E levu sara na parofisai era tu ena iVolatabu ra qai tukuni vakamatailalai. Sega ni dua vei keda e rawa ni vakamacalataka va qori na veika e se bera ni yaco. Koya gona na kena dau vakayacori na parofisai vakaivolatabu e vakadeitaka ni iVolatabu e Vosa ni Kalou.​—Wilika Josua 23:14; 2 Pita 1:20, 21.

Na parofisai vakaivolatabu era sa vakayacori oti e yavu dei meda vakabauta kina na Kalou. (Iperiu 11:1) Eda nuidei tale ga ni na yaco dina na ka e yalataka na Kalou me baleta na veigauna vinaka se bera mai. Eda nuitaka gona na parofisai vakaivolatabu.​—Wilika Same 37:29; Roma 15:4.

Eso na parofisai era vakaroti kina na dauveiqaravi ni Kalou ena ka mera cakava. Kena ivakaraitaki, era biubiu mai Jerusalemi na lotu vaKarisito ena imatai ni senitiuri nira raica na kena sa vakayacori eso na parofisai. Na gauna e qai rusa kina na koro qori nira cati Jisu e levu, era sa tu yawa sara na lotu vaKarisito ena dua tale na vanua.​—Wilika Luke 21:20-22.

E levu na parofisai era vakayacori tiko nikua e dusia ni sa vakarau yavala na Matanitu ni Kalou me vakarusai ira kece na veiliutaki tiko kei na nodra matanitu. (Taniela 2:44; Luke 21:31) E bibi gona ena gauna qo meda sasaga me vakadonui keda na Tui, o Jisu Karisito, o koya na digitaki ni Kalou.​—Wilika Luke 21:34-36.