Dua na gauna dredre vei ira na itubutubu nira dau biubiu mai vale na gone ena gauna era sa uabula kina. E vaka me rau sa sega tale ni veikilai na itubutubu nira sa yali kece na gone. E kaya o M. Gary Neuman e dau veivakasalataki ena bula vakavuvale: “Era dau mai kere ivakasala vei au e levu nira sega ni kila mera veivolekati tale vakacava kei na kedra isa. Era sega ni dau veitalanoa vakalevu na [itubutubu] nira sa biubiu kece mai vale na gone.” *

Ke yaco tiko ena nomu bula vakawati e dua na leqa va qori, e rawa ni wali. Dikeva mada e liu eso na ka e rawa ni vakavuna mo drau veiyawaki vakaveiwatini.

Vakayabaki nodra vakaliuci tu na gone. A rairai vinaka na inaki ni nodra vakaliuca na itubutubu na veika era vinakata na luvedra, sega ni ka e vinakata o kedra isa. Ia era sega kina ni veivolekati vakaveiwatini nira vakaogai ira ga ena nodra itavi vakatama se vakatina. E dau qai laurai levu nodra sega ni veivolekati nira sa yali kece mai vale na gone. E kaya e dua na marama vakawati e yabaki 59: “Keitou dau cakava vata na ka ni ratou se tiko e vale na gone, ia ni ratou sa biubiu keirau sa dui caka neirau ga.” E kaya mada ga vei watina ena dua na gauna: “Sa votivoti na tiko taurua va qo.”

Eso na veiwatini era sega ni kila mera vakamatauni ira vakacava ina nodra ivakarau vou ni bula. E kaya na ivola na Empty Nesting: “Levu na veiwatini e vaka ga era se qai veiwatini vou.” Nira sega ni rawa ni cakava vata e levu na ka, era sa dui cakava ga na ka era vinakata. Era sega ni vaka na veiwatini, era vaka e rua erau rede vata wale tu ga.

Na cava mo cakava me kua ni yaco kina na leqa qori, me marautaki tale ga na bula nira sa biubiu mai vale na gone? Meda dikeva mada na sala ena veivuke kina na iVolatabu.

Ciqoma na veisau. E kaya na iVolatabu me baleti ira na gone nira sa uabula: “Ena biuti tamana . . . kei tinana o tagane.” (Vakatekivu 2:24) Kena ibalebale nomu itavi vakaitubutubu vei ira na luvemu nira se gone, oya mo vakavulici ira qai vakarautaki ira ena nodra bula ena veigauna se bera mai. Ke va qori na nomu rai, o na sega ni rarawataka vakalevu nodra biubiu mai vale na luvemu.—iVakavuvuli vakaivolatabu: Marika 10:7.

O na tamadra se tinadra tiko ga na luvemu. Ia e nomu itavi ga na veivakasalataki, o sa na sega ni lewai ira. Nomu itavi vou qori ena levu kina nomu gauna vei watimu, o se rawa tale ga ni veivolekati kei luvemu. *—iVakavuvuli vakaivolatabu: Maciu 19:6.

Talaucaka na lomamu. Veivosakitaka kei watimu na ka o vakila ni sa veisau na kemudrau ituvaki, tu vakarau mo rogoca tale ga nona rai. Mo vosovoso qai dau veinanumi. Ena vinakati na sasaga me qaqaco kina na kemudrau ivau vakaveiwatini, ia drau na tauca na vua ni nomudrau sasaga.—iVakavuvuli vakaivolatabu: 1 Korinica 13:4.

Vakasamataka eso na ka vovou mo drau cakava vata. Veitalanoataka na isausau drau na via sauva vata, se so tale na ka drau na taleitaka mo drau cakava vata. Levu sara na ka drau sa vulica mai na nomudrau susu gone. Vakacava mo drau wasea qori vei ira eso tale?—iVakavuvuli vakaivolatabu: Jope 12:12.

Vaqaqacotaka tale nomudrau veidinadinati. Vakasamataka lesu na itovo o taleitaki koya kina na kemu isa, na veika marautaki e yaco ena nomudrau bula vakaveiwatini, kei na leqa drau walia vata. De dua drau na liaca kina ni na yaga vei kemudrau vakaveiwatini na nodra biubiu mai vale na gone. Ke drau veitokonitaka nomudrau sasaga, drau na vakavinakataka nomudrau vakawati, ena qaqaco tale ga na kemudrau ivau vakaveiwatini.