A ka xà Atɔxwɛ yaɖeyaɖe e tɔ́n wá yì lɛ é ganji à? É nyɔ́, kpɔ́n ɖɔ a ka sixu na xósin nú nǔkanbyɔ elɔ lɛ à jí:

Kúnnuɖenú jinjɔn Biblu jí tɛ ka xlɛ́ ɖɔ Mawu nɔ sè wuvɛ̌ xá mǐ?

Hwenu e Izlayɛli-ví hwexónu tɔn lɛ nyí kannumɔ ɖò Ejipu é ɔ, Mawu mɔ nǔ jɛ ya e jì wɛ ye ɖè é wu bo sè wuvɛ̌ xá ye. (Tín. 3:7; Eza. 63:9) Mawu ɖó mǐ ɖó akpajlɛ éɖesunɔ tɔn mɛ, mɔ̌ mɛ ɔ, mǐ sixu nɔ sè wuvɛ̌ xá mɛ. Enyi mǐ na bo tlɛ mɔ ɖɔ mǐ kún jɛxa wanyiyi e Mawu nɔ ɖexlɛ́ mǐ é ó ɔ, É nɔ sè wuvɛ̌ xá mǐ.—wp18.3, wex. 8-9.

Nɛ̌ nǔkplɔnmɛ Jezu tɔn lɛ ka d’alɔ mɛ lɛ bɔ ye ɖu ɖò linlin agɔ ɖiɖó dó mɛ ɖevo lɛ wu jí gbɔn?

Ðò Jezu hwenu ɔ, Jwifu gegě nɔ ɖó linlin agɔ dó mɛ ɖevo lɛ wu. Klisu tɛɖɛ̌ nǔ e wu è ɖó hudo mɛɖéesɔ́hwe tɔn é jí, bo gbɛ́ goyiyi ɖó akɔ e mɛ è gosin é wu. É byɔ ahwanvu tɔn lɛ ɖɔ ye ni nɔ kpɔ́n yeɖée dó mɔ nɔví nɔví.—w18.06, wex. 9-10.

Etɛ nǔ e wu Mawu ma lɔn bonu Mɔyizi yì Akpádídó Yikúngban ɔ jí ǎ é ka sixu kplɔ́n mǐ?

Mɔyizi ɖó kancica syɛnsyɛn ɖé xá Jehovah. (Sɛ́n. 34:10) Ðibla yì vivɔnu xwè 40 e Izlayɛli-ví lɛ zán ɖò gbetótló mɛ é tɔn ɔ, ye hunhún nǔɖɔ azɔn wegɔ́ ɔ ɖó sin ɖè ǎ wu. Mawu ɖɔ nú Mɔyizi ɖɔ é ni ɖɔ xó nú só ɔ. Mɔyizi ka wà mɔ̌ ǎ, é nyɔ́ wà ɔ, é zin kpò dó só ɔ wu. Alixlɛ́mɛ Jehovah tɔn e Mɔyizi ma xwedó ǎ é, alǒ susu e é ma xɔ n’i ɖó nǔjiwǔ enɛ wu ǎ é sixu ko vɛ́ nú Jehovah. (Kɛ́n. 20:6-12) Nǔ enɛ e jɛ é ɖó na kplɔ́n mǐ ɖɔ tónúsíse nú Jehovah kpo susu xixɔ n’i kpo ɖò taji.—w18.07, wex. 13-14.

Enyi mǐ nɔ zɔ́n dó nǔ e ɖò wěxo lɛ é jí dó dá hwɛ nú mɛ ɔ, nɛ̌ é ka sixu flú mǐ blewun gbɔn?

Mɛ gegě nɔ zɔ́n dó nǔ atɔn elɔ lɛ e ɖò wěxo é wu dó dá hwɛ nú mɛ ɖevo lɛ: sinmɛ agbaza tɔn alǒ akɔ, dɔkunnɔ alǒ wamamɔnɔ nyínyí, kpo xwè kpo. É ɖò taji ɖɔ mǐ ni nɔ dó gǎn bo ma nɔ ɖè mɛ ɖě ɖó vo nú mɛ ɖě ó Mawu ɖɔhun. (Mɛ. 10:34, 35)—w18.08, wex. 8-12.

Ali tɛ lɛ nu Klisanwun mɛxomɔ lɛ ka sixu d’alɔ mɛ ɖevo lɛ ɖè?

Klisanwun mɛxomɔ e è ɖyɔ azɔ̌ tɔn é ɖé kpó ɖò akwɛ xɔ wɛ ɖò Mawu nukúnmɛ, gɔ́ na ɔ, é sixu lɛ́ bló nǔ gegě dó d’alɔ mɛ ɖevo lɛ. É sixu yì ba Klisanwun ɖé sín asú alǒ asì e nyí nǔmaɖitɔ́ é kpɔ́n, d’alɔ mɛ e awakanmɛ gbɔjɔ na lɛ é, kplɔ́n Biblu xá mɛ lɛ, kabǐ vlɔ́nkan nú sinsɛnzɔ́ tɔn.—w18.09, wex. 8-11.

Azɔ̌wanú tɛ lɛ Klisanwun lɛ ka ɖó ɖò Azɔ̌wanúgbá Mɛkplɔnkplɔn tɔn yetɔn mɛ?

Ye ɖó káti adlɛsi tɔn lɛ kpo mɛylɔwema lɛ kpo. Tlati e è sɔnǔ na ganji é tantɔn ɖ’emɛ, gɔ́ nú xójlawema Atɔxwɛ kpo Fɔ́n! kpo. Alɔnuwema ɖé lɛ, wema nǔkplɔnkplɔn tɔn taji we kpo video e nyɔ́ zán é ɛnɛ kpo lɛ́ ɖò azɔ̌wanúgbá ɔ mɛ. Video Etɛwu È ka Ðó Na Kplɔ́n Biblu? lɔ ɖò video enɛ lɛ mɛ.—w18.10, wex. 16.

Nɛ̌ Klisanwun ɖé ka sixu “xɔ nǔgbo,” lee Nǔnywɛxó 23:23 [nwt] byɔ mǐ gbɔn é gbɛn?

Mǐ nɔ sɔ́ akwɛ dó xɔ nǔgbo ɔ ǎ. Amɔ̌, mǐ ɖó na zán hwenu lobo dó gǎn bá dó sixu mɔ.—w18.11, wex. 4.

Etɛ lee Ozée wà nǔ xá asì tɔn Gomɛ́ɛ gbɔn é ka sixu kplɔ́n mǐ?

Gomɛ́ɛ dó afɔ gbě azɔn mɔkpan có, Ozée ka sɔ́ hwɛ kɛ ɛ b’ɛ kpó ɖò asì tɔn nyí wɛ. Enyi Klisanwun asú alǒ asì ɖé lɛ̀ aga ɔ, asú alǒ asì xomɛvɔnɔ ɔ sixu gbló ada nú hwɛsɔ́kɛ mɛ tɔn. Enyi asú alǒ asì xomɛvɔnɔ ɔ lɛ́vɔ ɖóxó xá hwɛhutɔ́ ɔ hǔn, hwɛjijɔ jinjɔn Biblu jí e wu é sixu zɔ́n dó bo gbɛ́ ɛ é na súnsún.—w18.12, wex. 13.