ALƆDÓ NÚ XWÉDO LƐ
Hwenu E Linlin lɛ Gbɔn Vovo É
Xwi ɖíɖí xá vogbingbɔn ɖò nǔ e nɔ jló mɛ lɛ é, aca lɛ, kpo jijɔ mɛ ɖokpo ɖokpo tɔn kpo mɛ lɛ é sixu nɔ vɛwǔ nú asú kpo asì kpo lɛ tawun. Amɔ̌, xóta ɖé lɛ ɖi ɖěɖee bɔ d’ewu lɛ é tlɛ sixu byɔ ɖɔ è ni ɖó ayi te hugǎn:
Táan nabi e è na zán ɖó kpɔ́ xá mɛ mɛtɔn lɛ é
Lee è na zán akwɛ gbɔn é
Hwenu e vǐjiji xó na wá é
Enyi hwi kpo mɛ e a da é kpo ma nɔ ɖó linlin ɖokpo ɔ lɛ ǎ ɔ, etɛ a ka sixu wà?
Nǔ e a ɖó na tuùn é
È jɛxa mɛɖée wɛ nyí è nyí nǔ ɖokpo ɔ ǎ. Asú kpo asì kpo e tlɛ jɛxa yeɖée hugǎn lɛ é na ɖó linlin ɖokpo ɔ lɛ hwebǐnu ǎ, é na bo tlɛ nyí ɖò nǔ taji lɛ kɔn ɔ nɛ.
“Un sù ɖò xwédo e nɔ zán hwenu gegě ɖó kpɔ́ é ɖé mɛ. Aklunɔzán gbla fifó lɛ ɔ, mǐ nɔ zán hwenu ɖó kpɔ́ xá gǎn’páa ce lɛ, gǎn’máa ce lɛ, ataví ce lɛ, atagán ce lɛ, nylɔ ce lɛ, tánti ce lɛ, kpo vǐ yetɔn lɛ kpo. Asú ce sín mɛ lɛ ka nɔ wà mɔ̌ dín ǎ. Enɛ wutu ɔ, mǐ ɖó linlin vovo dó táan nabi e mǐ ɖó na nɔ zán ɖó kpɔ́ xá mɛ mǐtɔn lɛ, alǒ nabi e mǐ na nɔ dó ɖɔ xó xá mɛ mǐtɔn e ɖò zɔ lɛ é wu.”—Tamara.
“Ðó kplɔ́n vovo wɛ nyi kpo asì ce kpo yí wutu ɔ, mǐ ɖó linlin vovo dó nǔ e wu mǐ ɖó na zán akwɛ mǐtɔn dó lɛ é wu. Ðò sun nukɔn nukɔntɔn e mǐ bló ɖò alɔwliwli mǐtɔn gudo lɛ é mɛ ɔ, mǐ ɖɔ xó habǔ d’eji. Mǐ ɖɔ xó ɖó kpɔ́ azɔn gegě hwɛ̌ cobo wá sè nǔ jɛ mǐɖée gbè mɛ kpɛɖé.”—Tyler.
Mɛ we sixu kpɔ́n nǔ ɖokpo ɔ, bo ka na ɖó linlin vovo d’ewu. Ðò ali ɖokpo ɔ nu ɔ, asú kpo asì kpo lɛ sixu ɖó linlin yetɔn yetɔn dó xó ɖé jí
Tagba ɖé lɛ tíìn bɔ nǔ sè jɛ mɛɖée gbè mɛ kpowun ko kpé nú è na ɖeɖɛ ǎ. Ði kpɔ́ndéwú ɔ, nú é byɔ ɖɔ è na kpé nukún dó asú mɛtɔn, alǒ asì mɛtɔn sín mɛ e dò azɔn jɛ wɛ é ɖé wu ɔ ka lo? Alǒ, enyi mi mɛ we lɛ ɖě ba na jì vǐ, bɔ mɛ ɖě ɔ ma ba ǎ ɔ ka lo? a
“Nyi kpo asì ce kpo ko ɖɔ xó habǔ dó vǐjiji wu. Amɔ̌, é fɔ́n ɔ, é nɔ ɖò tamɛ lin d’eji wɛ, bɔ linlin mǐtɔn lɛ lɔ nɔ ɖò vovo nyí wɛ. Un sɔ́ tuùn lee na wà gbɔn bɔ mǐ na sè nǔ jɛ mǐɖée gbè mɛ é ǎ.”—Alɛx.
Vovo e linlin lɛ gbɔn é xlɛ́ ɖɔ alɔwliwli mitɔn kún na yì ta ó ǎ. Mɛ e mɔ dò nú nǔ ɖò ali enɛ nu ganji lɛ é ɖɔ ɖɔ enyi hwi kpo mɛ e a da é kpo ma ɖó linlin ɖokpo ɔ dó nǔ taji ɖé jí ǎ ɔ, a ɖó na wà nǔ ɖebǔ e é byɔ é, bo na mɔ nǔ e ba wɛ a ɖè é, enyi enɛ na bo tlɛ byɔ ɖɔ a ni gbɛ́ mɛ e a da é ɔ nɛ. Amɔ̌, “alixlɛ́mɛ” enɛ sɔ́ lee nǔ nɔ cí nú mɛ é ɖó ajo, lobo ka sɔ́ akpá e è dó ɖò Mawu nukɔn ɖɔ nǔ ɖebǔ na bo jɛ ɔ, è na nɔ kpɔ́ xá mɛ è da é xò kɔ́.
Nǔ e a sixu wà é
Kánɖeji bá ɖè akpá alɔwliwli tɔn e a dó é. Enyi a kánɖeji bo na ɖè akpá alɔwliwli tɔn e a dó é ɔ, enɛ na d’alɔ mi bɔ mi na w’azɔ̌ gbɛ̌ta ɖé ɖɔhun bo ɖeɖɛ tagba mitɔn lɛ.
Nǔgbododó Biblu tɔn: “Gbɛtɔ́ ni bo ma klán nǔ e Mawu dɔn cá ɔ ó.”—Matie 19:6.
Lɛ̌n akwɛ tɔn kpɔ́n. Ði kpɔ́ndéwú ɔ, mǐ ni ɖɔ ɖɔ mɛ ɖě ɖò vǐ ba wɛ, bɔ mɛ ɖě ɔ ka ba ǎ. Nǔ taji ɖé lɛ ɖè bɔ è ɖó na sɔ́ ayi ɖ’eji, ɖé lɛ ɖíe:
Lee kancica mitɔn syɛn sɔ́ é.
Enyi vǐzɔ́ lɛ wá jɛ linkpɔ́n mitɔn dìn tɔn lɛ jí ɔ, mi ka na kpéwú à?
Mɛjitɔ́ sín azɔ̌ lɛ.
É hugǎn nǔɖuɖu nina vǐ, nǔsisɔ nú vǐ kpo ye mɔ xɔ bo ɖ’emɛ kpo.
Ninɔmɛ akwɛzinzan tɔn mitɔn.
Mi na sixu nɔ jlɛ̌ jí ɖò azɔ̌, xwédo, kpo dandannú ɖevo lɛ kpo kɔn à?
Nǔgbododó Biblu tɔn: “Enyi mɛɖé ɖò mi mɛ, bo ɖò síngbó na gbá wɛ ɔ, ayǐ wɛ é na tó jinjɔn, bo na lɛ́n akwɛ nabi e é na zán d’ewu ɔ kpɔ́n hwɛ̌.”—Luki 14:28.
Gbějé akpáxwé xó ɔ tɔn lɛ bǐ kpɔ́n. A sixu kpéwú bo ɖeɖɛ xó ɖěɖee wu mi ma ɖó linlin ɖokpo ɔ dó ǎ é ɖé lɛ. Ði kpɔ́ndéwú ɔ, enyi vǐjiji xó wá xwetɔ́n ɔ, mɛ e ɖò gbigbɛ́ wɛ é sixu kanbyɔ éɖée ɖɔ:
‘Ðó un ko ɖɔ un kún ba na jì vǐ ó wutu ɔ, ɖiɖɔ wɛ un ɖè ɖɔ un kún na jì gbeɖé ó à, alǒ un ba na jì dìn ǎ kpowun wɛ?
‘Nǔxokpɔ́n wɛ un ɖè ɖɔ un ka na sixu nyí mɛjitɔ́ ɖagbe ɖé à jí à?’
‘Mɛ e un da é táa wá dóvɛ̌ nú mì sín xɛsi ɖi wɛ un ɖè à?’
Ðò alɔ ɖevo mɛ ɔ, mɛ e ɖò vǐ ba wɛ é sixu gbéjé nǔkanbyɔ lěhun lɛ kpɔ́n:
‘Mǐ ka ɖò gbesisɔmɛ bo na wà mɛjitɔ́ sín azɔ̌ lɛ à?’
‘Mǐ ka ɖó akwɛ e nukún kpíkpé dó vǐ ɖé wu nɔ byɔ é à?’
Nǔgbododó Biblu tɔn: “Nǔnywɛ e gosin aga é . . . nɔ nɔ jlɛ̌ jí.”—Jaki 3:17, nwt.
Ðǒ ayi lè ɖěɖee mɛ e a da é sín linlin na hɛn wá lɛ é wu. Mɛ we sixu kpɔ́n nǔ ɖokpo ɔ, bo ka na ɖó linlin vovo d’ewu. Ðò ali ɖokpo ɔ nu ɔ, asú kpo asì kpo lɛ sixu ɖó linlin yetɔn yetɔn dó xó ɖé jí, é sixu nyí dó lee è ɖó na zán akwɛ gbɔn é jí. Bo na dó kɛnu dó xó ɖebǔ e wu mi ma ɖó linlin ɖokpo ɔ dó ǎ é ɖé wu hǔn, mi tó bɛ́sín nǔ e jí mi ɖó linlin ɖokpo ɔ dó lɛ é jí hwɛ̌.
Etɛ ka nyí nǔ e gbé nya wɛ mi bǐ ɖè é?
Lè tɛ linlin mɛ ɖokpo ɖokpo tɔn ka na hɛn wá?
Bonu alɔwliwli mitɔn na lidǒ ɔ, mɛ ɖokpo, alǒ mi mɛ we lɛ ka sixu huzu linlin mitɔn lɛ b’ɛ sɔgbe xá miɖée lɛ tɔn à?
Nǔgbododó Biblu tɔn: “Mɛɖebǔ ni ma nɔ ba ɖagbe éɖesunɔ tɔn ó; loɔ, ni nɔ ba ɖagbe mɛ ɖevo lɛ tɔn.”—1 Kɔlɛntinu lɛ 10:24.
a È ɖó na ɖɔ xó dó nǔ taji lɛ jí jɛ nukɔn nú alɔwliwli. É ɖó mɔ̌ có, nǔmaɖónukún lɛ sixu wá xwetɔ́n, alǒ hwenu ɖò yiyi wɛ ɔ, lee nǔ nɔ cí nú mɛ e a da é sixu ɖyɔ.—Nǔnywɛtɔ́xó 9:11, nwt.