E kaya o tagane: “Na gauna keirau vakawati kina, e duidui sara na neirau rai vakaveiwatini me baleta na veidokai. Sega ni kena ibalebale ni donu se cala e dua vei keirau, e duidui ga neirau nanuma. Au nanuma ni dodonu me veidokai vakalevu o watiqu ena nona ivakarau ni vosa vei au.”

E kaya o yalewa: “Ena vanua au susu kina e dau kena ivakarau me keimami veivosaki i cake, lakovata kei na neimami vosa na irairai ni mata i keimami, qai curu takoso ni vosa tiko e dua. E sega ni raici qori me veibeci, ia e veicalati kei na isususu i watiqu.”

Na veidokai e sega ni dodonu me vakaraitaki ga vagauna, ia me vakaraitaki e veigauna ena bula vakawati. O na vakaraitaka vakacava ni o dokai kemu isa?

Era vinakata na veidokai. E kaya na iVolatabu me baleti ira na tagane vakawati: “O kemuni na tagane moni lomana tale ga na dui watimuni me vaka ga nomuni lomani kemuni, ia na yalewa me dokai watina vakalevu.” (Efeso 5:33) Rau vinakata ruarua na veiwatini na loloma kei na veidokai, vakabibi o tagane. E kaya o Kala * e dua na tagane vakawati: “Era vinakata na tagane vakawati mera nuitaki ena vakatulewa era cakava, ena nodra walia na leqa, kei na nodra karona na vuvale.” Ena yaga vei rau ruarua na veiwatini na nona veidokai o yalewa. E kaya e dua na yalewa vakawati o Koini: “E dau lomani au vakalevu o watiqu ni raica niu dokai koya.”

Era vinakata tale ga na yalewa vakawati mera dokai. E sega ni kurabuitaki qori ni na rawa ga ni lomani watina dina o tagane ke dokai koya. E kaya o Taniela: “E bibi meu doka na rai se vakatutu i watiqu. Meu kauaitaka tale ga na ka e tu e lomana. Keu sega mada ga ni taura rawa na vuna e duatani kina nona rai ena so na gauna, se bibi ga meu kauaitaka na nona rai.”

Ena duidui ga na rai ena so na gauna. O rawa ni nanuma ni o sa vakaraitaka tiko na veidokai, ia vakacava e nanuma tale ga o watimu ni o dau dokai koya? Qori na ka e vakadinata na yalewa vakawati e vakamacalataki ena itekitekivu ni ulutaga, e kaya: “Ke sega mada ga ni veibeci na ka au cakava, ia e nanuma o watiqu ni sega ni ivakaraitaki ni veidokai, o yau ga e dodonu meu veisau.”

• Vola e tolu na ka o taleitaka me baleti watimu. Na veika qori e rawa sara ga ni yavu ni nomu dokai koya.

• Vakaraica ena loma ni dua na macawa na nomu itovo vei watimu ena vica na tikina qo.

Na ka o tukuna. E laurai ena dua na vakadidike me baleti ira na veiwatini “e mamarau qai dei nodra bula vakawati, ni gauna era veivosakitaka kina na leqa era cavuta ga vakalevu na veika vinaka me baleti kedra isa. Ia o ira na veiwatini era vinakata na veisere e sega sara ga ni dua na ka vinaka era kaya.” *—iVakavuvuli vakaivolatabu: Vosa Vakaibalebale 12:18.

E vinaka mo taroga: ‘E dau veidokai noqu vosa vei watiqu? Au dau vakalelewa se dau vakavinavinaka ena levu na gauna? E vakacava na itautau ni noqu vosa niu vakaraitaka e dua na ka au kauai kina?’ Vakacava ena duavata o watimu ena nomu isaunitaro?— iVakavuvuli vakaivolatabu: Kolosa 3:13.

Tovolea qo: Saga mo tukuna vei watimu e dua mada ga na ka vinaka ena loma ni dua na siga. Vakatutu: Vakasamataka na itovo vinaka o sa vola oti toka me baleti koya. Vakamatauna mo dau tukuna vua na kemu isa na ka o taleitaka me baleti koya.—iVakavuvuli vakaivolatabu: 1 Korinica 8:1.

Na ka o cakava. E kaya e dua na yalewa vakawati o Alisi: “Au dau ogaoga vakalevu ena cakacaka ni vale, ia dua na ka noqu marau niu raici watiqu ni dau biuta vinaka na nona iyaya se savata ga na nona iyayanikana. E vakaraitaka qori ni dokai au, e sega tale ga ni ka wale na veika au sasagataka ena neirau bula vakawati.”

E vinaka mo taroga: ‘Au dau vakaraitaka ena ka au cakava vei watiqu niu dokai koya? Au dau kauaitaki koya qai solia vakalevu vua na noqu gauna?’ Vakacava ena duavata o watimu ena nomu isaunitaro?

Tovolea qo: Vola e tolu na sala o vinakata me vakaraitaki kina vei iko na veidokai. Me cakava tale ga qori o watimu. Vakaraitaka vei kemu isa na ka o vola, me vakaraitaka tale ga vei iko o koya na ka e vola, drau qai saga sara mo drau cakava na veiveisau e gadrevi. Ke o vakaliuliu ni dokai watimu, ena cakava tale ga qori o koya.