isireli. Ia e sega vakadua ni dokadokataka qori o Mosese. Kena ivakaraitaki, a sauma ena yalomalumalumu na taro dredre me baleta na ivotavota e dodonu me taukena e dua. (Tiko Voli Mai na Lekutu 27:​1-11) E dua dina na taro bibi qo, baleta na vakatulewa ena tau ena sega wale ga ni walia na ituvaki ya, ena yaga tale ga vei ira na nodra kawa era na muri mai.

Ena vakatulewa vakacava o Mosese? E tukuna beka ni na vinaka na nona vakatulewa baleta ni liutaki ira tiko na Isireli? Ena vakanuinui beka ga ena nona vuku, na dede ni nona veiqaravi se na nona kila vinaka na sala i Jiova?

Ena rairai cakava qori na tamata dokadoka. Ia a sega ni cakava qori o Mosese. E tukuna na iVolatabu: “A sa kauta na nodratou vosa ko Mosese me lewa ko Jiova.” (Tiko Voli Mai na Lekutu 27:5) Vakasamataka mada! Ni oti e rauta ni 40 na yabaki nona liutaka na matanitu o Isireli, a nuitaki Jiova tiko ga o Mosese. Eda vakadinadinataka eke ni yalomalumalumu dina o Mosese.

A sega ni bau vakasamataka o Mosese ni o koya duadua ga e dodonu me veiliutaki. E marau o koya ena gauna a vakatara kina o Jiova vei ira eso tale na Isireli mera parofita. (Tiko Voli Mai na Lekutu 11:​24-29) Ena gauna a vakatura kina o vugona me wasea na itavi vei ira tale eso, a yalomalumalumu o Mosese ni muria. (Lako Yani 18:​13-24) Ena icavacava ni nona bula, dina ga ni se kaukaua vinaka tu, a kerei Jiova o Mosese me lesia e dua me sosomitaki koya. Ni digitaki Josua o Jiova, a tokoni koya sara ga na cauravou qori o Mosese, qai uqeti ira na Isireli mera talairawarawa ena veiliutaki i Josua ni na liutaki ira ena Vanua Yalataki. (Tiko Voli Mai na Lekutu 27:​15-18; Vakarua 31:​3-6; 34:7) Macala ga ni ka dokai dina vei Mosese na nona liutaki ira na Isireli ena nodra sokaloutaki Jiova. Ia e sega ni vakalaiva na itutu qori me guilecava kina na ka era gadreva eso tale.

Eda na sega ni via dokadoka ena gauna e soli kina vei keda na lewa, se dokadokataka na ka eda rawa ni rawata. Nanuma tiko: Me rawa nida cakava na cakacaka i Jiova ena noda vinaka taucoko, e dodonu me bibi cake na yalomalumalumu mai na ka eda rawa ni cakava. (1 Samuela 15:17) Nida yalomalumalumu dina, eda na saga meda muria na ivakasala vuku mai na iVolatabu: “Mo vakararavi vei Jiova e na vu ni yalomu: Ka mo kakua ni vakararavi ki na nomu yalomatua.”​—Vosa Vakaibalebale 3:​5, 6.

E vakavulici keda tale ga na ivakaraitaki i Mosese meda kua ni kauaitaka vakasivia na noda itutu se ilesilesi.

Vakacava ena yaga na noda vakatotomuria na ivakaraitaki ni yalomalumalumu i Mosese? E sega tale ni vakataratututaki qori! Nida vakaraitaka na yalomalumalumu dina, ena rawarawa na noda veimaliwai kei ira eda tiko veitikivi, era na taleitaki keda tale ga. Koya e bibi sara, ni na taleitaki keda sara vakalevu na Kalou o Jiova, ni o koya sara ga e vakaraitaka na itovo totoka qo. (Same 18:35) “Ni cati ira na viavialevu na Kalou, ia e vakaraitaka nona loloma soli wale vei ira na yalomalumalumu.” (1 Pita 5:5) Qori e dua na vuna bibi meda vakatotomuria kina na ivakaraitaki ni yalomalumalumu i Mosese!