Ényí súnnu ɖé vɔ́ alɔ wlí, bɔ alɔwlíwlí din tɔn ɔ sɔgbe ɖo sɛ́n linu ɔ, mɛ e ɖo agun ɔ mɛ lɛ́ é ɖó ná mɔ ɖɔ è ko ɖó nǔ alɔwlíwlí nukɔntɔn ɔ nu. Bó ná dó mɔ nǔ jɛ hwɛjijɔ e wú è wá gbeta énɛ́ kɔn é mɛ ɔ, mi nú mǐ ní gbéjé nǔ e Jezu ɖɔ dó mɛgbígbɛ́ kpó alɔ vívɔ́ wlí kpó wú é kpɔ́n.

Ðo Matíe 19:9 mɛ ɔ, Jezu tínmɛ hwɛjijɔ ɖokpó géé e wú è sixú zɔn dó, dó ɖó nǔ alɔwlíwlí ɖé nu é. É ɖɔ: “Ényí nyɔ̌nu ɖé ma dó afɔ gbě ǎ, bónú asú tɔn nya ɛ, bó da nyɔ̌nu ɖěvo ɔ, aga wɛ súnnu énɛ́ ɔ lɛ.” Xó e Jezu ɖɔ lɛ́ é kplɔ́n nǔ élɔ́ lɛ́ mǐ: (1) agalilɛ wɛ nyí hwɛjijɔ jínjɔ́n Biblu jí ɖokpó géé e wú è ná gbɛ́ mɛɖée é; (2) súnnu e gbɛ́ asi tɔn b’ɛ ma nyí ɖó hwɛjijɔ jínjɔ́n Biblu jí énɛ́ wú ǎ, bó da mɛ ɖěvo é ɔ, aga wɛ é lɛ. *

Ðiɖɔ wɛ Jezu ka ɖe ɖɔ ényí súnnu ɖé ba nyɔ̌nu ɖěvo, bó gbɛ́ asi tɔn ɔ, Mawuxówéma ɔ ná ɛ gbe bɔ é ná lɛ́ vɔ́ alɔ wlí a? Ényí mɔ̌ dandan ǎ. Ényí súnnu ɖé ba nyɔ̌nu ɖěvo ɔ, asi tɔn e nyí xomɛvɔ́nɔ é sixú wá gbeta ɔ kɔn ɖɔ émí ná sɔ́ hwɛ kɛ asú émítɔn, alǒ gbɔ. Ényí nyɔ̌nu ɔ gbɛ́ ɖɔ émí kún ná sɔ́ hwɛ kɛ asú émítɔn ó, bónú yě tún alɔ hǔn, ali hun nú yě mɛ we lɛ́ bǐ bɔ yě sixú vɔ́ alɔ wlí, hwenu e alɔtúntún sín afɔɖiɖe lɛ́ bǐ ná ko fó é.

Ðo alɔ ɖěvo mɛ ɔ, xomɛvɔ́nɔ ɔ sixú ba vɛ́návɛ́ná bó ná cyɔ́n alɔ alɔwlíwlí tɔn jí, bɔ mɔ̌ mɛ ɔ, é sixú ɖɔ nú asú tɔn ɖɔ émí ɖo gbesisɔmɛ bó ná sɔ́ hwɛ kɛ ɛ. Amɔ̌, ényí súnnu e ba nyɔ̌nu ɖěvo é gbɛ́ gbe e asi tɔn yí ɖɔ émí ná sɔ́ hwɛ kɛ ɛ é, bó sí te éɖokpónɔ bó yi yí alɔtúntúnwéma ɔ ka ló? Ðó nyɔ̌nu ɔ ɖo gbesisɔmɛ bá sɔ́ hwɛ kɛ ɛ, bɔ yě ná kpo ɖo asú kpó asi kpó nyí wɛ wútu ɔ, Mawuxówéma ɔ ná acɛ súnnu ɔ bónú é ná vɔ́ alɔ wlí ǎ. Ényí è ma ɖe súnnu ɔ sín agun mɛ ǎ, bónú é lɛ́ kpo ɖo nǔ e Mawuxówéma ɔ gbɛ́ é wa wɛ, bó vɔ́ alɔ wlí xá mɛ ɖěvo hwenu e Mawuxówéma ɔ ma ko ná ɛ acɛ tɔn ǎ é ɔ, aga nɛ́ é ko lɛ́ lɛ nɛ́. Énɛ́ wú ɔ, mɛxó agun tɔn lɛ́ ná lɛ́ ɖó wěɖegbɛ́ hwɛɖiɖɔ tɔn ɖěvo ayǐ.—1 Kɔ. 5:1, 2; 6:9, 10.

Ényí Mawuxówéma ɔ ma ná gbe súnnu ɖé ǎ bónú é vɔ́ alɔ wlí ɔ, linlin tɛ́ mɛ e ɖo agun ɔ mɛ lɛ́ é ka nɔ ɖó dó alɔwlíwlí nukɔntɔn ɔ kpó alɔwlíwlí yɔ̌yɔ́ ɔ kpó wú? Sɔgbe xá Biblu ɔ, alɔwlíwlí nukɔntɔn ɔ ka lɛ́ kpo ɖo nǔ ɖu wɛ a? Asi xomɛvɔ́nɔ ɔ ka sixú lɛ́ wá gbeta ɔ kɔn ɖɔ alɔ e émí wlí xá asú émítɔn é kpo ɖo te wɛ a? Agun ɔ ka ná lin ɖɔ alɔwlíwlí yɔ̌yɔ́ ɔ, agalilɛ wɛ é nyí wɛ a?

Ð’ayǐ ɔ, mɛ e ɖo agun ɔ mɛ lɛ́ é nɔ lin ɖɔ alɔwlíwlí yɔ̌yɔ́ ɔ, agalilɛ wɛ é nyí, ɖó asi xomɛvɔ́nɔ ɔ kpo ɖo gbɛ, bó sɔ́ da asú ɖěvo ǎ; mɔ̌ jɛ́n é ma ka lɛ́ d’afɔ gbě ǎ é nɛ́. Amɔ̌, hwenu e Jezu ɖo xó ɖɔ dó mɛɖée gbígbɛ́ kpó alɔ vívɔ́ wlí kpó wú wɛ é ɔ, nǔ tají e ɖo ayi tɔn mɛ é wɛ nyí asú, alǒ asi xomɛvɔ́nɔ ɔ ǎ. É nyɔ́ wa ɔ, é tínmɛ ɖɔ ényí súnnu ɖé gbɛ́ asi tɔn, b’ɛ ma  ka nyí ɖó hwɛjijɔ jínjɔ́n Biblu jí ɖé wú ǎ, bó da nyɔ̌nu ɖěvo hǔn, aga wɛ é lɛ. Ðo ninɔmɛ mɔ̌hun mɛ ɔ, Jezu ylɔ́ mɛgbígbɛ́ ɔ kpó alɔ vívɔ́ wlí ɔ kpó ɖɔ agalilɛ, bɔ énɛ́ ɖó nǔ alɔwlíwlí nukɔntɔn ɔ nu.

Ényí súnnu e ba nyɔ̌nu ɖěvo e sí te éɖokpónɔ bó yi yí alɔtúntúnwéma, lobo vɔ́ alɔ wlí xá mɛ ɖěvo, bó gbɔn mɔ̌ mɛ ɖó nǔ alɔwlíwlí nukɔntɔn ɔ nu ɔ, asi xomɛvɔ́nɔ ɔ sɔ́ ɖó gbeta ɖě kɔn bó ná wá ǎ; é sɔ́ sixú ɖɔ ɖɔ alɔwlíwlí émítɔn ná kpo ɖo te ǎ. Énɛ́ wú ɔ, hwɛ ɖě ɖo kɔ n’i ǎ, ɖó gbeta e kɔn asú tɔn wá é ɔ, é ɖó acɛ ɖě d’é jí ǎ wútu. Gɔ́ ná ɔ, ényí asi xomɛvɔ́nɔ ɔ ná bó wá kú, vɔ́ alɔ wlí, alǒ lɛ aga ɔ, énɛ́ ná ɖyɔ́ linlin e mɛ e ɖo agun ɔ mɛ lɛ́ é ná ɖó dó alɔwlíwlí yɔ̌yɔ́ ɔ wú é ǎ. *

Ðo kpɔ́ndéwú e xó mǐ ɖɔ wá yi ɖo aga é mɛ ɔ, asú ɔ ba nyɔ̌nu ɖěvo, bɔ énɛ́ zɔ́n bɔ yě gbɛ́ yěɖée. Ényí é ma ba nyɔ̌nu ɖěvo ǎ, bó ka gbɛ́ asi tɔn bó vɔ́ alɔ wlí xá mɛ ɖěvo ɔ ka ló? Alǒ súnnu ɔ gbɛ́ asi tɔn gúdo é ɔ, é wá ɖó xó xá nyɔ̌nu ɖěvo, bó wlí alɔ xá ɛ, bɔ asi tɔn xóxó ɔ ka kpo ɖo biba wɛ bó ná sɔ́ hwɛ kɛ ɛ ɔ ka ló? Ðo kpɔ́ndéwú énɛ́ lɛ́ bǐ mɛ ɔ, mɛgbígbɛ́ ɔ kpó alɔ e é vɔ́ wlí é kpó bǐ ɔ, aga wɛ é nyí bɔ é lɛ, bɔ énɛ́ ɖó ná ɖó nǔ alɔwlíwlí xóxó ɔ nu. Alɔwlíwlí yɔ̌yɔ́ ɔ, kancícá e axɔ́sú yí gbe ná é ɖé wɛ. Lěe Atɔxwɛ (Flanségbe) 15 février 1980, wěxwɛ 31 kpó 32 kpó ɖɔ gbɔn é ɔ, “din e é ko vɔ́ alɔ wlí é ɔ, é sɔ́ sixú lɛ́ kɔ wá asi tɔn xóxó ɔ gɔ́n ǎ; mɛɖée gbígbɛ́, agalilɛ kpó alɔ e é vɔ́ wlí é kpó ɖó nǔ alɔwlíwlí nukɔntɔn ɔ nu.”

Ðiɖɔ wɛ nukúnnúmɔjɛnǔmɛ yɔ̌yɔ́ ɔ ɖe ɖɔ Klisánwun lɛ́ ná mɔ ɖɔ alɔwlíwlí kún sɔ́ nyí nǔ mímɛ́ ó, alǒ agalilɛ kún nyí hwɛ syɛ́nsyɛ́n ó ǎ. Ényí súnnu ɖé gbɛ́ asi tɔn, b’ɛ ma nyí ɖó hwɛjijɔ jínjɔ́n Biblu jí ɖé wú ǎ, bó da mɛ ɖěvo hwenu e é ma ɖó acɛ tɔn bó ná wa mɔ̌ ǎ é ɔ, mɛxó agun tɔn lɛ́ ná ɖó wěɖegbɛ́ hwɛɖiɖɔ tɔn ɖé ayǐ, ɖó aga wɛ é lɛ. (Ényí Klisánwun wɛ nyí mɛ yɔ̌yɔ́ e é da é ɔ, é lɔ ɖó ná yi wěɖegbɛ́ hwɛɖiɖɔ tɔn nukɔn, ɖó aga wɛ é lɔmɔ̌ lɛ.) Nǔgbó wɛ ɖɔ mɛ e ɖo agun ɔ mɛ lɛ́ é ná lin ɖɔ alɔ e yě wlí yɔ̌yɔ́ é ɔ, é kún nyí aga wɛ yě lɛ ó có, súnnu ɔ ka sɔ́ ná jɛxá wǔjɔmɛzɔ́ sinsɛnzɔ́ tɔn lɛ́ ǎ nú xwe mɔ̌kpán káká jɛ hwenu e nǔ nyanya énɛ́ e é wa é ma sɔ́ ná nɔ ɖ’akpɔ nú mɛ ɖěvo lɛ́ ǎ é, alǒ, káká jɛ hwenu e mɛ ɖěvo lɛ́ ná jɛ sísí i jí é. Cóbónú è ná sɔ́ wǔjɔmɛzɔ́ ɖěbǔ dó así n’i ɔ, mɛxó agun tɔn lɛ́ ná lɛ́ lin tamɛ dó ninɔmɛ e mɛ nyɔ̌nu nukɔntɔn e é zán ayi winniwínní dó gbɛ́ é ɖe é kpó ninɔmɛ e mɛ vǐ vǔvǔ ɖěɖěe é jó dó n’i lɛ́ é ɖe din é kpó jí.—Mal. 2:14-16.

Ðó nǔ nyanya gěgé mɛ wɛ mɛgbígbɛ́ kpó alɔ vívɔ́ wlí kpó nɔ tɔ́n kɔ dó wútu ɔ, Klisánwun lɛ́ nɔ wa nǔ kpó nǔnywɛ́ kpó, bó nɔ xwedó kpɔ́ndéwú Jehovah tɔn, lobo nɔ mɔ ɖɔ nǔ mímɛ́ wɛ alɔwlíwlí nyí.—Nǔt. 5:3, 4; Ebl. 13:4.