Vakacava e bulia na Kalou na lomalagi kei na vuravura, se basika ga mai vakacalaka? E duidui sara na ka rau kaya na saenitisi qori kei na ka e kaya na iVolatabu. Eso era vakabauta na ka rau kaya na saenitisi, eso tale era vakabauta na ka e kaya na iVolatabu. Ia eso era sega tu ni vakadeitaka na ka mera vakabauta. Sa qai dau ka ni veivosaki tu qori ena ivola, se so na porokaramu ena tivi.

De dua era dau vakabibitaka nomu qasenivuli ni basika mai vakacalaka na lomalagi, vuravura kei na veika bula e tu kina, ni sega ni dua e buli ira. Vakacava era tukuna eso na ivakadinadina ni sega ni bula tiko na Dauveibuli? Rairai o sa rogoca tale ga nodra vunautaka eso na italatala ni bula tiko na Dauveibuli. Ia vakacava era vakamacalataka eso na ivakadinadina, se, ra tukuna mo vakabauta ga ni ivakavuvuli ni lotu?

De dua o dau via kila tu na isaunitaro qori, o rairai nanuma tale ga ni sega ni dua ena vakamacalataka rawa vei iko ni tiko na Dauveibuli. Vakacava e bibi mo kila na isau ni nomu lomatarotaro?

Ena vakamacalataki ena Yadra! qo, eso na ivakadinadina era vakadeitaka kina e levu ni tiko na Dauveibuli. Ena vakamacalataka tale ga na vuna mo kauaitaka kina na isaunitaro me baleta na itekitekivu ni bula.