E tukuni ena iVolatabu ni na yaco tale ga na veivakarusai ena icavacava: “Ni na qai yaco na veivakararawataki levu ena ivakatagedegede e sega ni bau vakilai vakadua mai na ivakatekivu kei vuravura me yacova mai qo . . . O koya gona, ke sega ni vakalekalekataki na gauna ya, ena sega ni dua e bula rawa.” (Maciu 24:21, 22) Ia e yalataka na Kalou ni levu era na bula: “Sa takali tiko yani na vuravura . . . , ia o koya e cakava na loma ni Kalou ena tu ga me sega ni mudu.”—1 Joni 2:17.

Na cava mo cakava ke o via bula “tu ga me sega ni mudu,” mo kua ni takali vata kei na vuravura qo? Vakacava, o na maroroi iyaya se kumuna na veika vakayago? Sega. Ia e duatani na ka e uqeta na iVolatabu meda cakava. E kaya: “Nira na vakawaicalataki na ka kece qo, ni vakasamataka vinaka na ivalavala moni muria moni savasava kina, moni qarava tale ga na Kalou, ni oni waraka qai namaka tiko me yaco mai na siga i Jiova.” (2 Pita 3:10-12) E matata ena tikina wavolita ni “ka kece qo” me vakawaicalataki e okati kina na ivakarau ni veiliutaki ena vuravura ca qo kei ira kece na digia me liutaki ira, ra sega ni nuitaka na Kalou. Macala ga ke da kumuna na iyau vakayago eda na sega ni bula ena gauna ni veivakarusai qori.

Ia ke da via bula, meda yalodina vei Jiova, da qai vulica na ivalavala kei na itovo e vakamarautaki koya. (Sefanaia 2:3) Meda kua mada ga ni muri ira e levu nikua, nira vakalecalecava na ivakatakilakila nida sa bula tu ena dua na gauna bibi, ia meda “namaka tiko me yaco mai na siga i Jiova.” Era rawa ni vakavulici iko na iVakadinadina i Jiova mo bula ena siga sa roro tiko mai qori.