Veika Era Sega tu ni Kila na Saenitisi

SARAVA/ROGOCA

Era sa vulica na saenitisi e levu na ka me baleta na lomalagi kei na vuravura. Ia era se sega ni sauma rawa e levu na taro bibi.

Vakacava era vakamacalataka rawa na saenitisi e vu mai vakacava na lomalagi, vuravura kei na veika bula? E sega. Eso era nanuma ni rawa nira vakamacalataka qori o ira na dau dikeva na lomalagi. Ia e duatani na ka e kaya o Marcelo Gleiser e dua na parofesa ni maliwalala e Dartmouth College, e dau vakatitiqataka ni bula tiko na Kalou. E kaya: “E se sega tiko ni kilai e levu na ka me baleta na itekitekivu ni lomalagi kei na vuravura.”

Qori tale ga na ka e vakamacalataki ena mekesini na Science News me baleta na itekitekivu ni bula: “E se bera ni kilai e levu na ka me baleta na itekitekivu ni bula e vuravura. Sa yali makawa tale ga e levu na vatu, kei na so na ivakadinadina (fossils) me kilai kina qori.” Eda kila kina nira se sega ga ni kila na saenitisi na itekitekivu ni lomalagi, vuravura kei na veika bula.

De dua o na taroga, ‘Ke buli na veika bula, o cei gona e bulia?’ O na rairai taroga tale ga e vica na taro qo: ‘Ke tiko e dua na Dauveibuli e vuku qai dauloloma, cava e vakalaiva tiko kina meda rarawa? Cava e levu kina na lotu qai duidui na ka era vakabauta? Cava e vakalaiva kina na Kalou mera cakava e levu na ka ca o ira na qaravi koya?’

E sega ni sauma rawa na taro qori na veika vakasaenisi. Ia sega ni kena ibalebale ni dredre mo kila na kena isau. Levu sa vakacegui ira na kena isau mai na iVolatabu.

Rai ena jw.org ke o via kila na ka era kaya eso na saenitisi era sa mai vakabauta ni tiko na Dauveibuli. Taipataka na “rai me baleta na itekitekivu ni bula.”

E uqeti rau na veika vakasaenisi kei na iVolatabu

Georgiy N. Koidan, dauvakadidike

“Au dau wakia e vica vata na wainimate somidi e vakatokai na molecule. E vaka ga na qito chess, ena vinakati meu tuvana rawa tu na veitaravi ni ka meu cakava. Keu calata e dua na ikalawa, ena sega ni rawa na noqu sasaga. E vereverea dina na kena icakacaka. Ia e vereverea sara na sala era cakacaka vata kina e vica vata na udolu na wainimate somidi ena sela ni veika bula. Qori e uqeti au meu vakabauta ni bula tiko na Kalou. E kila vinaka tale ga na kena veika matailalai ni vakatauvatani kei keda.”

“Gauna au vulica kina na iVolatabu, au raica ni duatani duadua na ivola qo. Dina ni volai ena 2,000 na yabaki sa oti, ia se yaga tiko nikua na kena ivakasala. Ya meda veiyaloni ena vuvale, e vanua ni cakacaka kei ira eda tiko veitikivi. Au vakadeitaka kina ni kena ivakasala e vakarautaka e dua e vuku cake sara vei keda.”

Yan-Der Hsuuw, dau dikeva nodra kunekunetaki na gone

“Ni se qai kunekunetaki na gone e ketei tinana, ena vinakati mera cakacaka vata na sela me buli kina na nave, masela, sui, dra, kei na so tale na tikiniyago me buli kina na gone. E sega ni matata tiko na sala era buli kina na sela me lai dua na gone. Qori e uqeti au meu vakabauta ni tiko e dua na Dauveibuli vuku e vakavuna na bula.

“Na veika e tukuni ena Same 139:15, 16, me baleta na kunekunetaki ni gone, e via tautauvata kei na veika era sa qai kila wale tiko ga qo na saenitisi. Dina ni se volai makawa sara na tikinivolatabu qori, ia e donu vinaka. Ena rawa ga qori ke uqeta na kena volai na Dauveibuli!”