Enyi a ɖò wuvɛ̌ mɛ ɔ, é ɖò wɛn ɖɔ a na ɖó nukún ɖɔ xɔ́ntɔn ɖagbe ɖé ni wà nǔɖe dó d’alɔ we. Enɛ wu ɔ, mɛɖé lɛ nɔ ɖɔ ɖɔ Mawu kún nyí xɔ́ntɔn ɖé ó, ɖó ye nɔ mɔ ɖɔ é kún ɖò nǔtí wà dó ta emitɔn mɛ wɛ ó. Amɔ̌, è na ɖɔ xó jɔ xó ɔ, Mawu ko wà nǔ gegě nú lè mǐtɔn, enɛ kɛɖɛ ka wɛ ǎ, é na lɛ́ wà nǔɖe dó ɖeɖɛ tagba kpo wuvɛ̌ kpo e nɔ kpannukɔn mǐ égbé lɛ é bǐ. Etɛ lɛ Mawu ka na bló?

Mawu na ɖó nǔ nǔnyanyawiwa lɛ bǐ nu, gbɔn kún súsú dó nú mɛ e nyí jɔtɛn tɔn é gblamɛ. Biblu xlɛ́ mɛ e nyí jɔtɛn nǔ nyanya tɔn é, hwenu e é ɖɔ xó elɔ é: “Gbɛ̀ ɔ bǐ . . . ɖò Mɛnyanya ɔ sín acɛ mɛ.” (1 Jaan 5:19) “Mɛnyanya” enɛ sɔ́ nyí mɛ ɖevo zɛ mɛ e Jezu ylɔ́ ɖɔ “axɔsu gbɛmɛ fí tɔn” é wu ǎ, é wɛ nyí Satáan Awoví. (Jaan 12:31) Jɔ e dó nú gbɛ̀ ɔ wɛ Satáan ɖè é wɛ nyí ɖɔ ninɔmɛ blawǔ e mɛ ayikúngban ɔ ɖè é tɔn. Etɛ Mawu ka na wà?

Jehovah Mawu na wà nǔɖe zaanɖé dìn gbɔn Vǐ tɔn Jezu Klisu gblamɛ, bo na “hu acɛ nú awoví e ɖó acɛ e nɔ hu mɛ é.” (Eblée lɛ 2:14; 1 Jaan 3:8) Nǔgbo ɔ, Biblu xlɛ́ ɖɔ Awoví ɖesunɔ tuùn ɖɔ “hwenu kpɛɖé jɛn wɛ kpò” bɔ è na sú kún emitɔn dó. (Nǔɖexlɛ́mɛ 12:12) Mawu na lɛ́ sú kún dó nú mɛ ɖěɖee nɔ dɔn nǔ nyanya wá lɛ é bǐ.—Ðɛhan 37:9; Nǔnywɛxó 2:22.

Hwenu e Gbɛɖotɔ́ mǐtɔn na ɖè mɛ nyanya lɛ bǐ sín ayikúngban ɔ jí gudo é ɔ, é na bló bɔ linlin tɔn mavɔmavɔ e kúnkplá gbɛtɔ́ lɛ kpo ayikúngban ɔ kpo é na jɛnu. Etɛ lɛ mǐ ka sixu ɖó nukún?

Fífá kpo ayijayǐ e na nɔ ayǐ sɔyi é kpo. “[Ayikúngban] ɔ . . . na nyí mɛ e nɔ sɔ́ yeɖée hwe lɛ tɔn, bɔ fífá ma ɖó dogbó e ye na mɔ ɔ wɛ na nyí nǔ e na nɔ víví nú ye é.”​—Ðɛhan 37:11.

Nǔɖuɖu hunsin ɖagbe tɔn na túnflá. “Jì [na] jɛ ɖò tò ɔ mɛ kaka bo túnflá. Atín sínsɛ́n [na] bla ta nú só lɛ.”​—Ðɛhan 72:16.

Xɔ ɖagbeɖagbe lɛ kpo azɔ̌ e na jɛmɛ nú mɛ é kpo. “Ye na sá xwé bo nɔ ɛ mɛ. Ye na tun vǐwun bo na ɖu sínsɛ́n tɔn. . . . Mɛ e un sɔ́ lɛ ɔ, nǔ e ye sɔ́ alɔ yetɔn dó bló lɛ ɔ, ye na ɖu lè tɔn.”—Ezayíi 65:21, 22.

A ɖò biba wɛ bo na nɔ ninɔmɛ mɔhun mɛ à? Zaanɖé dìn ɔ, ye na nyí nǔ e sín vivǐ mɛ bǐ na nɔ ɖu hwebǐnu é.

Mǐ mɛ bǐ wɛ nɔ j’azɔn bo nɔ wá kú ɖò égbé, amɔ̌, é na nɔ mɔ̌ kaka sɔyi ǎ. Zaanɖé dìn ɔ, Mawu na bló bɔ mǐ na ɖu lè ɖěɖee vɔsisa gbɛxɔnúmɛ tɔn Jezu tɔn hɛn wá lɛ é, mɔ̌ mɛ ɔ, “mɛ e na ɖi nǔ n’i lɛ ɖebǔ [na] dɔn [ǎ]; loɔ, ye bǐ [na] mɔ gbɛ̀ mavɔmavɔ.” (Jaan 3:16) Etɛ mɛ é ka na tɔ́n kɔ dó?

Azɔn sɔ́ na tíìn ǎ. “Toví ɖé sɔ́ na ɖɔ: ‘Un ɖò azɔn jɛ wɛ’ ǎ. Togun Jeluzalɛmu tɔn ɔ, Mawu na sɔ́ hwɛ tɔn kɛ ɛ.”​—Ezayíi 33:24.

Kú sɔ́ na hu gbɛtɔ́ lɛ ɖě ǎ. “Mawu Mavɔmavɔ na sú kú sín kún dó kaka sɔyi; Aklunɔ mavɔmavɔ na súnsún ɖasin sín nukúnmɛ nú mɛ bǐ.”—Ezayíi 25:8.

Gbɛtɔ́ lɛ na nɔ gbɛ̀ kaka sɔyi. “Nǔ e Mawu nɔ na mɛ vɔ̌nu ɔ wɛ nyí gbɛ̀ mavɔmavɔ e mǐ ɖó ɖò bǔ e mǐ ɖè xá Klisu Jezu Aklunɔ mǐtɔn mɛ é.”—Hlɔmanu lɛ 6:23.

Mɛ ɖěɖee ko kú lɛ na fɔ́n. “Mawu na wá fɔ́n mɛ ɖagbe lɛ, kpodo mɛ nyanya lɛ kpo sín kú.” (Mɛsɛ́dó 24:15) Ye na ɖu lè nǔnina gbɛxɔnúmɛ tɔn Mawu tɔn.

Nɛ̌ Mawu ka na bló nǔ enɛ lɛ bǐ gbɔn?

Mawu na gbɔn acɛkpikpa jixwé tɔn e Jezu Klisu nyí Gǎn na é gblamɛ, bo na bló bɔ linlin e é ɖó nú gbɛtɔ́ lɛ kpo ayikúngban ɔ kpo é na jɛnu. (Ðɛhan 110:1, 2) Acɛkpikpa alǒ axɔsuɖuto e Jezu kplɔ́n ahwanvu tɔn lɛ ɖɔ ye ni xoɖɛ bo byɔ, kpo xógbe elɔ lɛ kpo é wɛ: “Tɔ́ mǐtɔn e ɖò [jixwé] ɔ, . . . Axɔsuɖuɖu towe ni wá.”​—Matie 6:9, 10.

Axɔsuɖuto Mawu tɔn na kp’acɛ dó ayikúngban ɔ jí, bo na sú kún dó nú awěxomɛ kpo wuvɛ̌ mimɔ lɛ bǐ kpo. Axɔsuɖuto enɛ wɛ nyí acɛkpikpa ɖagbe hugǎn e glɔ́ gbɛtɔ́ lɛ sixu nɔ é! Enɛ wu wɛ Jezu ván kan bo jla “axɔsuɖuɖu Mawu tɔn sín Wɛnɖagbe” ɖò sinsɛnzɔ́ tɔn ayikúngban jí tɔn ɔ hwenu, lobo ɖɔ nú ahwanvu tɔn lɛ ɖɔ ye ni wà nǔ ɖokpo ɔ.​—Matie 4:23; 24:14.

Wanyiyi ɖaxó e Jehovah Mawu ɖó nú mǐ mɛ gbɛtɔ́ lɛ é zɔ́n bɔ é d’akpá ɖɔ emi na bló nǔjiwǔ enɛ lɛ bǐ nú mǐ. Enɛ na zɔ́n bɔ a na ba na tuùn i, bo sɛkpɔ ɛ à cé? Enyi a wà mɔ̌ ɔ, lè tɛ é ka na hɛn wá nú we? Xóta e bɔ d’ewu é na tinmɛ.