Na yabaki ga e tarava au tekivu vakaraitaki ena iyaloyalo yavala, levu vei ira e dau noqu sara ga na itavi bibi me vakaraitaki kina e dua. Era via vola na kequ itukutuku na dauvola itukutuku, ra via tabaki au na dauveitaba, vinakati meu dau tiko ena imatai ni gauna e saravi kina e dua na iyaloyalo, meu vulagi dokai ena dola ni dua na vanua vou, au sureti tale ga ina vakasigalevu kei na vakayakavi. Era taleitaki au e levu.

Toso na gauna au qai liaca ni sega sara ga na kena kamica me vaka au nanuma taumada. Levu na iyaloyalo au vakaraitaki kina e vakarerevaki, ni levu kina na ivalavala voravora. E sega i Hong Kong o ira na dau veisosomitaki vei ira na vakaraitaki tiko mera cakava na itavi dredre se vakarerevaki ena iyaloyalo, me vaka na kena era dau cakava e Hollywood. Koya gona au na vakayacora na itavi vakarerevaki cava ga e tukuni meu cakava, me vaka na kena vodoki na motopai qai vukatubutaki e macawa ni cici tiko e ra na motoka. Levu na iyaloyalo voravora qai vakasisila au vakaraitaki kina. So e ka ni vakatevoro.

Au vakamau kei na dua e dau caka iyaloyalo ena 1995. Kena irairai ni sa tu kece vei au na ka meu marau kina, oya na rogo, vakaiyau, kei na watiqu lomani, ia au se lomabibi tiko ga, au rarawa tale ga. Au mani nanuma meu sa vakacegu mai na noqu dau vakaraitaki ena iyaloyalo.

Au vakananuma vakatitobu na noqu vakabauta niu se gone. Na gauna ya, keirau dau gade tiko kei tuakaqu ina dua na vuvale eratou iVakadinadina i Jiova. Na tamadratou o Joe McGrath, e vakavulici keirau kei na tolu na luvena yalewa ena iVolatabu. E dua na matavuvale mamarau, e dau dokai watina vakalevu kei ratou na gone o “Uncle Joe.” Au dau taleitaka tale ga na tomani ratou ina soqoni vaKarisito. So na gauna keitou dau lako ina nodra soqo lelevu. Dua na gauna marautaki qori. Sega sara ga na ka au leqataka niu maliwai ira na iVakadinadina.

Ia so na ka ca e yacovi au e vale. Dau rarawataka  sara ga o tinaqu na ivakarau ni bula i tamaqu, e lomabibi kina vakalevu. Niu se qai yabaki tini, sa muduka o Tinaqu na nona dau vakasosoqoni kei ira na iVakadinadina i Jiova. Au tomana tiko ga noqu sosoqoni kei ira, ia e sega ni lomaqu taucoko sara. Au qai papitaiso niu sa yabaki 17. Sega ni dede, au bulataka eso na itovo e sega ni vaKarisito, mani biuta na vakasosoqoni kei ira.

Oti toka ga noqu vakamau, rau veisiko yani e rua na qase ena ivavakoso ni iVakadinadina i Jiova e voleka vei au. Rau vakamacalataka na ka meu cakava meu lesu kina vei Jiova, rau qai tuvanaka me keirau veitalanoa mada kei na dua na daukaulotu, o Cindy. Ena gauna qori au sa sega tu kina ni vakabauta vakalevu na iVolatabu, au mani tukuna vei Cindy me vakadinadinataka ke Vosa dina ni Kalou na iVolatabu. E vakaraitaka sara vei au na parofisai vakaivolatabu era sa vakayacori oti. Toso na gauna keirau sa qai veitokani, mani sureti au meu vulica eso na ivakavuvuli rawarawa sara ena iVolatabu. Au mani vakadonuya. E imatai ni gauna meu kila kina ni Kalou dauloloma o Jiova, e vinakata tale ga meu marau.

Niu sa tekivu lesu ina soqoni vaKarisito, au taleitaka vakalevu na veimaliwai kei ira na iVakadinadina mai na noqu dau tiko kei ira na vakaitavi ena buturara ni veivakamarautaki. Ia na veika au sotava niu se gone, e vakavuna meu sega ni nuitaka kina e dua, au beci au tale ga. Sa qai vakaraitaka vei au vakaivolatabu e dua na iVakadinadina i Jiova ena ivavakoso na ka meu cakava me vinaka kina na ivakarau ni lomaqu, au vulica tale ga na sala meu veitokani vinaka kina kei ira eso tale.

Keirau toki vakaveiwatini ena 1997 i Hollywood, e Kalifonia, Merika. Au veivakavulici vakalevu ena Vosa ni Kalou me yaga vei ira na vakarorogo na kena ivakasala vuku. Ni vakatauvatani kei na veika lelevu au rawata niu vakaraitaki ena iyaloyalo, e vakacegui au vakalevu noqu veivakavulici ena iVolatabu. Kena ivakaraitaki keirau sota kei Cheri ena 2002, keirau se veikilai makawa sara mai Hong Kong. E levu na ka e tautauvata kina na neirau bula. A nona na icocovi ni Adi Hong Kong ena yabaki yani e liu niu bera ni taura. A bau mai vakaicocovitaki au sara ga kina. E dau vakaraitaki ena iyaloyalo yavala, oti e dewa ina caka iyaloyalo, cakacaka vakavoleka tale ga kei ira na rogo ena caka iyaloyalo. Keirau sa mai tu ruarua qo e Hollywood.

Dua na ka noqu nanumi Cheri niu qai kila ni a mate na tagane rau sa veimusumusuki tu ni tauvi mateniuto vakasauri. E sega ni vakacegui koya na nona lotu Buda. Me vakataki au ga, e levu na ka e rawata era dau diva tu ga eso, ia e rarawa qai sega ni nuitaka e dua. Au vakamacalataka sara vua na veika au sa vulica tiko ena iVolatabu, ia e dredre ga nona taleitaka baleta nona vakabauta ena lotu Buda.

A lako vakacakacaka i Vancouver, e Kenada o Cheri ena 2003, qai qiriti au mai ena dua na siga. E kaya vei au ni a draiva tiko ena vanua e yawa mai na siti qai qoroya vakalevu na veika e raica, vakasauri ga nona masu vakadomoilevu: “Ni tukuna mai vei au, O cei na Kalou dina? O cei na yacamuni?” Na gauna vata qori, e sivita kina na Kingdom Hall qai raica na yaca i Jiova. E nanuma kina ni sa sauma na Kalou na nona masu, vinakata sara ga me sotavi ira na iVakadinadina i  Jiova ena kena gauna totolo. Au tuvanaka sara me dua erau sota, ni oti ga e vica na siga, sa soqoni ena ivavakoso ni vosa vakaJaina e Vancouver.

E qai kaya vei au o Cheri: “Era taleitaki au dina o ira qo. Au rawa ni talaucaka na lomaqu vei ira.” Dua na ka noqu marau niu rogoca qori, ni gauna e tiko kina o Cheri ena buturara ni caka iyaloyalo, e sega ni levu nona itokani. E lako tiko ga ina soqoni o Cheri. Ia e sainitaka e dua na konitaraki ena 2005, me cakava e rua na iyaloyalo e Jaina, vu ni nona lesu i Hong Kong. Ka ni marau ni qai yalataki koya vei Jiova o Cheri, e papitaiso sara me iVakadinadina i Jiova ena 2006 ena dua na nodra soqo e Hong Kong. E via qaravi Jiova vakalevu, ia e vakalatilati tiko ga na nona bisinisi ni caka iyaloyalo, vu ni nona sega ni dau marau.

E veisau na bula i Cheri ena 2009. E vakatulewataka me sa vakacegu mai na nona dau caka iyaloyalo me rawa ni qaravi Jiova vakatabakidua. E levu kina na nona itokani ena ivavakoso vaKarisito. E cakacaka vakatabakidua ena kena vunautaki na itukutuku vinaka ni Matanitu ni Kalou, e marautaka tale ga nona tuberi ira eso tale mera vakavinakataka nodra bula.—Maciu 24:14.

E vakatulewataka o Cheri me lai veitokoni ena iwasewase lailai ni vosa vakaNepali ni iVakadinadina i Jiova e Hong Kong. Era dau sega ni kauaitaki ra qai beci e levu na kai Nepali era tiko e Hong Kong, nira sega ni kila vinaka na vosa vakavalagi se vosa vakaJaina, duidui tale ga nodra itovo. E kaya vei au o Cheri ni marautaka nona vakavulici ira mera kila na iVolatabu. Kena ivakaraitaki, ni vunau tiko e veivale ena dua na siga, e sotava sara e dua na marama ni Nepali e sega sara ga ni kila na Kalou dina o Jiova, ia bau kila toka eso na ka me baleti Jisu. E vakayagataka o Cheri na iVolatabu me vakaraitaka ni o Jisu a masuti Tamana e tiko mai lomalagi. Na gauna e kila kina na marama qo ni rawa ni masuta na Kalou dina o Jiova, e taleitaka sara ga na itukutuku vinaka. Sega ni dede rau sa vuli iVolatabu tale ga na watina kei na luvena yalewa.—Same 83:18; Luke 22:41, 42.

Niu raica nona marautaka tiko o Cheri na cakacaka vakaitalatala vakatabakidua, au nanuma sara, ‘Cava e tarovi au ena noqu cakava tale ga qori?’ Ena gauna qo au sa tiko tale kina e Hong Kong. Au tuvanaka sara meu vakaitavi vakalevu ena kena vakavulici na ka dina vakaivolatabu. Au marautaka dina na noqu dau vakarogoci ira e levu kei na noqu tuberi ira mera kila na Vosa ni Kalou.

Kena ivakaraitaki, keirau vuli iVolatabu kei na dua na marama ni Vietnam e dau rarawa voli ga qai mata tagitagi tu ga. Ia qo sa donu nona rai me baleta na bula, marautaka tale ga nona vakasosoqoni kei ira ena ivavakoso.

Keirau vakila ruarua kei Cheri e dua na ka e vinaka sara mai na rogo. E totoka na vakaraitaki ena iyaloyalo, keirau rogo tale ga kina, ia e veivakacegui sara nodra vakavulici e levu ena iVolatabu mera kila na Kalou o Jiova, ni na vakalagilagi ga kina o koya. Keirau raica votu na dina ni vosa i Jisu: “E marau vakalevu o koya e solia na ka, vakalailai o koya e taura na ka.”​—Cakacaka 20:35.