A sotia tu o Alberto me voleka ni tini na yabaki. E kaya: “E dau masulaki keimami na neimami bete qai tukuna: ‘Me tiko vata kei kemuni na Kalou.’ Ia au lomatarotarotaka: ‘Au na lai veivakamatei, ia e kaya na iVolatabu: “Mo kua ni laba.”’”

A lewena tu o Ray na mataivalu e wai ena iKarua ni iValu Levu, qai tarogi nodra italatala: “O masulaki keimami me keimami qaqa. Ia vakacava o ira na meca, era masulaka tale ga qori?” A qai tukuna na italatala nida sega ni kila na sala e cakacaka kina na Turaga.

De dua o na sega ni duavata kei na ka e tukuna na italatala, e levu tale ga e va qori na nodra rai.

A tukuna o Jisu ni ivunau levu duadua ni Kalou, oya “mo lomana na kainomu me vaka nomu lomani iko.” (Marika 12:31) Vakacava e vakavuvulitaka o Jisu ni o ira ga eda matatamata vata se da vakaitikotiko vata era kainoda? Sega. E tukuna vei ratou nona tisaipeli: “Na ka qo era na kila kece kina ni dou noqu tisaipeli, ke dou veilomani.” (Joni 13:34, 35) Na vakasakiti ni nodra dau veilomani e kedra ivakatakilakila. Era tu vakarau mera solibula ena vukudra na tacidra, era sega tale ga ni veivakamatematei.

Era muria vinaka na lotu vaKarisito taumada na veika e tukuna o Jisu. E kaya na Encyclopedia of Religion: “Era tukuna na qasenilotu taumada, okati kina o Tertullian kei Origen, ni tabu vei ira na lotu vaKarisito mera veivakamatei, oya na vuna era sega ni curu kina ena mataivalu ni Roma.”

Era veicati tu na veivanua era vakaitikotiko kina na iVakadinadina i Jiova, ia era kilai na iVakadinadina ena nodra saga mera veilomani tiko ga.

Kena ivakaraitaki, ena 1994 mai Rwanda era veicati na yavusa na Hutu kei na Tutsi, ia era tawaveitovaki na iVakadinadina i Jiova. Era solibula mera taqomaki ira na tacidra era lewe ni dua tale na yavusa. E rua na iVakadinadina Hutu erau tobo ni rau vunitaki ira na tacidrau era Tutsi. Era mani kaya e dua na ilawalawa sotia: “Drau na vakamatei ni drau vukei ira na Tutsi mera dro.” Ka ni rarawa ni rau qai vakamatei.—Joni 15:13.

Cava o nanuma: Na ka era cakava qori na iVakadinadina i Jiova, e salavata beka kei na ka e tukuna o Jisu me baleta na nodra solibula ena vukudra na tacidra?