Danielle e nyí Kúnnuɖetɔ́ Jehovah tɔn ɖé ɖò Afrique du Sud é mɔ sáki e nǔxɔtɔ́ ɖé wɔn jó dó nyi kaféenutɛn ɖé é. Akwɛkpo e mɛ akwɛ kpo káti akwɛsɛxwetɛn tɔn lɛ kpo ɖè é ɖò sáki ɔ mɛ. Ðó Danielle kánɖeji bo na sɔ́ sáki ɔ jó nú mɛ e tɔn wɛ é wutu ɔ, é ba adlɛsi tɔn alǒ animɛlóo tɔn, loɔ, nyikɔ tɔn kɛɖɛ wɛ é ka mɔ. É yì dawé ɔ sín akwɛsɛxwetɛn, bo tɛ́n kpɔ́n bá yí animɛlóo tɔn có, é ka kpa ɛ ǎ. É ɖò mɔ̌ có, Danielle jó gbè ǎ. Enɛ wu ɔ, é ylɔ́ animɛlóo dotóoxwé e dawé ɔ nɔ yì é tɔn e é mɔ ɖò sáki ɔ mɛ é. Nawe e yí apɛ́lu ɔ é yí gbè ɖɔ emi na sɛ́ animɛlóo Danielle tɔn dó dawé ɔ.

É kpaca dawé ɔ ɖɔ dotóoxwé ɔ ylɔ́ ɛ, bo ɖɔ n’i ɖɔ Danielle mɔ sáki tɔn bo jló na sɔ́ n’i. Ee é wá sáki ɔ yí gbé é ɔ, Danielle kpo tɔ́ tɔn kpo yí i ganji. Ye zán ali e hun nú ye é dó tinmɛ nǔ e wu ye tɛ́n kpɔ́n kaka bo mɔ ɛ é n’i. Ye tinmɛ n’i ɖɔ, ɖó ye nyí Kúnnuɖetɔ́ Jehovah tɔn lɛ wutu ɔ, ye nɔ tɛ́n kpɔ́n bo nɔ zán gbɛ̀ sɔgbe xá nǔgbododó Biblu tɔn lɛ. Enɛ wu wɛ nǔgboɖiɖɔ hwebǐnu nɔ ɖu ayi mɛ nú ye sɔmɔ̌.—Eblée lɛ 13:18.

Ganxixo yɔywɛ ɖé gudo ɔ, dawé ɔ wlan nǔ sɛ́dó Danielle kpo tɔ́ tɔn kpo bo lɛ́ vɔ́ kú dó nú ye nú sáki tɔn kpo akwɛkpo tɔn kpo e ye mɔ, bo sɔ́ n’i é. É wlan ɖɔ: “Un dókú nú mi tawun nú tɛ́n e mi tɛ́n kpɔ́n kaka bo mɔ mì é. Mi kpo xwédo mitɔn kpo e un mɔ é víví nú mì tawun; un na wɔn xomɛnyínyɔ́ mitɔn kpo lee mi dó xɔ́ntɔn mì gbɔn é kpo gbeɖé ǎ. É jló mì ɖɔ má na nǔnina ɖé mi dó ɖè lee é sù nukún ce mɛ gbɔn é xlɛ́. Un tuùn ɖɔ mi nɔ sɔ́ nǔɖe lɛ dó savɔ̌ bá mɔ tɛn dó wà nǔ e Mawu byɔ ɖò mi sí lɛ é. Walɔ mitɔn lɛ xlɛ́ ɖɔ gbɛtɔ́ jɔ gbɛtɔ́ wɛ nú mi, lee nǔgboɖiɖɔ Danielle tɔn kpo gbeji e é nɔ é kpo xlɛ́ gbɔn é. Enɛ wu ɔ, é na lɛ́ cɛ́ nú mi, Mawu ni kɔn nyɔna tɔn dó sinsɛnzɔ́ mitɔn jí.”

Sun ɖé lɛ gudo ɔ, Danielle sín tɔ́ lɛ́ xò gò dawé ɔ, bɔ dawé ɔ tinmɛ n’i ɖɔ agaɖanu dìn ɔ, emi ɖò axi xwlé wɛ bo mɔ sáki kpɛví ɖé sɔ́ ɖò kɔ́mɛ. Hwenu e é mɔ nawe e sín sáki wɛ é bo sɔ́ jó n’i é ɔ, é tinmɛ nǔ e sísɛ́ ɛ bɔ é wà mɔ̌ é n’i. É ɖɔ n’i ɖɔ agaɖanu dìn ɔ, emi ɖu lè nǔgboɖiɖɔ-núwiwa mɔhun tɔn. É ɖɔ: “Nǔgboɖiɖɔ kpo xomɛnyínyɔ́ kpo núwiwa ɖé nɔ dɔn ɖevo wá, bo nɔ zɔ́n bɔ gbɛ̀ ninɔ nɔ kpɔ́n te nú gbɛtɔ́ lɛ.”