Au sucu e Acul, e dua na tauni tu vagalala ena yasayasa vakara ni veidelana e Guatemala. Au cavutu mai na vuvale era kilai mera Ixil, qo e dua na matatamata era nodra kawa na yavusa na Maya. Au kila na vosa vakaSipeni, ia niu tubu tiko au vosataka na vosa ni vanua qo. Au bula donuya sara ga na nodra veivaluvaluti na lewenivanua e Guatemala me 36 na yabaki. Era mate kina e levu na vuvale na Ixil.

Niu se qai yabaki va, a qitora tiko o tuakaqu e yabaki vitu e dua na gasaukuro e dau viritaki qai kacabote vakacalaka. Au mataboko sara ga kina, ka ni rarawa ni leqa kina o tuakaqu. Ni oti ga qori au sa lai curu ena nodra koronivuli na gone mataboko ena Korolevu e Guatemala, au vulica kina na kena wiliki na nodra matanivola na mataboko, e kilai me Braille. Niu tiko e kea, au sega ni kila se cava era sega ni vakatarai au kina na qasenivuli meu veivosaki kei ira na vo ni gone, ra yawaki au tale ga o ira keimami vuli vata tiko. Au dau galili vakalevu, dau waraka tu ga na rua na vula ni sereki e veiyabaki meu lesu i vale vei tinaqu, e marama yalovinaka qai dau loloma. Rarawataki dina nona mai takali niu se qai yabaki tini. Dua na ka noqu yalolailai ni sa mai yali o koya e dau lomani au vakalevu.

Au lesu ina tauni ga au susu kina niu sa yabaki tinikadua, au lai tiko sara kei na tuakaqu vakacabecabe kei na nona vuvale. Ratou qaravi au vakayago, ia sega ni walia qori na mosi ni lomaqu. So na gauna au tagi vua na Kalou: “Cava e mate kina o tinaqu? Cava au mataboko kina?” Era kaya vei au eso ni leqa au sotava tiko e inaki ni Kalou. Au tinimaka kina ni sega ni dau veikauaitaki na Kalou, e veivakaduiduitaki tale ga. Au via vakamatei au ga, ia e dredre niu mataboko tu.

Niu mataboko au malumalumu qai dredre noqu taqomaki au vakayago. Niu se gonetagane, vica na gauna au vakasagai kina—au sega ga ni tukuna niu nanuma ni sega ni dua ena kauai. Sega ni levu era dau vosa vei au, vu ni noqu dau galu tu ga kina. Au sega ni dau veimaliwai vakalevu, tini lomabibi kina vakalevu, au qai sega ni nuitaka e dua.

Niu se qai itabagone, rau vosa vei au e dua na veiwatini iVakadinadina i Jiova e koronivuli ena gauna ni vakacagicagi. Dua na qasenivuli e dau lomani au a kerea me  rau sikovi au yani. Rau vakamacalataka na yalayala ni iVolatabu me baleta nodra vakaturi na mate kei na nodra sa na rai tale na mataboko ena dua na gauna. (Aisea 35:5; Joni 5:28, 29) Au taleitaka na ka rau vakavulica tiko, e dredre me keitou veitalanoa niu dau galu tu ga. Ia sega ni vakalatilati vei rau qori, rau sikovi au tiko ga yani vakayalololoma me rau veivakavulici ena iVolatabu. Rau dau taubaletaka na veiwatini qo e 10 na kilomita, rau cabeta tale ga na ulunivanua me rau yaco yani ena noqu tauni.

E vakamacalataka vei au o tuakaqu vakacabecabe ni rau sulusulu vinaka, rau sega ga ni vakaiyau. Rau dau kauaitaki au vakalevu, rau kau iloloma tale ga yani vei au ena so na gauna. Au nanuma kina ni o ira ga na lotu vaKarisito dina era na vakuai ira va qori.

Au dau vakayagataka nodra ivola na mataboko niu vuli iVolatabu. Sa matata vei au na veika au vulica tiko, ia e duidui ga na ivakarau ni lomaqu ni dredre meu vakabauta eso na ka. Kena ivakaraitaki, e dredre meu vakabauta ni kauaitaki au dina na Kalou se ra kauaitaki au eso tale me vakataki koya. Au sa kila na vuna e vakatara tiko kina vakalekaleka na Kalou na veika ca, ia dredre meu okati koya me dua na Tama dau loloma dina. *

Ni toso tiko noqu vuli iVolatabu, sa qai veisau na noqu rai. Au vulica ni kauaitaki ira dina na vakalolomataki tu na Kalou. E kaya me baleti ira na nona dauveiqaravi era vakararawataki: “Au sa raica dina na nodra vakaloloma na noqu tamata . . . niu kila vinaka na ka mosimosi era vakila tiko.” (Lako Yani 3:7) Niu sa qai vakabauta dei na nona itovo talei na Kalou, e uqeti au meu yalataka noqu bula vua. Au mani papitaiso ena 1998 meu iVakadinadina i Jiova.

Ni oti e dua na yabaki na noqu papitaiso, au tiko sara ena dua na nodra vuli na mataboko e voleka toka ga ena siti o Escuintla. E kila e dua na qase ena noqu ivavakoso na leqa au sotava tiko me baleta noqu dau lako ena soqoni kei na yawa ni vanua au tiko kina. Na ivavakoso voleka duadua e kea e tiko ena ulunivanua vata ga rau dau taubaletaka yani na veiwatini iVakadinadina me rau lai vakavulici au, e dredre gona meu dau tiko ena soqoni. E tuvanaka sara na qase ni ivavakoso qori me ratou vakaicilitaki au e dua na vuvale iVakadinadina e Escuintla, meu rawa ni dau tiko ena soqoni. Me yacova mai nikua, eratou qaravi au tiko me vaka ga au lewe ni nodratou vuvale.

E levu tale na ivakaraitaki ni loloma dina au vakila ena ivavakoso. Niu iVakadinadina i Jiova e vakadeitaka ga vei au na veika kece qori niu sa bula maliwai ira tiko na lotu vaKarisito dina.—Joni 13:34, 35.

Au vakila ni tiko na kequ yaga kei na noqu inuinui. E vakainaki tale ga na noqu bula ena gauna qo. Niu veiqaravi vakaitalatala vakatabakidua ena veivakavulici vakaivolatabu era vakayacora tiko na iVakadinadina i Jiova, au kauaitaka vakalevu na nodra vakavulici eso tale ena veika talei mai na iVolatabu, au sega ni kauai vakalevu ena kequ ituvaki vakayago. Au qase ni ivavakoso tiko ena gauna qo, au dau vunau tale ga vakaivolatabu ena so na ivavakoso era tiko ena vanua au vakaitikotiko kina. E itavi dokai tale ga meu dau vunau vakaivolatabu ena so na soqo ni veiwasewase era mai vakarorogo kina e vica vata na udolu.

Au tuvaitutu ena 2010 ena Koronivuli ni Vuli Veiqaravi Vakaitalatala, (sa Koronivuli ni iTalatala ni Matanitu ena gauna qo) a vakayacori e El Salvador. Au vulica ena koronivuli qo meu vakayacora vinaka noqu itavi ena ivavakoso. Niu vuli kina, au vakila na titobu ni nona nuitaki au kei na nona lomani au na Kalou o Jiova, e rawa ni vakayagataka ga e dua me cakava na nona cakacaka.

E kaya o Jisu: “E marau vakalevu o koya e solia na ka, vakalailai o koya e taura na ka.” (Cakacaka 20:35) Au rawa ni tukuna nikua niu marau vakalevu, dina niu a sega ni bau vakasamataka tu qori e liu, ia sa qai vakila qo niu rawa ni vukei ira eso tale.