NǓKPLƆNKPLƆN 03
A ka Sixu Ðeji Dó Biblu Wu À?
Biblu dó akpá gegě bo lɛ́ ɖè wě gegě xá mɛ. Dò mimɔ nú nǔ e é kplɔ́n mɛ lɛ é sixu ko ɖò jlojló we wɛ, amɔ̌, a sixu lɛ́ ɖò nǔ xò kpɔ́n wɛ. A ka ɖó na ɖeji dó akpá kpo wěɖexámɛ kpo ɖěɖee ɖò wema xóxó mɔ̌hun ɖé mɛ é wu wɛ à? Nǔ e Biblu ɖɔ lɛ é ka nɔ hɛn lè wá nú mǐ ɖò égbé à? Mǐ ka sixu ɖi nǔ nú nǔ e é ɖɔ dó sɔgudo wu lɛ é à? Gbɛtɔ́ livi mɔ̌kpan lin mɔ̌. Mǐ ni kpɔ́n ɖɔ nǔ ka sixu nyí mɔ̌ nú hwi lɔ à jí.
1. Biblu ɔ, wema e mɛ xó nǔgbo lɛ ɖè é wɛ à, alǒ xɛxó lɛ?
Biblu ɖɔ ɖɔ xó emitɔn lɛ “sɔgbe” bo nyí “xó nǔgbo kɛɖɛ.” (Nǔnywɛtɔ́xó 12:10) É kpi nǔ e jɛ kpɔ́n nǔgbo, bɔ mɛ e nɔ gbɛ̀ kpɔ́n lɛ é ɖ’emɛ é sín tan. (Xà Luki 1:3; 3:1, 2.) Hwenuxó-wlantɔ́ kpo dobanúnǔtɔ́ dokunkun tɔn kpo gegě yí gbè ɖɔ, azǎn taji lɛ, mɛ taji lɛ, fí taji lɛ kpo nǔ taji e jɛ bɔ Biblu ɖɔ xó yetɔn lɛ é kpo sɔgbe.
2. Etɛwu mǐ ka sixu ɖɔ ɖɔ Biblu kún cá ó?
Azɔn mɔ̌kpan wɛ Biblu ɖɔ nǔɖe lɛ xó bɔ è tuùn ye hwenu e è wlán ye é ǎ. Ði kpɔ́ndéwú ɔ, é ɖɔ xó dó nǔnywɛ xwitixwiti sín nǔ lɛ wu. Mɛ gegě ɖi nǔ ɖɔ nǔ enɛ lɛ e xó é ɖɔ é nyí nǔgbo hwenu e è wlán ye é ǎ. Amɔ̌, nǔnywɛ xwitixwiti égbé tɔn dó zǒgbe jí ɖɔ nǔ e Biblu ɖɔ lɛ é nyí nǔgbo. “È sixu ɖeji dó ye wǔ hwebǐnu, sín dìn kaka sɔyi.”—Ðɛhan 111:8, nwt.
3. Etɛwu mǐ ka sixu ɖeji dó nǔ e Biblu ɖɔ dó sɔgudo wu lɛ é wu?
Nǔɖɔɖ’ayǐ lɛ a ɖò Biblu mɛ bo ɖɔ xó dó “nǔ e ma ko jɛ ǎ” lɛ é wu. (Ezayíi 46:10) Nǔ gegě jɛ ɖò hwexónu bɔ é ko ɖɔ xó yetɔn ɖ’ayǐ b’ɛ lín tawun cobɔ ye wá jɛ pɛ́pɛ́pɛ́. É lɛ́ gbajɛ̌mɛ nú ninɔmɛ ɖěɖee mɛ gbɛ̀ ɔ ɖè ɖò égbé lɛ é hlɛ́nhlɛ́n. Ðò nǔkplɔnkplɔn elɔ mɛ ɔ, mǐ na gbéjé nǔɖɔɖ’ayǐ Biblu tɔn ɖé lɛ kpɔ́n. Lee ye sɔgbe gbɔn é jiwǔ tawun!
BA DÒ NÚ NǓ D’EJI
Gbějé lee nǔnywɛ xwitixwiti égbé tɔn xò nǔ dó akpa ɖokpo ɔ mɛ xá Biblu gbɔn é kpɔ́n, bo lɛ́ ba dò nú nǔɖɔɖ’ayǐ Biblu tɔn e jiwǔ lɛ é habǔ.
4. Nǔnywɛ xwitixwiti xò nǔ dó akpa ɖokpo ɔ mɛ xá Biblu
Ð’ayǐ ɔ, mɛ gegě ɖi nǔ ɖɔ ayikúngban ɔ ɖò nǔɖe jí. Xò VIDEO ɔ.
Kpɔ́n nǔ e è ɖɔ ɖò wema Jɔbu tɔn mɛ sín xwè 3 500 mɔ̌ ɖíe é. Xà Jɔbu 26:7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Etɛwu ɖɔ e è ɖɔ ɖɔ è kún sɔ́ ayikúngban ɔ ‘ɖó nǔɖe jí ó’ é ka jiwǔ tawun?
Xwè 200 mɔ̌ ɖíe tófí wɛ è wá mɔ nukúnnú jɛ huzuhuzu sín tuto e kúnkplá sin ɖò ayikúngban ɔ jí é mɛ ganji. Amɔ̌, kpɔ́n nǔ e Biblu ka ko ɖɔ sín xwè afatɔ́n mɔ̌kpan ɖíe é. Xà Jɔbu 36:27, 28, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Etɛ ka jiwǔ nú we ɖò tinmɛ enɛ e bɔkun sɔmɔ̌ é mɛ?
-
Wemafɔ enɛ lɛ e a xà dìn é ka zɔ́n bɔ a ɖeji dó Biblu wu d’eji à?
5. Biblu ɖɔ nǔ taji ɖé lɛ ɖ’ayǐ
Xà Ezayíi 44:27–45:2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Gǒflɛ́mɛ tɛ lɛ Biblu ka ɖɔ ɖ’ayǐ xwè 200 jɛ nukɔn nú hwenu e Babilɔnu j’ayǐ é?
Hwenuxó dó zǒgbe jí ɖɔ Axɔ́su Pɛsi tɔn Silusi kpo ahwankpá tɔn kpo yí toxo Babilɔnu tɔn ɖò 539 J.H.M. b tɔn. Ye lilɛ jɔ nú tɔ̀ e nɔ cyɔn alɔ toxo ɔ jí é. Ee ye gbɔn hɔntogbo e è jó dó nyi nuvo lɛ é nu bo byɔ toxo ɔ mɛ gudo é ɔ, ye yí toxo ɔ ma fun ahwan. Nukɔnmɛ ɖò xwè 2 500 gudo ɔ, Babilɔnu huzu dǒglin kaka jɛ égbé. Dìn ɔ, ɖ’ayi nǔ e Biblu ɖɔ ɖ’ayǐ é wu.
Xà Ezayíi 13:19, 20, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ nǔ e jɛ dó Babilɔnu jí é ka dó zǒgbe jijɛnu nǔɖɔɖ’ayǐ enɛ tɔn jí gbɔn?
Dǒglin Babilɔnu tɔn lɛ ɖò Irak égbé tɔn
6. Biblu ɖɔ nǔɖe lɛ ɖ’ayǐ bɔ mǐ ɖò mimɔ wɛ ɖò égbé
Biblu ɖɔ dó hwenu mǐtɔn wu ɖɔ é nyí “azǎn gudogudo tɔn lɛ.” (2 Timɔtée 3:1) Kpɔ́n nǔ e Biblu ɖɔ ɖ’ayǐ dó táan enɛ wu lɛ é:
Xà Matie 24:6, 7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Ninɔmɛ taji tɛ lɛ xó Biblu ka ɖɔ ɖɔ ye na tíìn ɖò azǎn gudogudo tɔn lɛ mɛ?
Xà 2 Timɔtée 3:1-5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Nɛ̌ mɛ gegě ka na nɔ wà nǔ gbɔn ɖò azǎn gudogudo tɔn lɛ mɛ bɔ Biblu ɖɔ?
-
Walɔ enɛ lɛ ɖětɛ lɛ wu a ka ko ɖ’ayi?
MƐÐÉ LƐ ÐƆ: “Biblu ɔ, wema e mɛ xɛxó lɛ kpo tangbló lɛ kpo ɖè é wɛ.”
-
Nú hwɛ ɔ, kúnnuɖenú agbɔ̌nnɔ tɛ ka xlɛ́ ɖɔ è sixu ɖeji dó Biblu wu?
ETƐ LƐ A KA KPLƆ́N?
Hwenuxó, nǔnywɛ xwitixwiti, kpo nǔɖɔɖ’ayi kpo bǐ wɛ xlɛ́ ɖɔ a sixu ɖeji dó Biblu wu.
Vɔ̌gbɔnji
-
Biblu ɔ, wema e mɛ xó nǔgbo lɛ ɖè é wɛ à, alǒ xɛxó lɛ?
-
Ali tɛ lɛ nu mɔ̌ nǔnywɛ xwitixwiti ka xò nǔ dó akpa ɖokpo ɔ mɛ xá Biblu ɖè?
-
A ka lin ɖɔ Biblu ɖɔ sɔgudo sín xó ɖ’ayǐ à? Tinmɛ.
KÍJÉ
Nǔɖe lɛ ɖò Biblu mɛ bo jɛ dò ɖò nǔnywɛ xwitixwiti linu wɛ à?
“Nǔnywɛ Xwitixwiti kpo Biblu kpo ka Xò Nǔ Dó Akpa Ðokpo ɔ Mɛ À?” (Xóta Ɛntɛnɛti jí tɔn)
“Azǎn gudogudo tɔn lɛ” sín wuntun lɛ ka lo?
“Nǔɖɔɖ’ayǐ Biblu Tɔn E Ðò Jijɛnu Wɛ Ðò Nukún Towe Mɛ lɛ É 6” (Atɔxwɛ [Flansegbe] 1er mai 2011)
Kpɔ́n lee nǔ ɖěɖee Biblu ɖɔ ɖ’ayǐ dó Acɛkpikpa Glɛki tɔn wu lɛ é jɛnu gbɔn é.
Kpɔ́n lee nǔɖɔɖ’ayǐ Biblu tɔn lɛ huzu linlin e nya ɖé nɔ ɖó dó Biblu wu é gbɔn é.
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
