Lěe Mawu nɔ kpé nukún dó tókúnɔ lɛ́ wú gbɔn é
Tókúnɔ lǐvi 70 mɔ̌ wɛ ɖo gbɛ ɔ mɛ ɖo égbé, bɔ yě mɛ gěgé nɔ dó tókúnɔ lɛ́ sín gbe 200 jɛjí. É blá wǔ ɖɔ hwɛhwɛ ɔ, è nɔ wa nǔ agɔ xá tókúnɔ lɛ́ lěe xó e bɔ d’é wú lɛ́ é xlɛ́ gbɔn é:
“Gbɔn gbɛ ɔ bǐ mɛ ɔ, è nɔ ké ya nú acɛ tókúnɔ lɛ́ kpó mɛ e ma nɔ se nǔ ganjí ǎ lɛ́ é tɔn kpó ǎ.”—Kplékplémɛ tókúnɔ e ɖo États-Unis lɛ́ é tɔn.
“Ðo to e hun nukún lɛ́ é mɛ ɔ, tókúnɔ lɛ́ mɛ wɛ è nɔ mɔ yatɔ́nɔ klókló lɛ́ ɖe; ali nɔ lɛ́ hun nú yě bónú yě ná kplɔ́n wěma ganjí, mɔ azɔ̌ ɖagbe, alǒ se nǔ e ɖo jijɛ wɛ lɛ́ é lěe é jɛxá gbɔn é ǎ.”—Gbɛ̌ kplékplé tókúnɔ e gbɔn gbɛ ɔ bǐ mɛ lɛ́ é tɔn.
Nɛ̌ nǔ ka nɔ cí nú Mawu dó tókúnɔ lɛ́ wú? Étɛ́ Biblu ka ɖɔ dó tókúnɔ lɛ́ wú? Nɛ̌ Kúnnuɖetɔ́ Jexóva tɔn lɛ́ ka ɖo alɔ dó yě wɛ gbɔn ɖo égbé?
Linlin e Mawu nɔ ɖó dó tókúnɔ lɛ́ wú é
Biblu ɖɔ ɖɔ Jexóva a Mawu nɔ kpé nukún dó tókúnɔ lɛ́ wú. É nɔ ba ɖɔ è ní wa nǔ xá yě ɖo ali e sɔgbe é nu, bónú yě ní lɛ́ ɖu nǔkplɔ́nmɛ tɔn lɛ́ sín vǐví.
Wěmafɔ: “Mi ma [dó nu] tókúnɔ ó.”—Levíi ví 19:14.
Tínmɛ tɔn: Sɛ́n e Jexóva ná Izlayɛ́li ví hwexónu tɔn lɛ́ é cyɔ́n alɔ acɛ e tókúnɔ lɛ́ ɖó é jí.
Wěmafɔ: ‘Mawu nɔ ɖe mɛɖé ɖó vo ɖo mɛɖé mɛ ǎ.’—Mɛsɛ́dó10:34.
Tínmɛ tɔn: Jexóva nɔ kpé nukún gbɛtɔ́ lɛ́ bǐ wú, yě ná bo gosín fí ɖěbǔ, nɔ dó gbe ɖěbǔ, alǒ nyí tókúnɔ ɔ nɛ́.
Wěmafɔ: “Jezu nɔ ɖo . . . wɛn ɖagbe Axɔ́súɖuto ɔ tɔn jlá wɛ.”—Matíe 9:35.
Tínmɛ tɔn: Jezu wá ayǐkúngban jí, bo ná kplɔ́n nǔ gbɛtɔ́ lɛ́ dó Axɔ́súɖuto Mawu tɔn kpó nǔ e é ná wa nú gbɛtɔ́ lɛ́ bǐ káká jɛ tókúnɔ lɛ́ jí é wú.—Matíe 6:10.
Wěmafɔ: Jezu tlɛ bló bɔ “tókúnɔ lɛ́ nɔ se nǔ bɔ ɖɛ̌kúnánɔ lɛ́ nɔ ɖɔ xó.”—Maki 7:37.
Tínmɛ tɔn: Jezu xlɛ́ nǔ e Axɔ́súɖuto Mawu tɔn ná wa, hwenu e tókúnɔ lɛ́ ná kpé wú bo se nǔ lobo ɖɔ xó é. Ðo ninɔmɛ ɖé mɛ ɔ, Jezu nyɔ́ xomɛ, bo to bló alɔ dó ɖɔ xó xá tókúnɔ ɖé hwɛ̌ cóbó hun tó n’i, bo lɛ́ bló bɔ é jɛ xó ɖɔ jí.—Maki 7:31-35.
Wěmafɔ: “Tókúnɔ lɛ́ ná se nǔ.”—Ezayíi 35:5.
Tínmɛ tɔn: Jexóva ɖɔ ɖ’ayǐ ɖɔ mɛ e kú tó lɛ́ é ná se nǔ.—Ezayíi 29:18.
Lěe Kúnnuɖetɔ́ Jexóva tɔn lɛ́ nɔ d’alɔ tókúnɔ lɛ́ gbɔn ɖo égbé é
Kúnnuɖetɔ́ Jexóva tɔn lɛ́ nɔ jlá wɛn nukúnɖíɖó tɔn e gosín Mawu gɔ́n é tókúnɔ lɛ́ gbɔn gbɛ ɔ bǐ mɛ. Étɛ́ wa wɛ mǐ ɖe bo ná dó kpé énɛ́ wú? Mǐ nɔ ɖe Biblu kpó video Biblu kplɔ́nkplɔ́n tɔn lɛ́ kpó tɔ́n dó tókúnɔ lɛ́ sín gbe 100 jɛjí mɛ. Mǐ nɔ lɛ́ xwlé tuto Biblu kplɔ́nkplɔ́n tɔn mɛ lɛ́, bo nɔ bló tuto nú kplé klisánwun tɔn lɛ́ dó tókúnɔgbe mɛ. Mǐ bló tuto nǔ énɛ́ lɛ́ tɔn nú mɛ ɖěbǔ e ɖó alɔdó Mawu tɔn sín hudó é, bɔ yě nɔ ɖu vǐví tɔn vɔ̌nu. Étɛ́wú? Ðó Jezu ɖe gbe ɖɔ: “Vɔ̌nu wɛ è ná mi, mi lɔ ní ná mɛ vɔ̌nu.”—Matíe 10:8.
A sixú mɔ nǔ énɛ́ lɛ́ ɖo Ɛntɛnɛ́ti jí, alǒ yí yě dó alǒkan alǒ tablɛ́ti towe jí ɖo fí élɔ́ lɛ́:
JW.ORG. Zǐn wuntun gbe tɔn e nɔ ɖo aga ɖo tɛn Ɛntɛnɛ́ti tɔn ɔ sín akpáxwé ɖěbǔ jí é, bo ba do nú nǔ ɖo tókúnɔgbe e jló we é ɖé mɛ.
Aplikasyɔn JW Library Sign Language. Yǐ azɔ̌wanú élɔ́ dó alǒkan alǒ tablɛ́ti towe jí, énɛ́ ɔ, a ná kpé wú bo yí alǒ kpɔ́n tókúnɔ lɛ́ sín video.
Azɔ̌wanú Biblu kplɔ́nkplɔ́n tɔn tɛ́ lɛ́ mǐ ka sɔ́ nǔ ná?
Biblu dó tókúnɔgbe mɛ. Biblu gbɛ yɔ̌yɔ́ ɔ tɔn e tókúnɔgbe Amɛlíka tɔn mɛ é wɛ nyí Biblu tókúnɔ lɛ́ tɔn nukɔntɔn e è ɖe blěbú tɔn tɔ́n é. Biblu gbɛ yɔ̌yɔ́ ɔ tɔn blěbú alǒ akpáxwé tɔn ɖé ko tíin din dó tókúnɔgbe gěgé mɛ, bɔ è nɔ lɛ́ ɖetɔ́n dó gbě gěgé ɖěvo lɛ́ mɛ xwewú xwewú. (Nú a jló ná mɔ gbe e mɛ Biblu ɔ ɖe lɛ́ é alǒ xa Biblu ɖo Ɛntɛnɛ́ti jí hǔn, kpɔ́n gbǎví “ Biblu gbɛ yɔ̌yɔ́ ɔ tɔn dó tókúnɔgbe mɛ.”)
Nú a jló ná tuun azɔ̌ e mǐ wa dó ɖe Biblu tɔ́n dó tókúnɔgbe mɛ é hǔn, kpɔ́n video La traduction du monde nouveau en entier est maintenant disponible en langue des signes américaine.
Bónú Biblu xixa ná bɔwǔ nú we hǔn, yǐ aplikasyɔn JW Library Sign Language. Azɔ̌wanú énɛ́ ná zɔ́n bɔ a ná yi wěmafɔ e ba wɛ a ɖe lɛ́ é jí ɖo Biblu tókúnɔ lɛ́ tɔn mɛ.
Dmytro kpó Vita kpó ɔ, tókúnɔ wɛ nú yě, amɔ̌, vǐ yětɔn lɛ́ ka nɔ se nǔ. Kpɔ́n lěe xwédo ɔ nɔ ɖu wěma Biblu tɔn lɛ́ sín video kpínkpɔ́n gbe bǐ gbe dó tókúnɔgbe mɛ sín vǐví gbɔn é.
Video ɖěɖěe è nɔ zán dó kplɔ́n Biblu lɛ́ é. Kúnnuɖetɔ́ Jexóva tɔn lɛ́ sɔ́ nǔ nú video ɖěɖěe nɔ d’alɔ mɛ lɛ́ bɔ yě nɔ mɔ nukúnnú jɛ wěɖexámɛ Biblu tɔn e nyɔ́ zán lɛ́ é mɛ lɛ́ é dó tókúnɔgbe mɛ nú . . .
Biblu kplɔ́nkplɔ́n xá mɛ e nɔ hɛn le wá nú mɛ é. Kplɔ́n wɛn Biblu tɔn dó tókúnɔgbe mɛ nú táan e a ba é kpó alɔdó nǔkplɔ́nmɛtɔ́ ɖé tɔn kpó. Byɔ̌ ɖɔ è ní xlɛ́ we lěe nǔkplɔ́nkplɔ́n ɖé nɔ yi gbɔn é.
Jeson Senajonon nɔ nɔ Philippines. Kpɔ́n lěe tuto Biblu kplɔ́nkplɔ́n tɔn mǐtɔn d’alɔ ɛ bɔ é zun xɔ́ntɔn vívɛ́ xá Mawu gbɔn é.
Mario Antúnez nyí sinsɛngán ɖo Honduras ɖ’ayǐ. Kpɔ́n lěe é mɔ xósin nú nǔ e é nɔ kanbyɔ́ éɖée dó Biblu jí lɛ́ é gbɔn ɖo tan gbɛzán tɔn tɔn élɔ́ mɛ: “Nǔkanbyɔ́ ce lɛ́ hú gǎn xósin ce lɛ́.”
Kplé lɛ́ kpó nǔwiwa mǐtɔn lɛ́ kpó. Mǐ ɖó agun kpó kánɖó kpó e mɛ è nɔ dó tókúnɔgbe ɖe lɛ́ é gěgé gbɔn gbɛ ɔ bǐ mɛ, bɔ ɖo fí énɛ́ lɛ́ ɔ, tókúnɔ lɛ́ nɔ kplé bo nɔ kplɔ́n nǔ lobo nɔ lɛ́ sɛn Mawu ɖo aklúnɔzán gbla ɖokpó ɖokpó mɛ. Mǐ nɔ lɛ́ bló nǔwiwa ɖaxó ɖaxó lɛ́ dó tókúnɔgbe lɛ́ mɛ xwewú xwewú. Ðo kplé kpó nǔwiwa mǐtɔn lɛ́ kpó domɛ ɔ, gbesetɔ́ lɛ́ nɔ d’alɔ mɛ ɖěɖěe nyí tókúnɔ kpó nukúntɔ́nnɔ kpó zɛ̌ɛn lɛ́ é. Mǐ nɔ lɛ́ má wěma mǐtɔn wěma mǐtɔn e è bló ɖó nǔwlánwlán lɔ tókúnɔ lɛ́ tɔn jí é vɔ̌nu.
Ba agun e sɛkpɔ́ we é ɖé.
Kplɔ́n nǔ dó kpléɖókpɔ́ ɖaxó xwewú xwewú tɔn mǐtɔn lɛ́ kpó kpléɖókpɔ́ mǐtɔn lɛ́ kpó wú.
Yi kú Klísu tɔn flínflín, éé nyí nǔwiwa mǐtɔn tají hú gǎn xwe ɔ tɔn é domɛ.
José Luis Ayala nɔ nɔ Mexique. È ji i tókúnɔ tɔn, bɔ é lɛ́ wá húzú nukúntɔ́nnɔ. Kpɔ́n lěe è d’alɔ ɛ, bɔ é wá húzú Biblu kplɔ́nmɛtɔ́ alɔsekpɛ́nnánɔ ɖé gbɔn é.
a Nyǐkɔ Mawu tɔn wɛ nɔ nyí Jexóva. (Ðɛhan 83:18, nwt) Kpɔ́n xóta “Mɛ̌ ka nyí Jexóva?”
Xóta élɔ́ lɛ́ lɔ sixú jɛjí nú we
NǓ E MǏ NƆ ÐE TƆ́N LƐ́ É
È Wlan Nùɖé Ǎ Bo ka Lilɛ Nǔ Dó Gbè Ðevo Mɛ
Kúnnuɖetɔ́ Jehovah tɔn lɛ ko lilɛ wema jinjɔn Biblu jí lɛ dó tokunɔgbe 90 jɛji mɛ. Etɛwu è ka nɔ dó gǎn sɔmɔ̌?
NǓ E KAN MǏ LƐ́ É
Byɔ̌ ɖɔ è ní wá ba we kpɔ́n
Gbějé nǔkanbyɔ́ Biblu tɔn ɖé kpɔ́n, alǒ kplɔ́n nǔ ɖěvo lɛ́ dó Kúnnuɖetɔ́ Jehovah tɔn lɛ́ wú.
