“Hǔn mi bo nɔ acéjí, ɖó mi tuùn azǎn ɔ ǎ, mi ka tuùn gan ɔ mɛ ǎ.”—MATIE 25:13.

“Mi cɔ́ miɖée, bo ɖò acéjí, ɖó mi tuùn hwe ɔ nu ǎ.”—MAKI 13:33.

Enɛ wu ɔ, mɛɖé ɖò ayikúngban ɔ jí, bo tuùn hwenu e gbɛ̀ elɔ na vɔ dó é pɛ́pɛ́pɛ́ ǎ. Amɔ̌, Mawu ko ɖè hwenu e nǔ na nyí mɔ̌ é, enɛ wɛ nyí “azǎn ɔ” kpo “gan” e mɛ gbɛ̀ elɔ na vɔ dó é kpo. (Matie 24:36) Enɛ xlɛ́ ɖɔ enyi gbɛ̀ elɔ sín vivɔnu ɖò sisɛkpɔ́ wɛ ɔ, è kún sixu tuùn ɖebǔ lálá ó wɛ à? Ðebǔ ǎ. Jezu ɖɔ nú ahwanvu tɔn lɛ ɖɔ ye ni ɖó nukún ɖɔ nǔ gegě na jɛ bo na xlɛ́ ɖɔ gbɛ̀ elɔ sín vivɔnu ko ɖò kɛnnɛkɛnnɛ.

Nǔ enɛ lɛ nyí wuntun e na xlɛ́ ‘hwenu e gbɛ̀ elɔ na vɔ dó é.’ Jezu ɖɔ: “Akɔta ɖě na site dó ɖě jí, bɔ axɔ́suɖuto ɖě na site dó ɖě jí; adɔ na tɔ́n, bɔ ayikúngban na dánwǔ gbɔn fí tɛnmɛ tɛnmɛ.” (Matie 24:3, 7) É lɛ́ ɖɔ ɖɔ jɛmɛji lɛ na tíìn. (Luki 21:11) A ka ɖò nǔ e xó Jezu ɖɔ ɖ’ayǐ lɛ é mɔ wɛ à?

Ahwan e nɔ gbà nǔ tawun lɛ é, adɔ kpo ayikúngban dánwǔ kpo gɔ́ nú azɔn ɖě jɛ ɖě gudo lɛ ko hɛn nǔ gegě gblé ɖò hwe mǐtɔn nu. Ði kpɔ́ndéwú ɔ, ɖò 2004 ɔ, ayikúngban dánwǔ syɛnsyɛn ɖò xù Inde tɔn ɔ mɛ, bo zɔ́n bɔ jɔhɔn ɖaxó e è nɔ ylɔ́ ɖɔ tsunami é nyi, bo hu gbɛtɔ́ 225 000 mɔ̌. Ðò xwè atɔn vlamɛ ɔ, jɛmɛji Covid-19 ko hu gbɛtɔ́ livi 6,9 gbɔn gbɛ́ ɔ bǐ mɛ. Jezu ɖɔ ɖɔ nǔ mɔ̌hun lɛ na xlɛ́ ɖɔ gbɛ̀ elɔ sín vivɔnu ko sɛya.

Biblu ylɔ́ táan e na jɛ nukɔn zaan nú vivɔnu gbɛ̀ elɔ tɔn é ɖɔ “azǎn gudogudo tɔn lɛ.” (2 Piyɛ́ɛ 3:3, 4) Timɔtée wegɔ́, wemata atɔn, wemafɔ nukɔntɔn jɛ atɔ́ɔ́n ɖɔ ɖɔ ɖò azǎn gudogudo tɔn lɛ mɛ ɔ, mɛ lɛ sɔ́ na ɖó walɔ ɖagbe ǎ. (Kpɔ́n gbǎví “ Táan Klewun ɖé Jɛ Nukɔn nú Vivɔnu gbɛ̀ Elɔ Tɔn.”) A ka nɔ ɖ’ayi cejɛnnabinɔ lɛ, nukúnkɛ́nnɔ lɛ, dakaxotɔ́ lɛ kpo mɛ e ma nɔ wà nǔ xá yeɖée kpo wanyiyi kpo ɖò égbé ǎ lɛ é wu à? Enɛ lɔ xlɛ́ ɖɔ mǐ ko ɖò kɛnnɛkɛnnɛ nú vivɔnu gbɛ̀ elɔ tɔn.

Táan nabi azǎn gudogudo tɔn lɛ ka na bló? Sɔgbe xá nǔ e Biblu ɖɔ é ɔ, “hwenu kpɛɖé” jɛn é na nɔ ayǐ na. Enɛ gudo ɔ, Mawu na sú “mɛ e nɔ hɛn ayikúngban ɔ gblé lɛ sín kún dó.”—Nǔɖexlɛ́mɛ 11:15-18; 12:12.

Mawu ko sɔ́ azǎn e gbè é na sú kún dó nú gbɛ̀ nyanya elɔ é kpo gan ɔ mɛ kpo. (Matie 24:36) Amɔ̌, wɛnɖagbe ɖevo tíìn: Mawu “jló ɖɔ mɛ ɖebǔ ni dɔn ǎ.” (2 Piyɛ́ɛ 3:9) É hun ali nú gbɛtɔ́ lɛ bonu ye na kplɔ́n nǔ dó jlǒ tɔn wu, lobo setónú n’i. Aniwu? Ðó é ba ɖɔ mǐ ni xò gbɛ̀ nyanya elɔ zlɛ́, bo byɔ gbɛ̀ yɔyɔ̌ ɔ mɛ, hwenu e ayikúngban ɔ na huzu palaɖisi é.

Mawu bló tuto bonu è na kplɔ́n nǔ mɛ lɛ gbɔn gbɛ̀ ɔ bǐ mɛ dó d’alɔ ye bonu ye na kplɔ́n nǔ e ye sixu wà bo na nɔ gbɛ̀ ɖò Axɔ́suɖuto tɔn mɛ é. Jezu ɖɔ ɖɔ è na jlá wɛnɖagbe e kúnkplá Axɔ́suɖuto Mawu tɔn é “gbɔn gbɛ̀ ɔ bǐ mɛ.” (Matie 24:14) Kúnnuɖetɔ́ Jehovah tɔn e gbɔn gbɛ̀ ɔ bǐ mɛ lɛ é zán ganxixo liva mɔkpan dó jlá wɛn nukúnɖiɖó tɔn e ɖò Biblu mɛ é, bo lɛ́ kplɔ́n nǔ mɛ lɛ. Jezu ɖɔ ɖɔ è na jlá wɛn enɛ gbɔn ayikúngban ɔ bǐ jí cobɔ gbɛ̀ ɔ na vɔ.

Azǎn kaka ɖé sɔ́ kpò ɖò gban jí nú acɛkpatɔ́ égbé tɔn lɛ ǎ. Amɔ̌, wɛnɖagbe ɖé tíìn, enɛ wɛ nyí ɖɔ a sixu xò vivɔnu gbɛ̀ elɔ tɔn zlɛ́, bo na byɔ Palaɖisi ayikúngban jí tɔn e sín akpá Mawu dó é mɛ. Xóta e bɔ d’ewu é na ɖɔ xó dó nǔ e a sixu wà bo na nɔ gbɛ̀ yɔyɔ̌ enɛ mɛ é jí.