Gbɛtɔ́ gegě ɖò gbɛ̀ ɔ mɛ bo ɖò nǔɖuɖu kpo xɔ kpo sín hudo mɛ. Nú mɛɖé lɛ ɔ, nukúnɖiɖó sɔgudo tɔn sín hudo jɛn ye ɖó. Nɛ̌ gǎn e mǐ nɔ dó bo na d’alɔ mɛ mɔ̌hun lɛ é na zɔ́n bɔ nǔ mǐtɔn na nyɔ́ Mawu nukúnmɛ, bɔ é na lɛ́ kɔn nyɔna dó mǐ jí gbɔn?

“Mɛ e nɔ na nǔ wamamɔnɔ ɔ, nǔ wɛ é nya nú Mawu Mavɔmavɔ; Mawu na na ajɔ tɔn ɛ.”—NǓNYWƐXÓ 19:17.

Jezu dó lǒ ɖé dó nya e ajotɔ́ lɛ xò bo jó dó nyi beɖebeɖe é wu. (Luki 10:29-37) Alɔdómɛtɔ́ jonɔ ɖé nɔte bo kpé nukún dó nya e gblewǔ vantankánnyá é wu. É gosin akɔta ɖevo mɛ có, é ka wà mɔ̌.

É nyí nukún kɛɖɛ wɛ nya xomɛnyɔtɔ́ ɔ yawǔ kpé dó dawe e gblewǔ é wu ǎ, loɔ, é lɛ́ dó gbɔ n’i, bo bló bɔ é mɔ kɔ dó sá fún ɖò wuvɛ̌ tɔn mɛ.

Etɛ lǒ enɛ ka kplɔ́n mǐ? Jezu ɖò xíxlɛ́ wɛ ɖɔ mǐ ɖó na d’alɔ mɛ e ɖò hudo mɛ lɛ é ɖò ali e nu mǐ kpéwú ɖè lɛ é bǐ. (Nǔnywɛxó 14:31) Nǔwlanwlán Mímɛ́ lɛ kplɔ́n mɛ ɖɔ zaanɖé dìn ɔ, Mawu na bló bɔ ya kpo wuvɛ̌ mimɔ kpo na vɔ. Amɔ̌, mǐ sixu kanbyɔ mǐɖée ɖɔ, nɛ̌ Mawu ka na wà mɔ̌ gbɔn? Hwetɛnu é ka na wà mɔ̌? Xóta e bɔ d’ewu é na ɖɔ xó dó nyɔna ɖěɖee Gbɛɖotɔ́ wanyiyinɔ towe sɔ́ ɖó sɛxwetɛn nú we lɛ é jí.