1. Nɛ̌ xó ɖiɖɔ dó lěe mǐ mɔ “nǔgbó ɔ” gbɔn é wú ka nɔ wa ɖagbe nú mǐ gbɔn?

 “NƐ̌ A ka mɔ nǔgbó ɔ gbɔn?” É ɖo wɛn ɖɔ a ná ko ná xósin nú nǔkanbyɔ́ énɛ́ azɔn mɔ̌kpán. Nǔ nukɔntɔn e nǔɖitɔ́ hǎtɔ́ ɖé ná kanbyɔ́ we hwenu e mi xo go miɖée bo ba ná tuun miɖée ganjí é ɖokpó nɛ́. Mǐ nɔ ba ná se lěe nɔví mǐtɔn lɛ́ wá tuun Jexóva bo lɛ́ yí wǎn n’i gbɔn é, bɔ lěe mǐ yí wǎn nú nǔgbó ɔ gbɔn é ɖiɖɔ nú yě nɔ lɛ́ víví nú mǐ. (Hlɔ̌. 1:11) Xóɖɔɖókpɔ́ énɛ́ lɛ́ nɔ flín mǐ lě do nǔgbó ɔ xɔ akwɛ́ sɔ é. Mǐ tlɛ nɔ lɛ́ kán ɖ’é jí hú gǎn bo ná kpo ɖo “gbɛ zán wɛ ɖo nǔgbó mɛ,” énɛ́ wɛ nyí ɖɔ mǐ nɔ kpo ɖo gbɛ zán wɛ ɖo ali ɖé nu bá mɔ tɛn dó ɖu nyɔ̌ná Jexóva tɔn lɛ́ sín le, lobɔ nǔ mǐtɔn ná lɛ́ nyɔ́ nukún tɔn mɛ.—3 Jaan 4.

2. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Ðo xóta élɔ́ mɛ ɔ, mǐ ná gbéjé hwɛjijɔ e wú mǐ yí wǎn nú nǔgbó ɔ é ɖé lɛ́ kpɔ́n. Énɛ́ gúdo ɔ, mǐ ná ɖɔ xó dó lěe mǐ sixú kpo ɖo wǎn e mǐ yí nú nǔníná xɔ akwɛ́ énɛ́ é ɖe xlɛ́ wɛ gbɔn é jí. É ɖo wɛn ɖɔ nǔ vovo e mǐ ná gbéjé kpɔ́n lɛ́ é ná bló bɔ dɔn e Jexóva dɔn mǐ wá nǔgbó ɔ mɛ é ná lɛ́ su nukún mǐtɔn mɛ d’é jí. (Jaan 6:44) É ná lɛ́ bló bɔ jlǒ e mǐ ɖó bo ná nɔ má nǔgbó ɔ xá mɛ ɖěvo lɛ́ é ná lɛ́ gɔ́ngɔ́n d’é jí.

3. Ðɔ hwɛjijɔ tají hú gǎn e wú mǐ yí wǎn nú nǔgbó ɔ é.

³ Hwɛjijɔ gěgé wú wɛ mǐ yí wǎn nú nǔgbó ɔ. Tají hú gǎn ɔ wɛ nyí ɖɔ mǐ yí wǎn nú Jexóva Mawu e nyí Jɔtɛn nǔgbó ɔ tɔn é. Xó tɔn Biblu ɔ d’alɔ mǐ bɔ mǐ tuun ɖɔ é wɛ bló jǐnukúnsin kpó ayǐkúngban kpó, bo lɛ́ nyí Tɔ́ mǐtɔn jǐxwé tɔn wǎnyíyínɔ e nɔ kpé nukún dó mǐ wú é.  (1 Pi. 5:7) Mǐ tuun ɖɔ Mawu mǐtɔn nyí ‘Mawu nǔbláwǔkúnúmɛtɔ́, Mawu xomɛfátɔ́; é nɔ yá wǔ sin xomɛ ǎ, bo nyí Mawu xomɛnyɔ́tɔ́, Mawu gbejínɔtɔ́.’ (Tín. 34:6) Jexóva yí wǎn nú nǔjlɔ́jlɔ́wiwa. (Eza. 61:8) Ényí é mɔ bónú mǐ ɖo wǔvɛ́ se wɛ ɔ, é nɔ vɛ́ n’i tawun; bɔ é ɖo gbesisɔmɛ, ɛɛn, akpakpa ɖo sísɔ́ ɛ wɛ bɔ é ná ɖó nǔ wǔvɛ́ mǐtɔn lɛ́ bǐ nu ɖo hwenu e é ɖó dó é. (Jel. 29:11) É jí wǔ kpɔ́n! É ɖo wɛn ɖɔ mǐ yí wǎn nú Jexóva tawun!

4-5. Étɛ́wú mɛsɛ́dó Pɔ́lu ka jlɛ́ nukúnɖíɖó mǐtɔn dó gandótɔnu wú?

⁴ Hwɛjijɔ ɖěvo tɛ́ wú mǐ ka yí wǎn nú nǔgbó ɔ? Nǔgbó ɔ nɔ hɛn le gěgé wá nú mǐ. Ð’ayi kpɔ́ndéwú élɔ́ wú. Nukúnɖíɖó sɔgúdo tɔn mǐtɔn ɖo nǔgbó Biblu tɔn lɛ́ mɛ. Bo ná dó ɖe lě do nukúnɖíɖó énɛ́ xɔ akwɛ́ sɔ é xlɛ́ ɔ, mɛsɛ́dó Pɔ́lu wlán ɖɔ: “Nukúnɖíɖó énɛ́ ɔ nɔ hɛn lǐndɔ̌n mǐtɔn syɛ́nsyɛ́n, lěe gandótɔnu nɔ hɛn tɔjíhún syɛ́nsyɛ́n ɖó te gbɔn é.” (Ebl. 6:19) Lěe gandótɔnu nɔ hɛn tɔjíhún ɖó te gbɔn é ɔ, nukúnɖíɖó e mǐ ɖó bɔ é jínjɔ́n Biblu jí é sixú zɔ́n bɔ mǐ gbí dɔn ɖo gbɛ mɛ wúvɛ́ mǐtɔn lɛ́ nukɔn.

⁵ Ðo ninɔmɛ élɔ́ mɛ ɔ, nukúnɖíɖó jǐxwé tɔn e nɔ xɔ akwɛ́ tawun nú klisánwun yí ami dó ɖe lɛ́ é xó ɖɔ wɛ Pɔ́lu ɖe. Amɔ̌, xó énɛ́ lɛ́ e é ɖɔ lɛ́ é lɛ́ kan klisánwun ɖěɖěe ɖo nukún ɖó wɛ bá nɔ gbɛ káká sɔ́yi ɖo palaɖísi mɛ ɖo ayǐkúngban jí lɛ́ é lɔmɔ̌. (Jaan 3:16) É ɖo wɛn ɖɔ nǔ kplɔ́nkplɔ́n dó nukúnɖíɖó gbɛ mavɔmavɔ tɔn wú nɔ zɔ́n bɔ gbɛzán mǐtɔn nɔ ɖó nu.

6-7. Ðagbe tɛ́ nǔgbó ɔ e Yvonne kplɔ́n dó sɔgúdo wú é ka wa n’i?

⁶ Ð’ayi kpɔ́ndéwú nɔví nyɔ̌nu e nɔ nyí Yvonne é tɔn wú. É su ɖo nǔgbó ɔ mɛ ǎ, bɔ hwenu e é ɖo vǔ é ɔ, é nɔ ɖi xɛsi nú kú. É nɔ flín nukɛgbe élɔ́ e cí ayi tɔn mɛ é: “Gbe ɖokpó ná wá su bɔ mɛ lɛ́ bǐ ná kú.” É ɖɔ: “Xógbe énɛ́ lɛ́ zɔ́n bɔ un sɔ́ sixú nɔ d’amlɔ ǎ, bo nɔ ɖo tamɛ lin dó sɔgúdo wú wɛ. Un lin ɖɔ ‘é kún nyí nǔ e gbɛ nyí é bǐ ɖíe ó. Aniwú un ka ɖo gbɛ ɔ mɛ?’ Un ba ná kú ǎ!”

⁷ Nukɔnmɛ, hwenu e Yvonne wínnyá é ɔ, é wá xo go Kúnnuɖetɔ́ Jexóva tɔn lɛ́. É ɖɔ: “Un wá jɛ nukúnnú mɔ jɛ mɛ jí ɖɔ un sixú ɖó nukúnɖíɖó ɔ bo ná nɔ gbɛ káká sɔ́yi ɖo palaɖísi mɛ ɖo ayǐkúngban jí.” Nɛ̌ nǔgbó ɔ kplɔ́nkplɔ́n ka wa ɖagbe nú nɔví nyɔ̌nu mǐtɔn gbɔn? É ɖɔ gɔ́ ná ɖɔ: “Un sɔ́ nɔ ɖo wunzɛn, bo nɔ ɖo adohu adohu jí dó sɔgúdo alǒ kú wú ɖě ǎ.” Lěe a sixú ko dó nukúnmɛ kpɔ́n gbɔn é ɔ, nǔgbó ɔ xɔ akwɛ́ nú Yvonne tawun, bɔ xó ɖiɖɔ nú mɛ ɖěvo lɛ́ dó nukúnɖíɖó sɔgúdo tɔn e é ɖó é wú nɔ hun xomɛ n’i tawun.—1 Tim. 4:16.

8-9. (a) Ðo lǒ Jezu tɔn lɛ́ ɖokpó mɛ ɔ, nɛ̌ do dɔkun e nya ɖé mɔ é ka xɔ akwɛ́ nukún tɔn mɛ sɔ? (b) Nɛ̌ do nǔgbó ɔ ka xɔ akwɛ́ nú we sɔ?

⁸ Wɛn ɖagbe e kúnkplá Axɔ́súɖuto Mawu tɔn é lɔ ɖo nǔgbó Biblu tɔn lɛ́ mɛ. Jezu jlɛ́ nǔgbó e kúnkplá Axɔ́súɖuto ɔ é dó dɔkun e ɖo hwlǎhwlá é ɖé wú. Sɔgbe xá Matíe 13:44 ɔ, Jezu ɖɔ: “Axɔ́súɖuto jǐxwé tɔn cí dɔkun e ɖo hwlǎhwlá ɖo gle ɖé mɛ, bɔ nya ɖé mɔ bo lɛ́vɔ́ sɔ́ hwlá é ɖɔhun. É víví n’i káká bɔ é yi bo sa nǔ e é ɖó lɛ́ é bǐ, bo xɔ gle énɛ́.” Ð’ayi wú ɖɔ nya ɔ kún ko ɖo dɔkun ɔ ba wɛ ɖ’ayǐ ó. Amɔ̌, ée é mɔ é ɔ, é sɔ́ nǔ gěgé dó sá vɔ̌ bónú é ná dó jɛ así tɔn. Nǔgbó ɔ, é sa nǔ e é ɖó lɛ́ é bǐ. Aniwú? Ðó é tuun ɖɔ nǔ e émí mɔ é xɔ akwɛ́ tawun. É xɔ akwɛ́ hú nǔ ɖěbǔ e é ná sɔ́ dó sá vɔ̌ é flaflá tɔn.

⁹ Lěe nǔ nɔ cí nú we dó nǔgbó ɔ wú é nɛ́ a? É ɖo wɛn ɖɔ mɔ̌ wɛ! Mǐ tuun ɖɔ è kún sixú sɔ́ nǔ e gbɛ élɔ́ nɔ xwlé mɛ é ɖěbǔ jlɛ́ dó nǔ élɔ́ lɛ́ wú ó: awǎjijɛ e Jexóva sinsɛn  nɔ hɛn wá nú mǐ din é kpó nukúnɖíɖó gbɛ mavɔmavɔ tɔn e mǐ ɖó ɖo sɔgúdo ɖo hwenu e Axɔ́súɖuto ɔ ná jɛ acɛ kpa jí é kpó. Wǔ e è jɔ mǐ bɔ mǐ ná zun xɔ́ntɔn vívɛ́ xá Jexóva é xɔ akwɛ́ hú vɔ̌ ɖěbǔ e mǐ ná sá é flaflá tɔn. Nǔ e nɔ d’awǎjijɛ nú mǐ hú gǎn é wɛ nyí ɖɔ mǐ ní nɔ wa “nǔ e nɔ́ nyɔ́ nukún tɔn mɛ ɔ hwebǐnu.”—Koló. 1:10.

10-11. Étɛ́ ka sísɛ́ Michael bɔ é húzú lěe zán gbɛ tɔn gbɔn wɛ é ɖe é?

¹⁰ Mǐ mɛ gěgé sá vɔ̌ tawun tawun ɖé lɛ́ bónú nǔ mǐtɔn ní dó sixú nyɔ́ Jexóva nukúnmɛ. Mɛɖé lɛ́ jó azɔ̌ e yě ná wa bá mɔ akwɛ́ gěgé ɖo gbɛ ɔ mɛ lɛ́ é dó. Mɛ ɖěvo lɛ́ jó dɔkun gbé nyinya dó. Mɛ ɖěvo lɛ́ húzú lěe yě nɔ zán gbɛ gbɔn ɖ’ayǐ é bǐ mlɛ́mlɛ́, hwenu e yě kplɔ́n nǔ dó Jexóva wú é. Nǔ e Michael wa é nɛ́. È ji i dó nǔgbó ɔ mɛ ǎ. Hwenu e é ɖo wǐnnyáwínnyá mɛ é ɔ, è kplɔ́n ɛ lěe è nɔ nyi akpotokwín gbɔn é. É ɖɔ: “Un nɔ gó, ɖó hwǎn e un hwán é wú. Hweɖélɛ́nu ɔ, un nɔ mɔ ɖɔ mɛɖé kún sixú kpé wǔ ce ó.” Amɔ̌, hwenu e Michael jɛ Biblu kplɔ́n jí é ɔ, é kplɔ́n nǔ dó linlin e Jexóva nɔ ɖó dó dǎkaxixo wú é wú. (Ðɛh. 11:5) Michael ɖɔ dó asú kpó asi kpó Kúnnuɖetɔ́ e kplɔ́n nǔ xá ɛ lɛ́ é wú ɖɔ: “Yě ɖɔ nú mì gbeɖé ɖɔ nyi ní ɖó akpotokwín nyinyi te ǎ; nǔ e yě wa kpowun é wɛ nyí ɖɔ yě ɖó kan dó nǔgbó Biblu tɔn lɛ́ kplɔ́nkplɔ́n mì wú.”

¹¹ Lě do Michael kplɔ́n nǔ dó Jexóva wú sɔ é ɔ, mɔ̌ do wɛ wǎn e é yí n’i é nɔ jɛjí sɔ. Wǔvɛ́ e Jexóva nɔ se xá mɛsɛntɔ́ tɔn lɛ́ é wɛ jí wǔ n’i hú gǎn. Hwenu ɖo yiyi wɛ é ɔ, Michael mɔ ɖɔ é byɔ́ ɖɔ émí ní wá gbeta ɔ kɔn bá húzú lěe zán gbɛ gbɔn wɛ émí ɖe é. É ɖɔ: “Un tuun ɖɔ akpotokwín nyinyi jíjódó wɛ nyí nǔ e ná vɛ́ wǔ hú gǎn bɔ un ma ko wa kpɔ́n ǎ é. Amɔ̌, un lɛ́ tuun ɖɔ é ná dó xomɛhunhun nú Jexóva, bɔ un kú d’é jí ɖɔ vɔ̌ ɖěbǔ e un ná sá dó sɛn ɛ é sɔ mɔ̌ kɔ.” Nǔgbó e Michael mɔ é xɔ akwɛ́ n’i tawun, bɔ énɛ́ sísɛ́ ɛ lobɔ é bló hǔzúhúzú tají lɛ́ ɖo gbɛzán tɔn mɛ.—Ja. 1:25.

12-13. Nɛ̌ nǔgbó Biblu tɔn lɛ́ ka d’alɔ Mayli gbɔn?

¹² Bo ná dó ɖe lěe nǔgbó ɔ xɔ akwɛ́ sɔ é xlɛ́ ɔ, Biblu sɔ́ nǔgbó ɔ jlɛ́ dó zogbɛ́n e ɖo wěziza ná wɛ ɖo ablu mɛ é wú. (Ðɛh. 119:105; Efɛ́. 5:8) Alɔ e Xó Mawu tɔn dó Mayli e nɔ nɔ Azerbaijan é su nukún tɔn mɛ tawun. Xwédo e klán ɖo sinsɛn lixo é mɛ wɛ é su ɖe. Malɛnu wɛ nyí tɔ́ tɔn, bɔ nɔ tɔn nyí Jwifu. É ɖɔ: “Un xo nǔ kpɔ́n dó tíin e Mawu tíin é wú kpɔ́n ǎ có, nǔkanbyɔ́ gěgé wɛ nɔ ɖu ayi mɛ nú mì. Un nɔ kanbyɔ́ nyiɖée ɖɔ: ‘Aniwú Mawu ka dá gbɛtɔ́ lɛ́? Étɛ́wú mɛɖé ka ná ji ya ɖo gbɛzán tɔn bǐ mɛ bɔ wǎgbɔ tɔn ɔ, è ka ná lɛ́ wá dɔn tó n’i káká sɔ́yi ɖo zojimací mɛ?’ Ðó nú nǔ ɖěbǔ jɛ ɔ, jlǒ Mawu tɔn wɛ é nɔ nyí bɔ mɛ lɛ́ nɔ ɖɔ wú ɔ, un nɔ kanbyɔ́ nyiɖée ɖɔ: ‘Nukún kpé dó gbɛtɔ́ lɛ́ wú wɛ jɛ́n Mawu ɖe bɔ ényí yě ɖo wǔvɛ́ mɔ wɛ ɔ, é nɔ ɖo yě kpɔ́n wɛ bɔ é nɔ víví n’i a?’”

¹³ Mayli kpo ɖo xósin ba nú nǔkanbyɔ́ tɔn lɛ́ wɛ. Hweɖénu wá sú bɔ é yí gbe bo jɛ Biblu kplɔ́n jí, bɔ nukɔnmɛ ɔ, é wá húzú Kúnnuɖetɔ́ Jexóva tɔn. É ɖɔ: “Lěe Biblu ɔ xwe ali, bo lɛ́ ɖu ɖo mɛ jí gbɔn é d’alɔ mì bɔ un ɖó awǎjijɛ hú gǎn. Tínmɛ ɖejidéwú e un mɔ ɖo Xó Mawu tɔn mɛ lɛ́ é d’alɔ mì bɔ un ɖó fífá ayi mɛ tɔn.” Mayli ɖɔhun ɔ, mǐ bǐ wɛ nɔ kpa susu nú Jexóva ‘e ylɔ́ mǐ nú mǐ ná gosín ablu mɛ, bo wá wěziza tɔn ɖagbe ɖagbe ɔ nu’ é.—1 Pi. 2:9.

14. Nɛ̌ mǐ ka sixú bló gbɔn bɔ wǎn e mǐ yí nú nǔgbó ɔ é ná jɛjí? (Lɛ̌ kpɔ́n gbǎví “ Nǔjlɛ́dónǔwú ɖěvo lɛ́.”)

¹⁴ Kpɔ́ndéwú e xlɛ́ lěe nǔgbó Biblu tɔn lɛ́ xɔ akwɛ́ sɔ é kléwún ɖé kpowun nɛ́. É ɖo wɛn ɖɔ, ayi towe sixú ko lɛ́ yi gěgé  ɖěvo lɛ́ jí. Étɛ́wú a ma ka ná bló tuto bo gbéjé hwɛjijɔ ɖěvo e wú mǐ ɖó ná yí wǎn nú nǔgbó ɔ é ɖé lɛ́ kpɔ́n ɖo nǔkplɔ́nkplɔ́n mɛɖésúnɔ tɔn towe hwenu ǎ? Mɔ̌ wiwa ná zɔ́n bɔ wǎn e a yí nú nǔgbó ɔ é ná lɛ́ gɔ́ngɔ́n d’é jí. Lě do mǐ yí wǎn nú nǔgbó ɔ sɔ é ɔ, mɔ̌ do wɛ mǐ ná nɔ mɔ ali e nu mǐ ná nɔ xlɛ́ ɖɔ mǐ yí wǎn nú nǔgbó ɔ ɖe lɛ́ é sɔ é nɛ́.

15. Ðɔ ali e nu mǐ sixú ɖe wǎn e mǐ yí nú nǔgbó ɔ é xlɛ́ ɖe é ɖokpó.

¹⁵ Ényí mǐ nɔ kplɔ́n Biblu kpó wěma mǐtɔn lɛ́ kpó hwɛhwɛ hǔn, xlɛ́xlɛ́ wɛ mǐ ɖe ɖɔ mǐ yí wǎn nú nǔgbó ɔ nɛ́. È ná ɖɔ ɔ, nú mǐ ná bo tlɛ ɖo nǔgbó ɔ mɛ bónú é ko lín ɔ, hwebǐnu wɛ mǐ ɖó ná kpo ɖo nǔ kplɔ́n d’é jí wɛ. Xójláwéma élɔ́ nukɔn nukɔntɔn e tɔ́n é ɖɔ: “Nǔgbó ɔ cí folówa kpɛví e ɖo jlɛ̌ jí é ɖé ɖɔhun ɖo gbɛ e cí gbětótló ɖɔhun é mɛ, bɔ nǔwanyido e cí gběhan mú e ɖo vunvun wɛ lɛ́ é ɖɔhun é lɛ́ lɛ̌ dó, bo ɖibla fyɔ́n hu. Ényí a jló ná mɔ ɔ, a ɖó na ɖo biba wɛ hwebǐnu. . . . Ényí a jló ná ɖó ɔ, a ɖó ná fɛ yi do, bo gbɛ. Ma nɔ te ɖó folówa nǔgbó ɔ tɔn ɖokpó e a ko ɖó é jí ó. . . . Ðo xixokplé wɛ, ba ɖěvo lɛ́ gɔ́ ná.” Nǔkplɔ́nkplɔ́n nɔ d’ayihún ǎ, amɔ̌, gǎn e mǐ ná dó dó wa mɔ̌ é ná gú mǐ gbeɖé ǎ.

16. Wlɛnwín nǔkplɔ́nkplɔ́n tɔn tɛ́ a ka mɔ ɖɔ é nɔ w’azɔ̌ hú gǎn? (Nǔnywɛ́xó 2:4-6)

 ¹⁶ Mǐ bǐ wɛ nɔ yí wǎn nú nǔxixa kpó nǔkplɔ́nkplɔ́n kpó ǎ. Amɔ̌, Jexóva byɔ́ mǐ ɖɔ mǐ ní “ba” nukúnnúmɔjɛnǔmɛ nǔgbó ɔ tɔn e gɔ́ngɔ́n é, bo lɛ́ “nya gbě tɔn” bá mɔ tɛn dó mɔ nǔ jɛ mɛ ganjí. (Xa Nǔnywɛ́xó 2:4-6.) Ényí mǐ ka dó gǎn mɔ̌hun ɔ, hwebǐnu wɛ mǐ nɔ ɖu le tɔn. Corey ɖɔ dó Biblu kplɔ́nkplɔ́n mɛɖésúnɔ tɔn tɔn wú ɖɔ émí nɔ sɔ́ ayi ɖó wěmafɔ ɖokpó ɖokpó jí sín hweɖénu jɛ hweɖénu. É tínmɛ ɖɔ: “Un nɔ xa tínmɛ e ɖo do lɛ́ é bǐ, kpɔ́n alɔdlɛ́ndónǔ ɖěvo e cá kan xá wěmafɔ ɔ lɛ́ é, bo nɔ lɛ́ ba do nú nǔ d’é jí. . . . Wlɛnwín nǔkplɔ́nkplɔ́n tɔn énɛ́ e un nɔ zán é hɛn le gěgé wá nú mì!” Ényí wlɛnwín énɛ́ alǒ ɖěvo wɛ mǐ nɔ zán, bo ka nɔ zán hwenu, lobo nɔ lɛ́ dó gǎn dó kplɔ́n nǔgbó ɔ ɔ, mǐ nɔ xlɛ́ ɖɔ é xɔ akwɛ́ ɖo nukún mǐtɔn mɛ.—Ðɛh. 1:1-3.

17. Étɛ́ ka nyí tínmɛ è ní zán gbɛ ɖo nǔgbó ɔ mɛ tɔn? (Jaki 1:25)

¹⁷ É ɖo wɛn ɖɔ mǐ tuun ɖɔ nǔgbó ɔ kplɔ́nkplɔ́n kpowun kún ko kpé ó. Bo ná dó ɖu le tɔn bǐ mlɛ́mlɛ́ ɔ, mǐ ɖó ná nɔ zán gbɛ sɔgbe xá nǔgbó ɔ, énɛ́ wɛ nyí ɖɔ mǐ ɖó ná nɔ zán nǔ e kplɔ́n wɛ mǐ ɖe lɛ́ é ɖo gbɛzán mǐtɔn mɛ. Mɔ̌ jɛ́n mǐ ɖó ná wa cóbó ná ɖó awǎjijɛ jɔ awǎjijɛ ɔ. (Xa Jaki 1:25.) Nɛ̌ mǐ ka sixú wa gbɔn bo kú d’é jí ɖɔ mǐ ɖo gbɛ zán wɛ sɔgbe xá nǔgbó ɔ? Nɔví súnnu ɖokpó ɖɔ ɖɔ mǐ ɖó ná nɔ gbéjé mǐɖée kpɔ́n, bo ná kpɔ́n ali ɖěɖěe nu nǔ lɛ́ ɖo yiyi ɖe wɛ ganjí é kpó ali ɖěɖěe nu mǐ ba ná bló hǔzúhúzú ɖe lɛ́ é kpó. Mɛsɛ́dó Pɔ́lu ɖe énɛ́ xlɛ́ gbɔn lě: “Nǔ ɖěbǔ ná bo ɖo jijɛ wɛ hǔn, mi nú mǐ nǎ wlí ali e jí mǐ ko ɖe káká jɛ din ɔ ɖidó fí e mǐ xwe é.”—Filí. 3:16.

18. Étɛ́wú mǐ ka nɔ wa nǔ e wú mǐ kpé é bǐ bo “nɔ zán gbɛ ɖo nǔgbó ɔ mɛ”?

¹⁸ Ényí mǐ wa nǔ e wú mǐ kpé lɛ́ é bǐ, bo “zán gbɛ ɖo nǔgbó ɔ mɛ” ɔ, dǒ nukún le ɖěɖěe é nɔ hɛn wá lɛ́ é mɛ kpɔ́n! Jijɔ mǐtɔn lɛ́ nɔ kpɔ́n te d’é jí, lobɔ mǐ nɔ lɛ́ bló bɔ xomɛ nɔ hun Jexóva kpó nǔɖitɔ́ hǎtɔ́ mǐtɔn lɛ́ kpó. (Nǔx. 27:11; 3 Jaan 4) Hwɛjijɔ ɖagbe hú gǎn e wú mǐ nɔ yí wǎn nú nǔgbó ɔ, bo nɔ lɛ́ zán gbɛ ɖo nǔgbó ɔ mɛ é nɛ́.