VEI IRA NA ITUBUTUBU
5: Veivosaki
CAVA E OKATI KINA?
Na veivosaki e okati kina na nodra dui talaucaka na itubutubu kei na gone na nodra rai kei na ka e tu e lomadra.
VUNA E BIBI KINA NA VEIVOSAKI
E ka ni sasaga dina na veivosaki kei ira na itabagone. E kaya e dua na ivola na Breaking the Code nira dau tukuna na ka kece vei ira na nodra itubutubu na gone nira se lalai. Nira tubu cake tiko, sa lailai na nodra dau veivosaki kei ira na nodra itubutubu. Era sa sega kina ni kila na itubutubu na nodra rai kei na ka e tu e lomadra na luvedra. De dua era na sega ni via veivosaki kei iko na luvemu ena so na gauna. Ena vinakati ena gauna va qori na sasaga me caka ga kina na veivosaki!
KA O RAWA NI CAKAVA
Tu vakarau mo veivosaki kei luvemu ena gauna e vinakata kina. Cakava qori ke vinakata mada ga mo drau veivosaki vakabogilevu.
“De dua o na via kaya, ‘O sa qai via veivosaki qo? Daru a toka vata ena siga taucoko!’ E sega ni dodonu meda vosavosa nira via talaucaka na luveda na lomadra. Qori sara ga na ka eda vinakata na itubutubu.”—Lisa.
“Au dau via moce vakayakavi, ia ena so na bogi ratou dau via veivosaki kei au na luvequ itabagone ena bogilevu tutu.”—Herbert.
IVAKAVUVULI VAKAIVOLATABU: “Me kua ni dua e qara na ka e yaga ga vua, me qara tale ga na ka e yaga vei ira tale eso.”—1 Korinica 10:24.
Vakarogoci luvemu vinaka. E kaya e dua na tama: “Ni ratou vosa tiko na luvequ, so tale na ka e dau lako tu kina noqu vakasama. Eratou kila sara ga niu sega ni vakarogoci ratou.”
Ke vakawelei iko na tivi se iyaya vakalivaliva me vaka na mobail, bokoca se biuta vakatikitiki. Vakarogoca vinaka na ka e tukuna o luvemu. Kua ni nanuma ni tawayaga me veivosakitaki na ka e kauai kina, ke sega mada ga ni bibi vei iko.
“Mera kila na luveda nida kauaitaka dina na ka e tu e lomadra. Ke sega, era na kubuta lo tu ga se lai talaucaka tale vua e dua.”—Maranda.
“Kua ni cudru totolo ke cala mada ga na rai nei luvemu.”—Anthony.
IVAKAVUVULI VAKAIVOLATABU: “Moni dau vakarorogo vinaka.”—Luke 8:18.
Vakasamataka vinaka na gauna veiganiti ni veivosaki. Ena so na gauna ena rawarawa cake vei ira na gone mera veivosaki kei ira na nodra itubutubu nira sega ni veiraimata.
“Keitou dau veitalanoa ena gauna keitou vodo motoka kina. E rawarawa na veivosaki ni keitou dabe veitikivi, ni sega na veiraimata.”—Nicole.
E gauna vinaka tale ga ni veivosaki na gauna ni kana.
“Na gauna ni vakayakavi e dau gauna vinaka me keitou talaucaka kina na veika keitou dui sotava ena dua na siga, se mani vinaka se ca. E vakaduavatataki keitou na veivosaki va qori, keitou vakadeitaka tale ga kina ni keitou na veivukei ena gauna e sotavi kina na leqa.”—Robin.
IVAKAVUVULI VAKAIVOLATABU: ‘Mo totolo ni vakarorogo, qai berabera ni vosa.’—Jemesa 1:19.
Rawa ni o Wilika Tale ga
NA VALE NI VAKATAWA
Kua ni Veiba ni o Vosa Vei Luvemu iTabagone
Se vulica tiko o luvemu na ivakatagedegede ena kilai tani kina, ena vinakata tale ga me vakaraitaka na nona nanuma. O na vukei koya vakacava?
IVAKAVUVULI VAKAIVOLATABU
iVakasala Vei Ira na iTabagone
Raica se yaga vakacava na ivakasala ena iVolatabu ena dredre era vakila na itabagone.
