O ira na tamata nuitaki era na vakadinadinataka nodra veivakabauti na itubutubu, itokani, kei na boso. Era muria na lawa, dina ena nodra yalayala, ra qai tukuna na ka dina.

Ena so na ituvaki, na levu ni galala e soli vei iko e vakatau ena vakatulewa o cakava ena veigauna sa oti.

“Ke o vinakata me rau nuitaki iko nomu itubutubu, vakaraitaka ni o yalomatua, ni o rawa ni cakava na ka e tukuni vei iko se rau mani tiko e vale se sega.”—Sarahi.

IVAKAVUVULI VAKAIVOLATABU: “Ni dau vakadeitaka se o cei dina o kemuni.”—2 Korinica 13:5.

Muria eso na vakatutu yaga qo ke o vinakata mo nuitaki vakalevu, se mo nuitaki tale.

Daudina. O na sega ni nuitaki ke o dau lasu. Era na nuitaki iko eso tale ke o tukuna na ka dina, qai sega ni vunitaka e dua na ka, vakabibi ke o cala.

“E dau rawarawa meda tukuna na ka dina ni vinaka tu na bula. Ia o na nuitaki vakalevu ke o tukuna na ka dina veitalia ke o vakamadualaki kina.”—Caiman.

IVAKAVUVULI VAKAIVOLATABU: “Keitou vinakata me keitou dina ena ka kece.”—Iperiu 13:18.

Mo nuitaki. Era kaya e 78 na pasede na dauvakadidike mai Merika nira dau vinakata na kabani mera nuitaki na tamata cakacaka. Ni o saga mo nuitaki ena gauna qo, ena yaga vakalevu ni o sa uabula.

“Rau raica noqu itubutubu niu rawa ni cakava noqu itavi, rau sega tale ga ni tukuna wasoma vei au na ka meu cakava. Niu sega ni dau waraka me tukuni vei au na ka, rau nuitaki au kina vakalevu.”—Sarah.

IVAKAVUVULI VAKAIVOLATABU: “Au nuidei tu ni o ni na duavata kei na noqu gagadre, . . . niu kila ni na uasivi sara na ka o cakava ni vakatauvatani kei na ka e kerei vei iko.”—Filimoni 21.

Dau vosovoso. E laurai levu nona tubu cake tiko e dua na itabagone. Ia e taura na gauna me kilai ni sa yalomatua, qai nuitaki. Ena vinakati gona na vosovoso.

“E taura na gauna qai vinakati na sasaga me rau nuitaki iko nomu itubutubu. Kua ni namaka mera nuitaki iko eso tale baleta ga ni o nuitaki tu ena dua na gauna. Saga tiko ga mo nuitaki.”—Brandon.

IVAKAVUVULI VAKAIVOLATABU: “Moni vakaisulu ena. . . vosovoso.”—Kolosa 3:12.