Raitayaloyalotaka mada ni rau veitalanoa tiko e dua na veitamani, e yabaki vitu o luvena tagane. E kaya o tama, “A bulia na Kalou na vuravura kei na veika kece era tu kina, na matanisiga, na vula kei na kalokalo ena dua na gauna makawa sara.” E vakaraici tamana toka o luvena qai taroga, “Ia Ta, o cei e bulia na Kalou?”

E sauma o tamana, “Sega ni dua e bulia na Kalou. E sega na nona itekitekivu.” Ena rairai lomavakacegu o gone ena isaunitaro qori. Ia ni toso na gauna, ena via kila e levu tale na ka. E dredre vua me vakabauta ni dua e sega nona itekitekivu. O lomalagi kei vuravura mada ga e tiko na kena itekitekivu. Mani veinanuyaka tu, ‘O cei e bulia na Kalou?’

Na cava e kaya na iVolatabu? Me vakataki koya ga na tama sa cavuti oti mai, na iVolatabu tale ga e vakamacalataka na veika me baleta na Kalou. E vola o Mosese: ‘Oi kemuni Jiova . . . ni bera ni buli na veiulunivanua, se vakayacora na vuravura me dua na ka, sai kemuni ga na Kalou e sega ni tubu ka sega ni mudu.’ (Same 90:1, 2) E vakamacalataka tale ga na parofita o Aisea: “Ko sa sega beka ni kila? ko sa sega ni rogoca? ko koya sa Kalou ka tawamudu.” (Aisea 40:28) E kaya tale ga na vola i Juta ni a bula tu na Kalou “ena veigauna sa oti.”—Juta 25.

Na tikinivolatabu kece qori eda vakadeitaka kina ni o Jiova e “Tui ni veitabagauna kece,” e tokona tale ga na yapositolo o Paula. (1 Timoci 1:17) E vakaraitaka qori ni a bula tu ga na Kalou ena veitabagauna sa oti, ena bula tu ga ena veigauna se bera mai. (Vakatakila 1:8) Qori e dua na ka e kilaitani kina na Kalou Kaukaua Duadua.

Ia na cava e vakadredretaka noda vakabauta qori? Baleta e duidui noda raica na gauna mai na nona rai o Jiova. Kena ivakaraitaki, e duanaudolu na yabaki vei keda e dua ga na siga vei Jiova. (2 Pita 3:8) Vakasamataka mada: Ena vakabauta beka na vodre nida bula me 70 se 80 na yabaki, ni o koya mada ga e bula me 50 ga na siga? Sega! Ia na iVolatabu e tukuna nida vaka na vodre ena mata ni Kalou Cecere. Ni vakatauvatani kei Jiova, e vakaiyalayala ga na ka eda kila. (Aisea 40:22; 55:8, 9) Eso mada ga na ka me baleti Jiova e dredre me katuma rawa na tamata.

E dredre meda vakabauta ni sega nona itekitekivu na Kalou, sega tale ga nona icavacava, ia nida vakasamataka na veika sa dikevi mai eda na raica ni vakaibalebale. Kaya mada ke dua e bulia na Kalou, sa na vakatokai me Dauveibuli. Ia e tukuna na iVolatabu ni “bulia na ka kece” o Jiova. (Vakatakila 4:11) Eda kila tale ga ni lomalagi kei vuravura a sega tu e liu. (Vakatekivu 1:1, 2) A basika gona vakacava? Ni bera ni buli na lomalagi kei na vuravura okati kina na nona ibulibuli uasivi, na Agilosi kei na Luvena duabauga e vakatubura, e vinakati me bula mada e liu o koya na Dauveibuli. (Jope 38:4, 7; Kolosa 1:15) Koya gona, a bula taumada e liu o koya. E sega gona ni rawa ni buli na veika kece ke sega o koya e bulia.

Nida dikeva na keda ibulibuli, lomalagi kei na vuravura era ivakadinadina ni tiko e dua na Kalou e sega nona itekitekivu e sega tale ga nona icavacava. O koya e vakavuna na veitosoyaki ni veika e lomalagi kei vuravura, vakarautaka tale ga na lawa era vauci kina, e dodonu me bula makawa tu mai. Sa na qai rawa vua me bulia na veika tale eso.—Jope 33:4.