Wɛn ɖagbe Luki tɔn 3:1-38
3 Ðo axɔ́súɖuɖu Tibɛ́ɛ Sezáa tɔn sín xwe 15gɔ́ ɔ mɛ, hwenu e Pɔ́nsu Pilátu nyí tokpɔngán Judée tɔn é ɔ, Elódu* nyí tokpɔngán* Galilée tɔn, bɔ nɔví tɔn Filípu nyí tokpɔngán Itulée kpó Tlakonitídi kpó tɔn, lobɔ Lisaniyási nyí tokpɔngán Abilɛ́nu tɔn.
2 Hwe énɛ́ nu ɖo vɔ̌sánúxwlémawutɔ́gán Anási kpó Kayífu kpó hwenu ɔ, Mawu ɖɔ xó nú Jaan Zakalíi ví ɔ ɖo gbětótló mɛ.
3 Énɛ́ ɔ, é gbɔn to e lɛ́ lɛ̌ dó Judɛ́ɛn tɔ ɔ lɛ́ é bǐ mɛ, bo nɔ jlá ɖɔ mɛ lɛ́ ɖó ná bló batɛ́mu, bɔ é ná nyí xlɛ̌ hwɛvɛ́númɛ* tɔn, lobonú Mawu ná sɔ́ hwɛ yětɔn lɛ́ kɛ yě.
4 Énɛ́ jɛ, lěe è ko wlán ɖ’ayǐ gbɔn ɖo wěma gbeyíɖɔ Ezayíi tɔn mɛ é: “Gbe ɖé ɖo ɖiɖi wɛ sín gbětótló mɛ bo nɔ ɖɔ: ‘Mi bló ali Jexóva* tɔn ɖó! Mi jlɔ́ ali tɔn lɛ́.
5 È ɖó ná bló bɔ tɔdo lɛ́ bǐ ná gɔ́; è ɖó ná gbígbá só ɖaxó lɛ́ bǐ kpó só kpɛví lɛ́ bǐ kpó; è ɖó ná jlɔ́ ali e gɔ́ndɔ́n lɛ́ é kpó ali e nyí kpóɖědoɖě lɛ́ é kpó;
6 énɛ́ ɔ, gbɛtɔ́ lɛ́ bǐ ná mɔ hwlɛngán Mawu tɔn.’”*
7 Jaan jɛ ɖiɖɔ nú ahwan e ɖo wǐwá wɛ bónú é ná bló batɛ́mu nú yě lɛ́ é jí ɖɔ: “Jakpata kúnkan è mi, mɛ̌ ka gb’akpá nú mi ɖɔ mi ní hɔn nú xomɛsin e ja é?
8 Ényí mɔ̌ hǔn, mi ní ná sínsɛ́n e jɛxá hwɛvɛ́númɛ* lɛ́ é. Mi ma jɛ ɖiɖɔ nú miɖée jí ɖɔ: ‘Ablaxámu wɛ nyí tɔ́ mǐtɔn’ ó. Ðó má ɖɔ nú mi, Mawu kpé wú bo ná sɔ́ awǐnnya énɛ́ lɛ́ dó húzú vǐ nú Ablaxámu.
9 Nǔgbó ɔ, asyɔ́ ko ɖo atín lɛ́ sín ɖɔ wú. Hǔn, atín ɖěbǔ e ma nɔ ná sínsɛ́n ɖagbe ǎ é ɔ, è ná sɛ́n ɛ bo ná sɔ́ nyi myɔ mɛ.”
10 Ahwan ɔ kanbyɔ́ Jaan ɖɔ: “Étɛ́ mǐ ka ɖó ná wa lo?”
11 É ka yí gbe nú yě ɖɔ: “Mɛ e ɖó awu we* é ní má xá mɛ e ma ɖó ɖě ǎ é, bónú mɛ e ɖó nǔɖé bo ná ɖu é ní wa nǔ ɖokpó ɔ.”
12 Tokwɛ́yítɔ́ lɛ́ lɔ tlɛ wá bo ná bló batɛ́mu, bɔ yě ɖɔ n’i ɖɔ: “Mɛ̌si, étɛ́ mǐ ka ɖó ná wa?”
13 É ɖɔ nú yě ɖɔ: “Mi ma byɔ́* takwɛ́ ɖěbǔ zɛ ée è ɖó ná sú é wú ó.”
14 Gɔ́ ná ɔ, sɔ́ja lɛ́ kanbyɔ́ ɛ ɖɔ: “Étɛ́ mǐ ka ɖó ná wa?” Bɔ é ɖɔ nú yě ɖɔ: “Mi ma gbídí kɔ nú mɛ ɖěbǔ* alǒ dó hwɛ agɔ mɛ ɖěbǔ ó, loɔ, nǔ e è nɔ ná mi lɛ́ é* ní nɔ kpé mi.”
15 Din ɔ, mɛ lɛ́ ɖo nukúnɖíɖó mɛ, bɔ yě bǐ nɔ kanbyɔ́ yěɖée dó Jaan wú ɖɔ: “Klísu ɔ wɛ ka n’i vlafo a?”
16 Jaan ná xósin ɔ bo ɖɔ nú yě bǐ ɖɔ: “Nyɛ ɔ, un sɔ́ sin dó ɖo batɛ́mu bló nú mi wɛ, amɔ̌, mɛ e ɖó acɛ hú mì é jawě, mɛ énɛ́ ɔ, un jɛxá bo ná tún afɔkpakan tɔn lɛ́ ǎ. É ná sɔ́ gbigbɔ mímɛ́ kpó myɔ kpó dó bló batɛ́mu nú mi.
17 Pɛ́li tɔn e é nɔ dó fún nǔ ná é ɖo alɔ tɔn mɛ; é ná za nǔkúnsótɛn tɔn bǐ mlɛ́mlɛ́ lobo ná kplé blěe lɛ́ dó agɔ̌ tɔn mɛ, amɔ̌ fló lɛ́ ɔ, é ná sɔ́ myɔ e è ma sixú cí ǎ é dó fyɔ́ yě.”
18 É lɛ́vɔ́ dó wǔsyɛ́n lanmɛ nú yě ɖo ali gěgé ɖěvo lɛ́ nu, bo kpó ɖo wɛn ɖagbe ɔ jlá togun ɔ wɛ.
19 Amɔ̌, é kɛ nu dó nǔ wú nú tokpɔngán Elódu dó nǔ e kunkplá nɔví tɔn sín asi Elodiadi é kpó nǔ nyanya tobutóbú e é wa lɛ́ é kpó wú,
20 énɛ́ wú ɔ, Elódu lɛ́ wa nǔ nyanya ɖěvo: É sú Jaan dó gankpá mɛ.
21 Hwenu e é bló batɛ́mu nú mɛ lɛ́ bǐ é ɔ, é bló batɛ́mu nú Jezu lɔ. Ée Jezu ɖo ɖɛ xo wɛ é ɔ, jǐnukúnsin hun,
22 bɔ gbigbɔ mímɛ́ cí ahwannɛ́ ɖɔhun bo jɛ te dó jǐ tɔn, lobɔ gbe ɖé ɖi sín jǐxwé bo ɖɔ: “Vǐ súnnu ce vívɛ́ná ɔ wɛ a nyí, xomɛ nɔ hun mì dó wǔtu towe.”
23 Xwe 30 mɔ̌ ɖó wɛ Jezu ɖe hwenu e é jɛ azɔ̌ tɔn wa jí é. Sɔgbe xá linlin e mɛ lɛ́ nɔ ɖó é ɔ,Jozɛ́fu ví wɛ é nyí,Jozɛ́fu nyí Eli ví,
24 Eli nyí Matáti ví,Matáti nyí Levíi ví,Levíi nyí Mɛlúci ví,Mɛlúci nyí Janáyi ví,Janáyi nyí Jozɛ́fu ví,
25 Jozɛ́fu nyí Matatiyási ví,Matatiyási nyí Amɔ́si ví,Amɔ́si nyí Naxúmu ví,Naxúmu nyí Ɛslí ví,Ɛslí nyí Nagáyi ví,
26 Nagáyi nyí Maatu ví,Maatu nyí Matatiyási ví,Matatiyási nyí Semɛ́ɛ ví,Semɛ́ɛ nyí Josɛ́ki ví,Josɛ́ki nyí Jodáa ví,
27 Jodáa nyí Joanáni ví,Joanáni ka nyí Hlesa ví,Hlesa nyí Zolobabɛ́li ví,Zolobabɛ́li nyí Calutiyɛ́li ví,Calutiyɛ́li nyí Nɛli ví,
28 Nɛli nyí Mɛlúci ví,Mɛlúci nyí Adi ví,Adi nyí Kɔsámu ví,Kɔsámu nyí Ɛlumadámu ví,Ɛlumadámu nyí Ɛ́ɛ ví,
29 Ɛ́ɛ nyí Jezu ví,Jezu nyí Eliezɛ́ɛ ví,Eliezɛ́ɛ nyí Jolímu ví,Jolímu nyí Matáti ví,Matáti nyí Levíi ví,
30 Levíi nyí Sinmɛnyɔ́ɔ ví,Sinmɛnyɔ́ɔ nyí Judási ví,Judási nyí Jozɛ́fu ví,Jozɛ́fu nyí Jonámu ví,Jonámu nyí Eliakímu ví,
31 Eliakímu nyí Mɛlea ví,Mɛlea nyí Mɛnína ví,Mɛnína nyí Matatáa ví,Matatáa nyí Natáan ví,Natáan nyí Davídi ví,
32 Davídi nyí Jɛsée ví,Jɛsée nyí Obɛ́di ví,Obɛ́di nyí Bowózi ví,Bowózi nyí Salumɔ́ni ví,Salumɔ́ni nyí Naxicɔ́ni ví,
33 Naxicɔ́ni nyí Aminadábu ví,Aminadábu nyí Aani ví,Aani nyí Ɛslɔ́ni ví,Ɛslɔ́ni nyí Pɛlɛ́si ví,Pɛlɛ́si nyí Judáa ví,
34 Judáa nyí Jakɔ́bu ví,Jakɔ́bu nyí Izáki ví,Izáki nyí Ablaxámu ví,Ablaxámu nyí Tɛláxi ví,Tɛláxi nyí Naxɔ́ɔ ví,
35 Naxɔ́ɔ nyí Selúgi ví,Selúgi nyí Hlewu ví,Hlewu nyí Pɛlɛ́gi ví, Pɛlɛ́gi nyí Ebɛ́ɛ ví,Ebɛ́ɛ nyí Cɛláxi ví,
36 Cɛláxi nyí Kayinámu ví,Kayinámu nyí Aapakisádu ví,Aapakisádu nyí Sɛ́mu ví,Sɛ́mu nyí Nɔwée ví,Nɔwée nyí Lamɛ́ki ví,
37 Lamɛ́ki nyí Matusála ví,Matusála nyí Enɔ́ki ví,Enɔ́ki nyí Jalɛ́di ví,Jalɛ́di nyí Maxalalɛ́li ví,Maxalalɛ́li nyí Kayinámu ví,
38 Kayinámu nyí Enɔ́ci ví,Enɔ́ci nyí Sɛ́ti ví,Sɛ́ti nyí Adámu ví,Adámu nyí Mawu ví.
Tínmɛ e ɖo do lɛ́ é
^ Énɛ́ wɛ nyí, Elódu Antipási. Kpɔ́n Xógbe ɖé lɛ́ sín tínmɛ.
^ Blǔju tɔn, “tetláki.” Axɔ́ví e nɔ sɔ́ Dadá Hlɔ̌ma tɔn sín afɔ ɖó te ɖo xá ɖé mɛ é.
^ Kpɔ́n Xógbe ɖé lɛ́ sín tínmɛ.
^ Alǒ “lěe Mawu ná hwlɛ́n mɛ gán gbɔn é.”
^ Kpɔ́n Xógbe ɖé lɛ́ sín tínmɛ.
^ Alǒ “awu ɖěvo.”
^ Alǒ “yí.”
^ Alǒ “fán asú mɛ ɖěbǔ bo yí akwɛ́ tɔn.”
^ Alǒ “azɔ̌kwɛ́ mitɔn lɛ́.”
