Nǔ e Mɛsɛ́dó lɛ́ wa lɛ́ é 24:1-27
24 Azǎn atɔ́ɔ́n gúdo ɔ, vɔ̌sánúxwlémawutɔ́ ɖaxó Ananiyási wá, é kpó tomɛxó ɖé lɛ́ kpó, gɔ́ nú ɖɛ̌mɛɖenúxótɔ́* e nɔ nyí Tɛtulúsi é, bɔ yě xwlé hwɛ e dó Pɔ́lu wɛ yě ɖe é tokpɔngán ɔ.
2 Ée è ná xó Tɛtulúsi é ɔ, é jɛ hwɛ dó Pɔ́lu jí ɖɔ:
“Sísíjɛxá Felísi, hwi wɛ zɔ́n bɔ mǐ ɖo fífá ɖaxó mɛ, bɔ ɖó ayi towe ɖo te wútu ɔ, nǔ gěgé ɖo hǔzúhúzú wɛ ɖo akɔta élɔ́ mɛ.
3 Mǐ tuun mɔ̌ hwebǐnu ɖo fí bǐ, bɔ énɛ́ nɔ su nukún mǐtɔn mɛ tawun.
4 Amɔ̌, un jló ná hɛn we ɖó te dín ǎ, énɛ́ wú ɔ, un ɖo vo sa nú we wɛ ɖɔ a ní nyɔ́ xomɛ dó mǐ wú bo ɖótó mǐ ɖo kléwún mɛ.
5 Ðó mǐ mɔ ɖɔ azɔn nyanya* ɖé wɛ nya élɔ́ nyí, é nɔ fɔ́n hunnyahunnya nyi te ɖo Jwifu lɛ́ bǐ tɛ́ntin ɖo ayǐkúngban ɔ bǐ jí; sinsɛngbɛ́ta Nazalɛ́tinu lɛ́ tɔn sín nukɔntɔ́ ɖokpó wɛ n’i.
6 É lɛ́ tɛ́n kpɔ́n bo ná hɛn tɛ́npli ɔ blí, bɔ mǐ wlí i.
7 * ——
8 Hwenu e hwiɖésúnɔ ná kan xó byɔ́ ɛ é ɔ, a ná mɔ nǔ jɛ nǔ énɛ́ lɛ́ e sín hwɛ dó è wɛ mǐ ɖe é bǐ wú.”
9 Ée é ɖɔ mɔ̌ é ɔ, Jwifu lɛ́ lɔ jɛ hwɛ dó Pɔ́lu jí, bo dó zǒgbe jí ɖɔ nǔ énɛ́ lɛ́ nyí nǔgbó.
10 Tokpɔngán ɔ sɔ́ ta dó ɖɔ nú Pɔ́lu ɖɔ é ní ɖɔ xó, bɔ é yí gbe ɖɔ:
“Un tuun ganjí ɖɔ a ko nyí hwɛɖɔtɔ́ nú akɔta élɔ́ xɔ xwe mɔ̌kpán, énɛ́ wú ɔ, un ɖo gbesisɔmɛ bo ná jɛ hun dó nyiɖée jí ɖo nukɔn towe.
11 Un yi Mawu sɛn gbé ɖo Jeluzalɛ́mu din é ɔ, é sɔ́ hú azǎn 12 ǎ, hwiɖésúnɔ sixú ba do ná kpɔ́n;
12 yě mɔ mì bónú un ɖo nǔ dɔn xá mɛ ɖě wɛ ɖo tɛ́npli ɔ mɛ ǎ, yě ka lɛ́ mɔ mì bónú un ɖo hunnyahunnya fɔ́n nyi te wɛ ɖo kplɔ́ngbasá lɛ́ alǒ gbɔn toxo ɔ mɛ ǎ.
13 Yě ka sixú lɛ́ ɖe xlɛ́ we ɖo fí e mǐ ɖe din é ɖɔ nǔ e sín hwɛ dó mì wɛ yě ɖe lɛ́ é nyí nǔgbó ǎ.
14 Amɔ̌, un yí gbe nú nǔ élɔ́ ɖo nukɔn towe, é wɛ nyí ɖɔ, lěe un nɔ zán gbɛ gbɔn bɔ yě nɔ ylɔ́ ɖɔ sinsɛngbɛ́ é ɔ, sinsɛnzɔ́ mímɛ́ wɛ un nɔ wa nú Mawu tɔ́gbó ce lɛ́ tɔn gbɔn mɔ̌, ɖó un ɖi nǔ nú nǔ e è ɖɔ ɖo Sɛ́n ɔ mɛ lɛ́ é bǐ kpó nǔwlánwlán gbeyíɖɔ lɛ́ tɔn lɛ́ bǐ kpó.
15 Gɔ́ ná ɔ, un ɖo nukún ɖó Mawu wɛ, lěe mɛ élɔ́ lɛ́ lɔ ɖo nukún ɖó è wɛ gbɔn é, ɖɔ è ná fɔ́n nǔjlɔ́jlɔ́watɔ́ lɛ́ kpó nǔagɔwatɔ́ lɛ́ kpó sín kú.
16 Énɛ́ wú wɛ un nɔ dó gǎn hwebǐnu, bo ná kpo ɖo ayixa mímɛ́* ɖó wɛ ɖo Mawu kpó gbɛtɔ́ lɛ́ kpó nukɔn.
17 Ée xwe gěgé ko wá yi din é ɔ, un wá bo hɛn nǔ e è ná wamamɔnɔ lɛ́ é wá nú mɛ e ɖo akɔta ce mɛ lɛ́ é, bo ná lɛ́ xwlé nǔníná Mawu.
18 Hwenu e un ɖo nukún kpé dó nǔ énɛ́ lɛ́ wú wɛ é ɔ, yě mɔ mì ɖo tɛ́npli ɔ mɛ, bɔ un ko slá wǔ lěe Sɛ́n ɔ byɔ́ gbɔn é, yě ka mɔ mì ɖo kpɔ́ xá ahwan ɖě alǒ ɖo hunnyahunnya fɔ́n nyi te wɛ ǎ. Jwifu ɖé lɛ́ ka gosín tokpɔn Azíi tɔn mɛ bo ɖo fínɛ́ hwenɛ́nu,
19 bɔ ényí yě ko ɖó nǔɖé bo ná ɖɔ dó wǔtu ce wɛ ɔ, yě ɖó ná ko ɖo nukɔn towe bo ná dó hwɛ tɔn mì.
20 Alǒ, ényí mɛ e ɖo fí lɛ́ é mɔ ɖɔ un wa nǔɖé nyi do, hwenu e un ɖo te ɖo Hwɛɖɔxɔsá ɖaxó Jwifu lɛ́ tɔn é hǔn, yěɖésúnɔ ní ɖɔ.
21 Nǔ ɖokpó géé e sín hwɛ yě sixú dó mì é wɛ nyí ɖɔ hwenu e un ɖo hwɛɖɔxɔsá ɔ é ɔ, un sú xó ɖɔ: ‘Fínfɔ́n sín kú mɛkúkú lɛ́ tɔn sín nukúnɖíɖó wú wɛ è ɖo hwɛ ɖɔ xá mì wɛ égbé!’”
22 Amɔ̌, ɖó Felísi tuun nǔ dó Ali nǔgbó ɔ wú ganjí wútu ɔ, é sɛ hwɛɖiɖɔ ɔ dó nukɔn bo ɖɔ: “Ényí ahwangán ɖaxó Lisiyási wá ɔ, un ná ɖɔ xó mitɔn gbo.”
23 Énɛ́ ɔ, é ɖe gbe nú sɔ́jakanwekogán ɔ ɖɔ è ní cɔ́ Pɔ́lu, bo ka ná ɛ vivo kpɛɖé, lobonú è ní ná gbe xɔ́ntɔn tɔn lɛ́ bónú yě ná nɔ kpé nukún dó hudó tɔn lɛ́ wú.
24 Azǎn ɖé lɛ́ gúdo ɔ, Felísi wá, é kpó asi tɔn Dlusíla e nyí Jwifu é kpó. É sɛ́ wɛn dó Pɔ́lu bɔ é wá. É ɖótó è hwenu e é ɖo xó ɖɔ dó nǔɖiɖi ɖíɖó nú Klísu Jezu wú wɛ é.
25 Amɔ̌, ée Pɔ́lu ɖo xó ɖɔ dó nǔjlɔ́jlɔ́wiwa, mɛɖéejíɖuɖe kpó hwɛɖiɖɔ e jawě é kpó wú wɛ é ɔ, xɛsi jɛ Felísi jí, bɔ é yí gbe ɖɔ: “A hɛn ɔ a ná yi hwɛ̌, amɔ̌, ényí ali ɔ hun nú mì hweɖévonu ɔ, un ná lɛ́ sɛ́ wɛn dó we bɔ a ná wá.”
26 Hwe ɖokpó ɔ nu ɔ, é ɖo nukún ɖó wɛ ɖɔ Pɔ́lu ná ná akwɛ́ émí. Hwɛjijɔ énɛ́ wɛ zɔ́n bɔ é tlɛ nɔ sɛ́ wɛn dó Pɔ́lu azɔn gěgé bɔ é nɔ wá, bɔ yě nɔ ɖɔ xó ɖó kpɔ́.
27 Amɔ̌, xwe we gúdo ɔ, Pɔsiwúsi Fɛsitúsi jɛ Felísi tɛnmɛ; bɔ ɖó Felísi jló ɖɔ nǔ émítɔn ní nyɔ́ Jwifu lɛ́ nukúnmɛ wútu ɔ, é jó Pɔ́lu dó nyi gan mɛ.
Tínmɛ e ɖo do lɛ́ é
^ Alǒ “mɛɖesínhwɛmɛtɔ́.”
^ Alǒ “hunnyahunnyadɔnnyiayǐtɔ́.” Blǔju tɔn, “jɛmɛjí.”
^ Alǒ “e ma ɖó blɔ̌ ǎ é.”
