NI BERA ni vakadewataki na ivola era tabaka na iVakadinadina i Jiova, ena vakarautaki vinaka mada, caka rawa na vakadidike sa qai volai. E dau raica na Tabana ni Volavola ena itikotiko liu mai Niu Yoka me donu na ka e volai, me vakayagataki tale ga na vosa ni veisiga. *

Ni oti qori, ena vakauta na Tabana ni Volavola na lewe ni ulutaga ina vica vata na drau na timi ni vakadewa e veiyasa i vuravura. E levu vei ira qori era vakaitikotiko sara ga ena vanua e vosataki kina na vosa era vakadewa kina. Levu era vakadewa ga ena nodra vosa ni sucu. E bibi mera kila vinaka na vosa vakavalagi kei na vosa era vakadewa kina.

Era vakayacora vakacava na dauvakadewa nodra cakacaka?

E kaya o Geraint e dua na dauvakadewa e vakaitikotiko mai Igiladi: “Au lewena e dua na timi ni vakadewa, e bibi gona na veitokoni. Ni dredre me vakadewataki eso na ka, keimami na veivosakitaka na kena iwali. Keimami sega ni kauai ga ena vosa yadua ia na iyatuvosa taucoko. Keimami dau vakasamataka vakavinaka na ibalebale ni vosa e vakayagataki kei na kena inaki me rawa nira taura rawa na dauwiliwili na ka e vakadewataki.”

Na cava na inaki ni vakadewa?

“Me kua ni kilai ni vakadewataki  e dua na ulutaga, me nanumi ga ni a vakarautaki sara ga ena dua na vosanivanua. Keimami na saga gona me biu na vosa e rogo matau. Qori era na taleitaka kina na dauwiliwili, ra marautaka tale ga me vaka ga era kania tiko e dua na kakana vakatitiweli.”

E yaga vakacava nodra tiko na dauvakadewa ena vanua e vosataki kina na vosa era vakadewa kina?

“Ni keimami dau veimaliwai kei ira na lewenivanua, keimami kila kina na vosa era vakayagataka. Kena ivakaraitaki, e levu era vosa ga vakaWelesi e veisiga ena vanua qo. Keimami dau vakayagataka kina eso na vosa se ivosavosa ena neimami veivosaki kei ira na lewenivanua, me rawa ni kilai ke rogo matau vei ira, kilai rawarawa, qai veiuqeti. Ena vukei keimami qori me vakadewataki donu na vakasama.”

E tuvanaki vakacava na nodra cakacaka na dauvakadewa?

“E dui lesi ina timi yadua na itavi me qarava. Na imatai ni ka eratou na cakava na lewe ni timi, eratou na wilika na ulutaga vakavalagi me ratou kila kina na ivakarau ni yalo e vakavotui, na ituvatuva ni vosa, e baleti cei tale ga na ulutaga. Ratou na via kila, ‘Na cava na inaki kei na usutu ni ulutaga qo? Na cava e vakabibitaki kina?’ Qori ena veivuke ena neimami vakadewataka vinaka e dua na ulutaga.

“Oti ena veivosakitaka qai soli vakasama kina na lewe ni timi. Vakacava sa matata na lewe ni ulutaga? Ena vakadewataki vakacava? Gauna e wiliki kina na ka e vakadewataki, e bibi me vakila na dauwiliwili na ivakarau ni yalo vata ga e tiko ena vakavalagi.”

Na cava e okati ena nodratou itavi na lewe ni timi?

“E vinakati mera taura rawa na dauwiliwili na ka e vakadewataki ena gauna ga era wilika kina. Qori na vuna e dau wiliki kina vakadomoilevu na ka e vakadewataki me rawa ni kilai ke sa matata.

“Ni taipataka e dua na parakaravu o dauvakadewa, keitou na raica kece tiko na kompiuta. Keitou na raica vinaka me kua ni lutu se vakuri na vakasama. Keitou na raica tale ga me rogo matau, donu na kena ivolavolai, donu tale ga na vosa e biu. Dua vei keitou ena qai wilika vakadomoilevu na parakaravu. Ke tao nona wiliwili, keitou na saga me keitou kila na vuna. Ni sa vakadewataki na ulutaga taucoko, ena wiliki tale  vakadomoilevu qai laurai ke tiko eso tale na ka me vakavinakataki.”

Sa dua dina na cakacaka levu!

“Io! E dau vakilai sara ga na wawale ni oti e dua na siga ni cakacaka. Oya na vuna keitou na vakacegu vinaka kina, qai dikeva tale na vakadewa ena mataka e tarava. Oti e vica na macawa, ena vakauta mai na Tabana ni Volavola eso na veisau me caka. Sa na qai wiliki tale vakadomoilevu na ka e vakadewataki, me keitou vakadeitaka ni sa donu qai kilai rawarawa.”

Na porokaramu cava ni kompiuta e vakayagataki?

“Na kompiuta e sega ni rawa ni vakadewa. Ia e vakarautaka na iVakadinadina i Jiova na porokaramu ni kompiuta me vakarawarawataka neimami cakacaka. Kena ivakaraitaki, e tiko e dua na ivolavosa era tu kina na vosa kei na matavosa e dau vakayagataki vakalevu. Dua tale na porokaramu e rawa ni keimami raica kina na veika sa vakadewataki oti, kei na sala e wali kina eso na leqa e sotavi.”

Oni raica vakacava nomuni cakacaka?

“Keimami raica me iloloma vei ira na lewenivanua. Keimami solia gona na neimami vinaka kece me rawa nira taleitaka na dauwiliwili na ka era wilika, ra vakila tale ga na kena yaga. Keimami dau marau ni tara na lomadra na dauwiliwili na ulutaga ena mekesini se  na website, ra qai cakava sara na veiveisau ena nodra bula.”

Era sa vakila e vica vata na drau na milioni e veiyasa i vuravura, na yaga ni nodra wilika ena nodra vosa na ivola era tabaka na iVakadinadina i Jiova. Na ivakasala vuku ena ivola, vidio, kei na website na jw.org, e yavutaki ena iVolatabu. E vakamatatataka ena iVolatabu na Kalou o Jiova ni vinakata mera rogoca na nona itukutuku “na veimatanitu, na veiyavusa, na duivosavosa.”—Vakatakila 14:6. *