Ke da dau kauaitaka vakasivia na ka eda duidui kina vei ira eso tale, eda na lai nanuma kina ni cala na ka era duidui kina. Qori ena vakavuna noda beci ira. Na rai va qori ena tarova na noda veikauaitaki. Nida sega ni veikauaitaki, qori e vakaraitaka ni sa tiko vei keda na veivakaduiduitaki.

“Marau vata kei ira era marau, tagi vata kei ira era tagi.” —ROMA 12:15.

Kena ibalebale: E rawa ni umani ga ena rua na vosa na ivakavuvuli vakaivolatabu ya, meda veikauaitaki. Nida cakava qori, eda na saga meda biuti keda ena kena ituvaki e dua tale, oya meda kila na nona rai kei na ivakarau ni lomana.

Nida kauaitaka e dua, eda kila ni tiko na ka eda tautauvata kina me vaka na ka eda dau cakava kei na ivakarau ni noda rai. Na veikauaitaki ena vukei keda meda kila ni se vakacava noda isususu, eda vu ga mai ena dua na vuvale. Nida nanuma tiko qori da qai kauaitaka na ka eda tautauvata kina, eda na sega ni dauvakalelewa.

Nida dauveikauaitaki, eda na veidokai. E vakadinadinataka qori o Anne-Marie, mai Senegal. E dau beca tu e dua na matatamata, era dau raici tu mera lolovira. Ia e veisautaka vakacava na nona rai na veikauaitaki? E kaya: “Niu raica na veika dredre era sotava tiko, au dau taroga se cava au na cakava keu tu ena kedra ituvaki. Au qai liaca niu tautauvata ga kei ira, e sega sara ga ni dua na ka e vakavuna noqu uasivi ira.” Io, ke da kila na ka dredre e sotava tale tiko e dua, eda na veikauaitaki ga, sega ni veivakalewai.

Saga mo raica na ka o tautauvata kina kei na ilawalawa tamata o dau raicalataka. Kena ivakaraitaki, raitayaloyalotaka mada na ka era vakila nira

• kana vata vakavuvale

• cakacaka oti ena dua na siga

• veimaliwai kei na nodra itokani

• rogoca nodra sere taleitaki

Oti qori, saga mo biuti iko ena kedra ituvaki. Mo taroga:

• ‘Na cava au na cakava ke dua e beci au?’

• ‘Ena vakacava na noqu rai ke dua e vakalewai au ni se bera mada ga ni kilai au vinaka?’

• ‘Keu lewe ni matatamata ya, na cava au na namaka mera cakava vei au eso tale?’