Mawu jló ɖɔ a ni tuùn emi ganji, bo huzu xɔ́ntɔn emitɔn, bɔ enɛ gudo ɔ, a ni yí wǎn nú emi, bo sɛn emi kpo ayi towe bǐ kpo. (Matie 22:37, 38; Jaki 4:8) Gbɛzán Jezu tɔn kpo nǔkplɔnmɛ tɔn lɛ kpo sixu kplɔ́n nǔ we dó lee a na wà jlǒ Mawu tɔn gbɔn é wu. (Jaan 7:16, 17) Jezu ɖɔ xó dó jlǒ Mawu tɔn wu kpowun ǎ, é wà jlǒ ɔ wɛ. Nǔgbo ɔ, Jezu ɖɔ nǔ e wu é wá gbɛ̀ ɔ mɛ é bo ɖɔ é kún nyí ‘bo na bló jlǒ emitɔn ó; loɔ, nǔ e jló mɛ e sɛ́ emi dó ɔ bló gbé wɛ emi ja bo wá.’—Jaan 6:38.

É ka byɔ ɖɔ Mawu ni ɖè wuntun bǔnɔ ɖé, alǒ nǔmimɔ ɖé xlɛ́ mì, abǐ ylɔ́ mì ɖò nǔjiwǔ linu hwɛ̌ cobɔ na tuùn nǔ e É ba ɖɔ má wà ɖò gbɛzán ce mɛ é wɛ à?

 Eǒ, ɖó wɛn e Mawu ɖó nú gbɛtɔ́ lɛ é ɖò Biblu mɛ. É na bló bɔ nǔ e sín hudo a na ɖó bo “na dó wà nǔ ɖagbe bǐ na ɔ bǐ na ɖò así [towe].” (2 Timɔtée 3:16, 17) Mawu ba ɖɔ a ni zán Biblu ɔ kpo “hlɔnhlɔn nǔlinkpɔ́n” tɔn towe kpo dó kplɔ́n nǔ e É ba nú we é.—Hlɔmanu lɛ 12:1, 2, nwt; Efɛzinu lɛ 5:17.

Un ka sixu wà jlǒ Mawu tɔn dóo à?

 Ganji, a sixu kpéwú. Ðó Biblu ɖɔ: “Sɛ́n tɔn lɛ ka vɛ́ nyi ǎ.” (1 Jaan 5:3) Ðiɖɔ wɛ è ɖè ɖɔ sɛ́n Mawu tɔn lɛ nyinyi nɔ bɔwǔ hwebǐnu ǎ. Amɔ̌, lè e a na mɔ é na sukpɔ́ hugǎn gǎn e a na dó dó wà mɔ̌ é flaflá tɔn. Jezu ɖesunɔ ɖɔ: “Mɛ e sè Mawuxó ɔ, bo bló ɖ’eji lɛ wɛ nǔ nyɔ́ na.”—Luki 11:28.