Hevur tú ein vin, sum tú hámetir og virðir, roynir tú at vera sum hann. „Góður og sannhjartaður er [Jehova],“ sigur Bíblian. (Sálmur 25:8) Skulu vit vera vinir Guds, mugu vit vera góð og sannhjartað. Bíblian sigur: „Verðið tí eftirfylgjarar Guds sum elskað børn, og livið í kærleika.“ (Efesusbrævið 5:1, 2) Vit kunnu til dømis gera hetta:

Vera beinasom. „Latið okkum tí, eftir sum okkum ber til, gera øllum gott.“ — Galatiabrævið 6:10.

Vera arbeiðssom. „Tann, ið stolið hevur, stjali ikki longur, men arbeiði heldur og geri við hondum sínum tað, sum gott er.“ — Efesusbrævið 4:28.

Vera rein, bæði kropsliga og siðiliga. „Latið okkum reinsa okkum frá øllum, ið ger okkum órein — á holdi og á anda — og soleiðis fullføra heilaggering í gudsótta.“ — 2 Korint 7:1.

 Vera góð við familju okkara og virða hana. „Tó skal eisini ein og hvør tykkara elska konu sína sum seg sjálvan. Og konan skal vísa manninum virðing. Tit børn! Aktið foreldur tykkara.“ — Efesusbrævið 5:33–6:1.

Vera góð við onnur. „Latið okkum elska hvørt annað! Tí kærleikin er av Gudi.“ — 1 Jóhannes 4:7.

Akta landsins lógir. „Hvørt menniskja veri teimum yvirvøldum lýðið, sum yvir tí eru! . . . Gjaldið øllum tað, ið tit skylda — honum skatt, sum skatt skal hava.“ — Rómbrævið 13:1, 7.