Biblu ɖɔ dó Jezu wu ɖɔ: “Ðò agbaza sín alixo ɔ, è hu i; loɔ, ɖò [Gbigbɔ] ɔ sín alixo ɔ, è fɔ́n ɛ wá gbɛ̀.”—1 Piyɛ́ɛ 3:18; Mɛsɛ́dó 13:34; 1 Kɔlɛntinu lɛ 15:45; 2 Kɔlɛntinu lɛ 5:16.

 Xógbe Jezu ɖesunɔ tɔn lɛ xlɛ́ ɖɔ é kún na fɔ́n sín kú dó gbɛtɔ́ gbaza mɛ ó. É ɖɔ ɖɔ emi na sɔ́ ‘agbaza emitɔn sɔ́ jó dó gbɛtɔ́ lɛ tamɛ’ dó xɔ gbɛ̀ nú ye. (Jaan 6:51; Matie 20:28) Enyi é ko fɔ́n sín kú dó gbɛtɔ́ gbaza mɛ wɛ ɔ, enɛ xlɛ́ ɖɔ vɔsisa gbɛxɔnúmɛ tɔn ɔ, è dɔn nǔ gbɔn jí. Amɔ̌, nǔ sixu nyí mɔ̌ ǎ, ɖó Biblu ɖɔ ɖɔ “azɔn ɖokpo géé” wɛ Klisu sɔ́ gbɛ̀ tɔn dó savɔ̌ “bɔ xó fó.”—Eblée lɛ 9:11, 12.

Enyi Jezu fɔ́n sín kú dó agbaza gbigbɔ tɔn mɛ ɔ, nɛ̌ ahwanvu tɔn lɛ ka sixu mɔ ɛ gbɔn?

•  Nǔɖiɖó gbigbɔ tɔn lɛ sixu sɔ́ gbɛtɔ́ gbaza dó. Ði kpɔ́ndéwú ɔ, wɛnsagun e wà mɔ̌ ɖò hwexónu lɛ é tlɛ ɖu nǔ, bo lɛ́ nu ahan xá gbɛtɔ́ lɛ. (Bǐbɛ̌mɛ 18:1-8; 19:1-3) É ɖò mɔ̌ có, ye lɛ́ kpò ɖò nǔɖiɖó gbigbɔ tɔn nyí wɛ, bo sixu gosin gbɛtɔ́ gbaza mɛ.—Hwɛɖɔtɔ́ 13:15-21.

•  Jezu ɖesu sɔ́ gbɛtɔ́ gbaza dó nú táan ɖé ɖò fínfɔ́n sín kú tɔn gudo, lee wɛnsagun ɖé lɛ bló gbɔn wá yì é. Amɔ̌, ɖó enyi nǔɖiɖó gbigbɔ tɔn ɖé wutu ɔ, é kpéwú bo nɔ tɔ́n dó mɛ lɛ jí ajijimɛ, lobo nɔ lɛ́ bú ajijimɛ. (Luki 24:31; Jaan 20:19, 26) Gbɛtɔ́ gbaza ɖokpo ɔ wɛ é nɔ sɔ́ dó dó tɔ́n dó mɛ lɛ jí gbɔn fí bǐ ǎ. Enɛ wu ɔ, nǔ e Jezu ɖɔ alǒ, wà lɛ é kɛɖɛ wɛ zɔ́n bɔ xɔ́ntɔn tɔn vívɛ́ lɛ tuùn i.—Luki 24:30, 31, 35; Jaan 20:14-16; 21:6, 7.

•  Hwenu e Jezu tɔ́n dó mɛsɛ́dó Tɔmáa jí é ɔ, agbaza e mɛ hunjɛ́n kpa ɖè é wɛ é sɔ́ dó. Jezu wà mɔ̌, bo na dó hɛn nǔɖiɖi Tɔmáa tɔn lidǒ, ɖó Tɔmáa ɖò nǔ xò kpɔ́n dó fínfɔ́n sín kú tɔn wu wɛ.—Jaan 20:24-29.