Wěma e è wlán sɛ́dó Titu é 3:1-15
3 Kpo ɖo flínflín yě wɛ ɖɔ yě ní nɔ hwíhwɛ́ yěɖée, yě ní nɔ se tónú nú acɛkpikpa lɛ́ kpó gǎn lɛ́ kpó, yě ní nɔ ɖo gbesisɔmɛ nú azɔ̌ ɖagbe bǐ,
2 yě ní ma nɔ zun mɛ ɖěbǔ ó, yě ní ma nɔ ɖɔ jlɛ ó, é nyɔ́ wa ɔ, yě ní nɔ nɔ jlɛ̌ jí, bo nɔ fá xomɛ dó mɛ bǐ wú mlɛ́mlɛ́.
3 Ðó ɖ’ayǐ ɔ, mǐ lɔmɔ̌ nyí xlonɔ, bo lɛ́ nyí tótlítɔ́, è dɔn mǐ bú, bɔ mǐ nyí kannumɔ nú jlǒ tɛnmɛ tɛnmɛ lɛ́ kpó gbɛɖuɖu tɛnmɛ tɛnmɛ lɛ́ kpó, mǐ nɔ ɖo nǔ nyanya wa wɛ, bo nɔ lɛ́ ɖo mɛ nú jló wɛ, mǐ nyí nǔvɛ́mɔ, bo nɔ lɛ́ ɖo wǎn gbɛ́ nú mǐɖée lɛ́ wɛ.
4 É ɖo mɔ̌ có, hwenu e Mawu Mɛhwlɛ́ngántɔ́ mǐtɔn ɖe xomɛnyínyɔ́ kpó wǎnyíyí tɔn kpó xlɛ́ gbɛtɔ́ lɛ́ é ɔ,
5 é hwlɛ́n mǐ gán. Lěe é wa mɔ̌ gbɔn é wɛ nyí ɖɔ é slá wǔ nú mǐ bɔ mǐ wá gbɛ, lobɔ é lɛ́ zán gbigbɔ mímɛ́ dó bló bɔ mǐ nyí mɛ yɔ̌yɔ́, (é nyí nǔ jlɔ́jlɔ́ ɖě wɛ mǐ wa wútu wɛ é hwlɛ́n mǐ ǎ, loɔ, nǔbláwǔkúnúmɛ tɔn wútu wɛ.)
6 É kɔn gbigbɔ énɛ́ dó mǐ jí b’ɛ túnflá* gbɔn Mɛhwlɛ́ngántɔ́ mǐtɔn Jezu Klísu gblamɛ,
7 bónú ényí è ɖɔ ɖɔ mǐ nyí nǔjlɔ́jlɔ́watɔ́ gbɔn fɛ́nú mɛ énɛ́ tɔn gblamɛ gúdo ɔ, mǐ ní dó sixú húzú gǔɖutɔ́ sɔgbe xá nukúnɖíɖó gbɛ mavɔmavɔ tɔn.
8 Xó ɖejidéwú wɛ nyí xó énɛ́ lɛ́, bɔ un jló ɖɔ a ní fɔ́n bo ɖo ɖɛ̌ tɛ xó énɛ́ lɛ́ jí wɛ, bónú mɛ e ɖi nǔ nú Mawu lɛ́ é ní dó sixú fɔ́n bo ɖo ayi sɔ́ ɖó azɔ̌ ɖagbe lɛ́ wiwa jí wɛ. Nǔ ɖagbe wɛ nyí nǔ énɛ́ lɛ́, bo lɛ́ ɖó le nú gbɛtɔ́ lɛ́.
9 Amɔ̌, ɖǒ wǔ zɔ bǐ mlɛ́mlɛ́ nú nǔdindɔn e nyí xlonɔnú lɛ́ é, kanfifɔ, jlɛɖiɖɔ kpó hunxixo dó Sɛ́n ɔ jí kpó, ɖó nǔ énɛ́ lɛ́ ɖó le ɖě ǎ, bo lɛ́ nyí nǔ yǎyá.
10 Ényí mɛɖé nɔ jɛ hun dó sinsɛngbɛ́ta ɖé ɖíɖó ayǐ jí hǔn, ɖe wě xá ɛ* azɔn nukɔntɔn ɔ, bo lɛ́ ɖe wě xá ɛ* azɔn wegɔ́ ɔ; ényí é kpo ɖ’é wú jɛ́n wɛ hǔn, ma sɔ́ kpé nǔ ɖěbǔ xá ɛ ó.
11 Ðó a tuun ɖɔ mɛ mɔ̌hun ko zɛ gbě sín ali jlɔ́jlɔ́ ɔ jí, bo ɖo hwɛ hu wɛ, lobo ɖó hwɛ nú éɖée.
12 Hwenu e un ná sɛ́ Aatemási alǒ Ticíku dó we é ɔ, wa nǔ e wú a kpé é bǐ bo wá gɔ̌n ce ɖo Nikopolísi, ɖó fínɛ́ wɛ un wá gbeta ɔ kɔn bo ná nɔ ɖo avivɔhwenu.
13 Dǒ gǎn lɛ́ bǐ bo d’alɔ Zenási e nyí mɛɖé bo tuun Sɛ́n ɔ ganjí é kpó Apolósu kpó, bónú nǔ ɖěbǔ ní ma hwedó yě nú tomɛyiyi yětɔn ó.
14 Amɔ̌, mɛ mǐtɔn lɛ́ lɔ ní kplɔ́n bo nɔ wa azɔ̌ ɖagbe lɛ́, bo ná nɔ d’alɔ ɖo hudó e myá nukún lɛ́ é hwenu, énɛ́ ɔ, yě ná nɔ ná sínsɛ́n hwebǐnu.
15 Mɛ e ɖo kpɔ́ xá mì lɛ́ é bǐ dó gbe sɛ́dó we. Dǒ gbe mɛ ɖěɖěe ɖo nǔɖiɖi ɔ mɛ, bo ɖó wǎnyíyí nú mǐ lɛ́ é nú mì.
Fɛ́nú Mawu tɔn ní nɔ kpɔ́ xá mi mɛ bǐ.
Tínmɛ e ɖo do lɛ́ é
^ Alǒ “É hun alɔ bo kɔn gbigbɔ énɛ́ dó mǐ jí.”
^ Alǒ “gb’akpá n’i.”
^ Alǒ “gb’akpá n’i.”
