Nǔ e Mɛsɛ́dó lɛ́ wa lɛ́ é 13:1-52
13 Gbeyíɖɔ kpó nǔkplɔ́nmɛtɔ́ kpó ɖé lɛ́ ɖo agun Antyɔ́ci tɔn mɛ, yě wɛ nyí: Baanabási, Sinmɛnyɔ́ɔ e è nɔ ylɔ́ ɖɔ Nijɛ́ɛ é, Lisiwúsi Silenɛ́ɛnu ɔ, Manayɛ́nu, éé kpó tokpɔngán Elódu kpó yi wěmaxɔmɛ ɖó kpɔ́ é kpó Sólu kpó.
2 Ée yě ɖo sinsɛnzɔ́ wa nú Jexóva* wɛ,* bo ɖo nu blá wɛ é ɔ, gbigbɔ mímɛ́ ɖɔ: “Mi ɖe Baanabási kpó Sólu kpó ɖó vo nú mì nú azɔ̌ e wú un ylɔ́ yě é.”
3 Énɛ́ ɔ, ée yě blá nu bo xo ɖɛ gúdo é ɔ, yě sɔ́ alɔ ɖó yě jí, bo nyi yě.
4 Súnnu énɛ́ lɛ́ e gbigbɔ mímɛ́ sɛ́ dó é yi káká Selesíi; yě dó tɔjíhún sín fínɛ́ bo yi Cíplu.
5 Ée yě wá Salamínu é ɔ, yě jɛ xó Mawu tɔn jlá jí ɖo kplɔ́ngbasá Jwifu lɛ́ tɔn lɛ́, bɔ Jaan nɔ d’alɔ yě.*
6 Hwenu e yě xo tɔtɛ́ntinto ɔ zlɛ́, bo hun káká yi Pafɔ́si é ɔ, yě xo go nya Jwifu e nɔ nyí Bǎa-Jezu é, azětɔ́ wɛ n’i, bo lɛ́ nyí gbeyíɖɔ-nyíjɛtɔ́.
7 É nɔ wa azɔ̌ nú tokpɔngán* Sɛjiwúsi Polúsi, éé nyí nya nǔnywɛ́tɔ́ ɖé é. Akpakpa ɖo tokpɔngán ɔ sɔ́ wɛ bónú é ná se xó Mawu tɔn, énɛ́ wú ɔ, é ylɔ́ Baanabási kpó Sólu kpó.
8 Amɔ̌, Elimási azětɔ́ ɔ jɛ gbe klán xá yě jí (nyǐkɔ Elimási ɔ wɛ è tínmɛ bɔ é nyí “azětɔ́”). É tɛ́n kpɔ́n bo ná lɛ́ kɔ nú tokpɔngán ɔ sín nǔɖiɖi li ɔ jí.
9 Énɛ́ ɔ, gbigbɔ mímɛ́ sísɛ́ Sólu e è nɔ lɛ́ ylɔ́ ɖɔ Pɔ́lu é, bɔ é kpɔ́n ɛ tlítlí,
10 bo ɖɔ: “Hwi nya élɔ́ ɔ, ahizi alɔkpa bǐ kpó nǔbaɖabaɖa alɔkpa bǐ kpó wɛ gɔ́ ayi towe mɛ; Awǒvi sín vǐ wɛ nú we, bɔ a lɛ́ nyí kɛntɔ́ nǔjlɔ́jlɔ́wiwa bǐ tɔn; a ná gɔn tíntɛ́nkpɔ́n bo ná sɔ́ ali jlɔ́jlɔ́ Jexóva* tɔn lɛ́ dó húzú adingban li ǎ cé?
11 Éɖíe! Alɔ Jexóva* tɔn jɛ wǔ we, bɔ a ná tɔ́n nukún, bɔ nú hwenu ɖé ɔ, a sɔ́ ná mɔ wěziza hwe tɔn ǎ.” Tɛn tɔn mɛ ɔ, é cí n’i ɖɔ amǔ sú, bɔ zǐnflú lɛ́ dó ɖɔhun, bɔ é jɛ lɛ̌ lɛ́ jí bo nɔ tɛ́n kpɔ́n bá mɔ mɛɖé nú é ná hɛn alɔ tɔn, bo xlɛ́ ali i.
12 Ée tokpɔngán ɔ mɔ nǔ e jɛ é ɔ, é húzú nǔɖitɔ́, ɖó nǔkplɔ́nmɛ Jexóva* tɔn jí wǔ n’i.
13 Din ɔ, Pɔ́lu kpó gbɛ̌ tɔn lɛ́ kpó byɔ́ tɔjíhún mɛ ɖo Pafɔ́si, bo wá wá Pɛɛjée ɖo Panfilíi. Amɔ̌, Jaan jó yě dó bo lɛ́ kɔ yi Jeluzalɛ́mu.
14 É ɖo mɔ̌ có, yě gbɛ kan dó tomɛyiyi ɔ nu, bo gosín Pɛɛjée bo wá Antyɔ́ci ɖo Pisidíi. Yě byɔ́ kplɔ́ngbasá ɖé ɖo gbɔjɛzángbe bo jínjɔ́n ayǐ.
15 Ée è xa Sɛ́n ɔ kpó nǔwlánwlán gbeyíɖɔ lɛ́ tɔn lɛ́ kpó ɖo agbawungba gúdo é ɔ, nukɔntɔ́ kplɔ́ngbasá ɔ tɔn lɛ́ ɖɔ sɛ́dó yě ɖɔ: “Nɔví lɛ́ mi, ényí mi ɖó xó ɖěbǔ bo ná ɖɔ dó dó wǔsyɛ́n lanmɛ nú togun ɔ hǔn, mi ɖɔ.”
16 Énɛ́ ɔ, Pɔ́lu sí te bo bló alɔ ɖɔ è ní cí xwíí, lobo ɖɔ:
“Izlayɛ́li ví lɛ́ kpó mi mɛ e kpo bo nɔ ɖó sísí e gɔ́ngɔ́n é nú Mawu lɛ́ é kpó è mi, mi ɖótó.
17 Togun Izlayɛ́li tɔn élɔ́ sín Mawu sɔ́ tɔ́gbó mǐtɔn lɛ́, bo sɔ́ togun ɔ su, hwenu e yě nyí jǒnɔ ɖo Ejípu yíkúngban jí é, bo kplá yě sín fínɛ́ kpó alɔ tɔn hlɔ̌nhlɔ́nnɔ ɔ kpó.
18 Mawu dɛ ɖo nǔwalɔ yětɔn lɛ́ nu ɖo gbětótló mɛ nú xwe 40.
19 Ée é sú kún dó nú akɔta tɛ́nwe ɖo Kanáa yíkúngban jí gúdo é ɔ, é sɔ́ ayǐkúngban yětɔn jó nú tɔ́gbó mǐtɔn lɛ́, bɔ yě ɖu gǔ tɔn.
20 Xwe 450 mɔ̌ vlamɛ wɛ nǔ énɛ́ lɛ́ bǐ jɛ.
“Énɛ́ gúdo ɔ, é ná yě hwɛɖɔtɔ́ lɛ́ káká jɛ gbeyíɖɔ Samuwɛ́li hwenu.
21 Amɔ̌, yě wá byɔ́ axɔ́sú ɖokpó, bɔ Mawu ná yě Sawúlu Kícu ví e jɔ ɖo akɔta Bɛnjamɛ́ɛ tɔn mɛ é, bɔ é kp’acɛ dó yě nu xɔ xwe 40.
22 Ée é ɖe Sawúlu síin gúdo é ɔ, é sɔ́ Davídi bɔ é nyí axɔ́sú nú yě; é wú wɛ é ɖe kúnnu dó bo ɖɔ: ‘Un mɔ ɖɔ Davídi Jɛsée ví ɔ, mɛɖé wɛ é nyí bo nɔ wa nǔ sɔgbe xá jlǒ ce; é ná wa nǔ e un jló lɛ́ é bǐ.’
23 Mawu ɖe mɛhwlɛ́ngántɔ́ ɖokpó tɔ́n sín kúnkan* nya énɛ́ tɔn mɛ nú Izlayɛ́li sɔgbe xá akpá e é dó é; mɛhwlɛ́ngántɔ́ énɛ́ wɛ nyí Jezu.
24 Jɛ nukɔn nú wǐwá mɛ énɛ́ tɔn ɔ, Jaan jlá Izlayɛ́li ví lɛ́ bǐ ɖo agbawungba ɖɔ yě ní bló batɛ́mu, bo ná dó xlɛ́ ɖɔ hwɛ émítɔn lɛ́ vɛ́ nú émí.*
25 Amɔ̌, hwenu e Jaan ɖo sinsɛnzɔ́ tɔn wa fó wɛ é ɔ, é nɔ ɖɔ: ‘Mɛ̌ un ka nyí bɔ mi nɔ lin? Un nyí mɛ e mi lin ɖɔ un nyí é ǎ. Loɔ, mɛ ɔ jawě ɖo gǔdo ce, bɔ un jɛxá bo ná tún afɔkpakan tɔn lɛ́ ǎ.’
26 “Nɔví ce lɛ́ mi, mi mɛ e nyí xwédo Ablaxámu tɔn sín kúnkan lɛ́ é kpó mɛ ɖěvo e nɔ ɖó sísí e gɔ́ngɔ́n é nú Mawu bo ɖo tɛ́ntin mitɔn lɛ́ é kpó ɔ, è sɛ́ wɛn énɛ́ e nyí hwlɛngán mǐtɔn é dó mǐ.
27 Mɛ e nɔ nɔ Jeluzalɛ́mu lɛ́ é kpó gǎn yětɔn lɛ́ kpó tuun mɛ e mɛ énɛ́ nyí é ǎ, amɔ̌, hwenu e yě ɖo hwɛ tɔn ɖɔ wɛ é ɔ, yě bló bɔ nǔ e gbeyíɖɔ lɛ́ ɖɔ, bɔ è nɔ xa dó jǐ ɖo gbɔjɛzángbe lɛ́ bǐ lɛ́ é jɛnu.
28 É wa nǔ e jɛxá kú é ɖě bónú yě mɔ ǎ có, yě byɔ́ Pilátu ɖɔ é ní ɖɔ bónú è hu i.
29 Ée yě bló nǔ e è ko wlán dó wǔtu tɔn lɛ́ é bǐ fó é ɔ, yě ɖe è jɛ te sín atín* ɔ jí, bo sɔ́ ɛ ɖó yɔdo mɛ.
30 Amɔ̌, Mawu fɔ́n ɛ sín kú,
31 bɔ mɛ ɖěɖěe zɔn xá ɛ sín Galilée wá Jeluzalɛ́mu lɛ́ é mɔ ɛ xɔ azǎn gěgé. Mɛ énɛ́ lɛ́ wɛ nyí kúnnuɖetɔ́ tɔn lɛ́ din ɖo togun ɔ mɛ.
32 “Énɛ́ wú ɔ, mǐ ɖo wɛn ɖagbe e kunkplá akpá e è dó nú tɔ́gbó mǐtɔn lɛ́ é jlá mi wɛ.
33 Mawu ɖe akpá énɛ́ bǐ mlɛ́mlɛ́ nú mǐ mɛ e nyí vǐ yětɔn lɛ́ é gbɔn Jezu fínfɔ́n sín kú gblamɛ; è ko wlán ɖo ɖɛhan wegɔ́ ɔ mɛ ɖɔ: ‘Vǐ ce wɛ a nyí; égbé ɔ, un húzú tɔ́ towe.’
34 Mawu fɔ́n ɛ sín kú, bo ná ɛ agbaza e ma sixú nyɔ ǎ é. Mawu ɖɔ xó élɔ́ dó xlɛ́ ɖɔ nǔgbó wɛ nyí xó énɛ́: ‘Un ná nɔ ɖe xomɛ e wǎnyíyí nɔ sísɛ́ mɛ bɔ è nɔ nyɔ́, bɔ un dó akpá tɔn nú Davídi é xlɛ́ mi kpó gbejíninɔ kpó.’
35 Énɛ́ wú ɔ, é lɛ́ ɖɔ ɖo ɖɛhan ɖěvo mɛ ɖɔ: ‘A ná lɔn bónú gbejínɔtɔ́ towe sín cyɔ ná nyɔ ǎ.’
36 Davídi ɔ, éyɛ́ wa sinsɛnzɔ́ nú Mawu* nú gbɛhwenu tɔn bǐ, bo kú, bɔ è ɖi i dó tɔ́gbó tɔn lɛ́ kpá, bɔ cyɔ éyɛ́tɔn nyɔ.
37 Amɔ̌, mɛ e Mawu fɔ́n sín kú é sín cyɔ nyɔ ǎ.
38 “Hǔn nɔví lɛ́, mi ní tuun ɖɔ mɛ énɛ́ gblamɛ wɛ è ɖo hwɛsɔ́kɛmɛ jlá mi gbɔn wɛ.
39 Gɔ́ ná ɔ, Mɔyízisɛ́n ɔ xwixwedó zɔ́n bónú è ɖɔ ɖɔ mi nyí nǔjlɔ́jlɔ́watɔ́ ɖo nǔ bǐ mɛ ǎ, amɔ̌, gbɔn mɛ énɛ́ gblamɛ ɔ, mɛ e ɖi nǔ lɛ́ é bǐ wɛ Mawu nɔ kpɔ́n dó mɔ nǔjlɔ́jlɔ́watɔ́.
40 Énɛ́ wú ɔ, mi cɔ́ miɖée bónú nǔ e è ɖɔ ɖo nǔwlánwlán gbeyíɖɔ lɛ́ tɔn lɛ́ mɛ é ní ma jɛ dó mi jí ó; è ɖɔ:
41 ‘Yamakénúnǔtɔ́ è mi, mi kpɔ́n bónú é ní jí wǔ nú mi, bónú kún mitɔn ní sú dó, ɖó un ɖo nǔɖé wa wɛ ɖo hwe mitɔn nu; nǔɖé wɛ bɔ ényí mɛ ɖěbǔ ná bo wá ɖɔ xó tɔn nú mi tɛ́nwín lɛnwín ɔ, mi ná ɖi nǔ ná gbeɖé ǎ.’”
42 Din ɔ, hwenu e yě ja tíntɔ́n gbé é ɔ, togun ɔ sa vo nú yě ɖɔ yě ní wá ɖɔ xó dó nǔ énɛ́ lɛ́ jí ɖo gbɔjɛzán e ná bɔ d’é wú é gbe.
43 Ée kplé e yě bló ɖo kplɔ́ngbasá ɔ é fó gúdo é ɔ, Jwifu lɛ́ kpó mɛ e húzú Jwifu bo nɔ sɛn Mawu lɛ́ é kpó gěgé xwedó Pɔ́lu kpó Baanabási kpó. Hwenu e Pɔ́lu kpó Baanabási kpó ɖo xó ɖɔ nú yě wɛ é ɔ, yě byɔ́ yě ɖɔ yě ní nɔ fɛ́nú Mawu tɔn mɛ.
44 Gbɔjɛzángbe e bɔ d’é wú é ɔ, ɖibla nyí toxo ɔ bǐ wɛ kplé ɖó kpɔ́ bo ná se xó Jexóva* tɔn.
45 Ée Jwifu lɛ́ mɔ ahwan ɔ é ɔ, yě jɛ wǔ hwan jí, bo jɛ nǔ dɔn xá Pɔ́lu jí, bo nylá nu dó nǔ e ɖɔ wɛ é ɖe lɛ́ é wú.
46 Énɛ́ ɔ, Pɔ́lu kpó Baanabási kpó ɖɔ nú yě kpó adɔgbígbó kpó ɖɔ: “É ɖo dandan ɖɔ è ní to ɖɔ xó Mawu tɔn nú midɛɛ lɛ́ jɛ nukɔn. Ée mi ka gbɛ́ bo ɖe xlɛ́ gbɔn mɔ̌ ɖɔ émí kún jɛxá gbɛ mavɔmavɔ ó é ɔ, éɖíe, mǐ ná gbɔ bo yi mɛ e ɖo akɔta ɖě lɛ́ mɛ lɛ́ é gɔ́n.
47 Ðó gbe e Jexóva* ɖe nú mǐ é ɖíe: ‘Un sɔ́ we bónú a ná nyí wěziza nú mɛ e ɖo akɔta ɖě lɛ́ mɛ lɛ́ é, lobonú a ná jlá hwlɛngán ɔ káká yi fí e ayǐkúngban ɔ kponu ɖó é.’”*
48 Ée mɛ e ɖo akɔta ɖě lɛ́ mɛ lɛ́ é se xó énɛ́ lɛ́ é ɔ, yě jɛ awǎ jɛ jí, lobo jɛ susu kpa nú xó Jexóva* tɔn jí, bɔ mɛ e ɖó ninɔmɛ ayi mɛ tɔn e sɔgbe bo ná dó sixú mɔ gbɛ mavɔmavɔ lɛ́ é bǐ húzú nǔɖitɔ́.
49 Gɔ́ ná ɔ, xó Jexóva* tɔn nɔ ɖo gbigba kpé fí bǐ wɛ gbɔn to ɔ blěbú mɛ.
50 Amɔ̌, Jwifu lɛ́ sísɛ́ nyɔ̌nu nukúnɖéjí e nɔ ɖó sísí e gɔ́ngɔ́n é nú Mawu lɛ́ é kpó súnnu nukúnɖéjí toxo ɔ tɔn lɛ́ kpó, bɔ yě jɛ ya dó nú Pɔ́lu kpó Baanabási kpó jí bo nya yě sín toxo yětɔn mɛ.
51 Énɛ́ wú ɔ, Pɔ́lu kpó Baanabási kpó xúxú afúntúntún e ɖo afɔ yětɔn lɛ́ é, bónú é ná nyí kúnnuɖiɖe ɖé nú yě mɛ énɛ́ lɛ́, lobo ɖidó Ikoniyɔ́mu.
52 Ahwanvú lɛ́ kpo ɖo awǎ jɛ wɛ ɖésú, lobo kpo ɖo gbigbɔ mímɛ́ mɔ yí wɛ.
Tínmɛ e ɖo do lɛ́ é
^ Alǒ “ɖo sinsɛnzɔ́ wa nú Jexóva wɛ ɖo agbawungba.”
^ Alǒ “nyí alɔgɔ́tɔ́ nú yě.”
^ Tokpɔn Hlɔ̌ma tɔn lɛ́ ɖokpó sín gǎn. Kpɔ́n Xógbe ɖé lɛ́ sín tínmɛ.
^ Blǔju tɔn, “kún.”
^ Kpɔ́n Xógbe ɖé lɛ́ sín tínmɛ: “Hwɛvɛ́númɛ.”
^ Alǒ “kpo.”
^ Alǒ “wa jlǒ Mawu tɔn.”
^ É ɖo wɛn ɖɔ Pɔ́lu zán xógbe énɛ́ lɛ́ nú ahwanvú Jezu tɔn lɛ́ lɔ.
