Guds vilji er, at tú skalt læra hann at kenna, fáa tætt samband við hann og síðani elska hann og tæna honum av øllum hjarta. (Matteus 22:37, 38; Jákupsbrævið 4:8) Við at lesa um Jesu lív og læru finnur tú út av, hvussu tú kanst gera Guds vilja. (Jóhannes 7:16, 17) Jesus tosaði ikki bara um Guds vilja – hann gjørdi Guds vilja. Jesus segði, hvør meiningin við hansara lívi var: „Eg eri komin ... ikki at gera vilja Mín, men vilja Hansara, sum sendi Meg.“ – Jóhannes 6:38.

Noyðist eg at fáa eitt serligt tekin ella eina opinbering frá Gudi fyri at fáa at vita, hvat hansara vilji er við mær?

 Nei, tí Guds boðskapur til menniskjuni stendur í Bíbliuni. Har stendur alt, sum tú hevur brúk fyri, so tú kanst gerast ’førur fyri at gera alt gott verk’. (2. Timoteusarbræv 3:16, 17) Gud vil, at tú saman við Bíbliuni skalt brúka títt vit og skil fyri at vita, hvat hansara vilji er við tær. – Rómbrævið 12:1, 2; Efesusbrævið 5:17.

Ber tað til hjá mær at gera Guds vilja?

 Ja, tað ber til, tí Bíblian sigur: „Boð [Guds] eru ikki tung.“ (1. Jóhannesarbræv 5:3) Tað merkir ikki, at tað altíð er lætt at fylgja Guds boðum. Men tað er avgjørt stríðið vert. Jesus segði: „Sæl eru tey, sum hoyra orð Guds og goyma tað!“ – Lukas 11:28.