Alɔwlíwlí Klisánwun tɔn e nɔ yi ta lɛ́ é nɔ wlí yɛ̌yi nú Jexóva, bo nɔ lɛ́ hɛn awǎjijɛ wá nú asú kpó asi kpó ɔ. (Mk 10:9) Ényí Klisánwun lɛ́ ná ɖó alɔwlíwlí e ná nɔ ayǐ káká sɔ́yi, bo lɛ́ ɖó awǎjijɛ é ɔ, yě ɖó ná zán nǔgbódodó Biblu tɔn lɛ́ hwenu e yě ɖo mɛ e yě jló ná da é ba wɛ é.

To “zɛ wínnyáwínnyá xwe” wú hwɛ̌ cóbó byɔ́ xɔ́ntɔn mɛ, ɖó jlǒ xóɖóxámɛ tɔn lɛ́ nɔ syɛ́n tawun ɖo hwenɛ́nu, bɔ énɛ́ sixú zɔ́n bɔ è gɔn gbeta ɖagbe lɛ́ kɔn wá. (1Kɔ 7:36, nwt) Nǔnywɛ́nú wɛ é nyí ɖɔ a ní zán tlɛnmɛninɔ towe dó hɛn kancícá e ɖo hwi kpó Mawu kpó tɛ́ntin é lí dǒ, bo lɛ́ sɔ́ nǔ nú jijɔ Klisánwun tɔn lɛ́. Énɛ́ ɔ, a ná ɖo gbesisɔmɛ hú gǎn bo ná dó bló bɔ alɔwlíwlí towe ná yi ta.

Cóbónú a ná yí gbe bo wlí alɔ xá mɛɖé ɔ, tɛ́n kpɔ́n bo zán hwenu ɖó kpɔ́ xá ɛ bá dó tuun “acɔ́ xomɛ tɔn” mɛ ɔ tɔn ganjí hwɛ̌. (1Pi 3:4) Ényí a jɛ nǔ xo kpɔ́n jí dó nǔjɔnǔ mɛ hǔn, ɖɔ xó d’é wú xá mɛ e a ɖo linlin wɛ bo ná da é. Lěe é nɔ nyí gbɔn ɖo kancícá ɖěvo lɛ́ mɛ é ɖɔhun ɔ, ɖo alɔwlíwlí mɛ ɔ, a ɖó ná nɔ sɔ́ ayi ɖó nǔ e a sixú ná mɛ e a da é jí hú nǔ e a ná mɔ ɖo gɔ̌n tɔn lɛ́ é. (Filí 2:3, 4) Ényí a nɔ zán nǔgbódodó Biblu tɔn lɛ́ cóbó wlí alɔ ɔ, yě zínzán ɖo alɔwlíwlí towe gúdo ná lɛ́ bɔ wǔ nú we, bɔ mɔ̌ mɛ ɔ, alɔwlíwlí towe ná ɖó awǎjijɛ.

KPƆ́N VIDEO NǓSÍSƆ́ NÚ ALƆWLÍWLÍ (AKPÁXWÉ 3): ‘LƐ̌N AKWƐ́ NABÍ E A NÁ ZÁN D’É WÚ É KPƆ́N HWƐ̌’ Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́ LƐ́:

• Nɛ̌ nǔ lɛ́ ka yi gbɔn ɖo nɔví nyɔ̌nu ɔ kpó Shane kpó tɛ́ntin ɖo bǐbɛ́mɛ?

• Hwenu e nɔví nyɔ̌nu ɔ wá tuun Shane ganjí é ɔ, étɛ́ wú é wá ɖ’ayǐ?

• Nɛ̌ mɛjitɔ́ tɔn lɛ́ ka d’alɔ ɛ gbɔn? Gbeta e nǔnywɛ́ kpé é tɛ́ kɔn é ka wá?