Vakatubuqoroqoro na Dre ni Waicevata
SA BALAVU na kena vakabauti tu nira dau vukaca na dre ni waicevata e rauta na 35,200 na kilomita, mai na vualiku ni noda vuravura ina ceva, oti ra lesu tale ina vualiku. Ia e laurai ena dua na vakadidike se qai caka ga qo ni rawa ni yawa sara na vanua era vukaca.
Laurai toka ena itaba ni veiveisau na iwalewale ni nona vuka na dre ni waicevata
A biu ena so na dre ni waicevata na misini lailai e vakatokai na geolocator. Na misini qori e mamada cake mai na isogo ni peni. E vakatubuqoroqoro ni vakaraitaka na misini ni so na dre ni waicevata era vukaca e rauta na 90,000 na kilomita. Dua e vukaca sara volekata na 96,000 na kilomita! Ni vakatauvatani kei na manumanuvuka tale eso, e yawa duadua na vanua e vukaca na dre ni waicevata. Na cava e dikevi tale kina na yawa ni vanua e vukaca?
Se mani vanua cava era gole kina, era sega ni dau vuka vakadodonu e kea na dre ni waicevata. Me vaka e laurai toka ena itaba, na iwalewale ni nodra vuka e vaka na ibulibuli ni matanivola na S. Na vuna? Era dau vakamuria na dre ni waicevata na matanicagi.
E rawa ni bula na dre ni waicevata me 30 na yabaki, qai sivia na 2.4 na milioni na kilomita na yawa ni vanua e vukaca ena nona gauna ni bula. Qori e tautauvata kei na nona lako vakatolu se vakava e dua ina vula! E kaya e dua na dauvakadidike: “E bowiri noda vakasama ena yawa ni vanua e vukaca na manumanuvuka e sivia toka ga na 100 na karamu na kena bi.” E dau donuya ruarua tale ga na vulaikatakata ni vualiku kei na ceva na dre ni waicevata. Sa rauta me kaya na ivola na Life on Earth: A Natural History, ni raica “vakalevu cake na rarama e veiyabaki na dre ni waicevata ni vakatauvatani kei na manumanu tale eso.”
