De dua o na nanuma mo cakava kece ga ena dua na gauna na veiveisau e gadrevi ena nomu bula. O na rairai kaya, ‘Au sa na sega ni vakatavako, vosavosa ca se yadra sivia ena macawa qo. Au na vakaukauayago, lewa vinaka na ka au kania, au na qiriti rau tale ga o tutu kei bubu.’ O na sega ni rawata e dua na ka ke o sasagataka kece ga ena dua na gauna na nomu isausau!

O koya e yalomalumalumu e sega ni dau namaka vakasivia na ka. Ni kila e vakaiyalayala na nona gauna, igu, kei na iyau, ena cakava vakalalai na veiveisau e gadrevi ena nona bula. Ena sega ni saga me cakava kece ga ena dua na gauna.

Wasewasea na ka mo cakacaka kina. Qo eso na vakatutu yaga:

1. Ena rawarawa na nomu sasaga ke o sosomitaka e dua na itovo ca ena dua na itovo vinaka. Kaya mada e tiko ena nomu lisi ni itovo ca na sara tivi vakasivia qai tiko ena lisi ni itovo vinaka na veitaratara kei ira na wekamu se itokani. O rawa ni sosomitaka na sara tivi ena nomu qirita e dua na nomu itokani se wekamu.

2. Cakava e rua na lisi, dua me lisi ni ka o via cakava vinaka sara kei na dua tale me lisi ni itovo o via muduka se valuta. Kua ni vola ga e vica na ka, vola na ka kece o rawa ni vakasamataka me biu ena lisi ruarua.

3. Tuvana na veika o sa vola ena nomu lisi, me tekivu sara ga mai na kena o via cakacaka kina e liu.

Digia e vica na itovo, ke mani yadua se yarua mada ga mai na lisi ruarua. Sasagataka e liu na itovo qori. Oti qai digia e dua se rua tale na itovo mo cakacaka kina.