VUNA ERA VAKATITIQA KINA ESO: Era vakabauta e levu ni Kalou e raici keda ga meda tamata ivalavala ca, tawasavasava qai sega ni ganiti meda kauaitaki. Kena ivakaraitaki e dua na marama o Kendra, a lomabibi qai ca nona lewaeloma ni dredre me bulataka na ivakatagedegede ni Kalou. Vakavuna me kaya, “Au sa sega ni via masu tale.”

KA E TUKUNA NA VOSA NI KALOU: E kilai iko vinaka o Jiova qai sega ni raica na nomu malumalumu. E kaya na iVolatabu: “Ni sa kila ko koya na nodai bulibuli; Sa nanuma ga ni da sa kuvu-ni-soso.” Kena ikuri, e sega ni lewai keda “me vaka na nodai valavala,” ia e vosoti keda vakayalololoma ke da veivutuni.—Same 103:10, 14.

Dikeva mada na ivakaraitaki i Tevita na tui e Isireli e cavuti ena imatai ni ulutaga veitaravi qo. A masuta na Kalou ena nona kaya: “Ni’u sa vaka na vulovulo wale sa kunei au na matamuni, ia sa volai kece sara na tikiqu e na nomuni vola. . . . Mo ni dikevi au, na Kalou, mo ni kila na lomaqu.” (Same 139:16, 23) Io, e vakadeitaka o Tevita ni dina ga ni cala ena levu na gauna, e kila o Jiova ni veivutuni dina mai vu ni lomana.

Koya gona, ni vakatauvatani kei keda na tamata e kilai iko vinaka o Jiova. Ni kaya sara ga na iVolatabu: “Sa raica na ka esau ko ira na tamata, ia sa raica na yalo ko Jiova.” (1 Samuela 16:7) E kila na Kalou na vuna e va qori kina na nomu ivalavala, de dua e ka ni kawa, nomu isususu, itovo se ivalavala ni vanua o tiko kina. Qori na veika e rawa ni vakamuai iko. Ia e marau o Jiova ni raica na sasaga o vakayacora, dina ga ni levu na cala o cakava.

Ni kilai iko vinaka na Kalou, ena vakayagataka vakacava o koya na kilaka qori me vakacegui iko kina?