ENYI xɔ́ntɔn vívɛ́ ɖé sɛ́ wema wusyɛn dó lanmɛ nú mɛ tɔn ɖé dó we ɔ, nɛ̌ é ka nɔ cí nú we? Mɛsɛ́dó Pɔlu sɛ́ wema mɔ̌hun ɖé dó ahwanvu Klisanwun e nɔ nyí Timɔtée é; wema enɛ wɛ nyí Timɔtée wegɔ́ e ɖò Biblu mɛ dìn é. É ɖò wɛn ɖɔ, kpo akpakpa sɔ́ mɛ kpo wɛ Timɔtée na ko ba fí e ɖò tóó é ɖé bo cí, bo na dó sixu xà nǔ e xɔ́ntɔn tɔn vívɛ́ ɔ ɖɔ é. Bɔya Timɔtée sixu ko ɖò linlin wɛ ɖɔ, ‘Nɛ̌ Pɔlu ka na ko ɖè? Wě e na d’alɔ mì bɔ un na kpé azɔ̌ ce wu é ɖě wɛ ka ɖ’emɛ à? Wema elɔ ka na sixu d’alɔ mì bɔ un na kpé sinsɛnzɔ́ ce wu, lobo lɛ́ d’alɔ mɛ ɖevo lɛ à?’ Lee mǐ na wá mɔ gbɔn é ɔ, Timɔtée mɔ xósin nú nǔkanbyɔ enɛ lɛ kpo gegě ɖevo lɛ kpo ɖò wema xɔ akwɛ enɛ mɛ. Ðò xóta elɔ mɛ ɔ, mǐ na ɖɔ xó dó nǔkplɔnmɛ ɖaaɖagbe e ɖò wema enɛ mɛ lɛ é ɖé lɛ jí.

Hwenu e Timɔtée jɛ wema ɔ xà jí tlolo ɔ, é sixu ko mɔ nǔ jɛ lee nǔ tɔn nɔ ɖu ayi mɛ nú Pɔlu tawun gbɔn é wu. Kpo akpakpa sɔ́ mɛ kpo wɛ Pɔlu ylɔ́ ɛ ɖɔ: “Vǐ ce vívɛ́ná.” (2 Tim. 1:2) Amɔ̌, xwè 30 mɔ̌ ɖó wɛ Timɔtée na ko ɖè hwenu e é mɔ wema-sɛ́dó-mɛ enɛ ɖò xwè 65 H.M. tɔn mɔ̌ é, bo ko lɛ́ nyí mɛxo agun tɔn e ko mɔ nǔ kpɔ́n é ɖé. É ko ɖò azɔ̌ wà xá Pɔlu wɛ sín xwè 10 jɛji ɖíe, bo ko kplɔ́n nǔ gegě.

Sè e Timɔtée sè ɖɔ Pɔlu ɖò didɛ wɛ ɖò wuvɛ̌ lɛ nu kpo gbejininɔ kpo é na ko dó wusyɛn lanmɛ n’i tawun. Pɔlu ɖò gankpámɛ ɖò Hlɔma, bɔ zaanɖé dìn ɔ, è na hu i. (2 Tim. 1:15, 16; 4:6-8) Timɔtée sixu mɔ ɖɔ Pɔlu nyí akɔ́nkpantɔ́ ɖé, ɖó Pɔlu ɖɔ: “Un nɔ dɛ ɖò nǔ bǐ nu.” (2 Tim. 2:8-13) Timɔtée ɖɔhun ɔ, didɛ Pɔlu tɔn sixu na akɔ́nkpinkpan mǐ.

Pɔlu dó wusyɛn lanmɛ nú Timɔtée ɖɔ é ni nɔ mɔ wǔ e è jɔ ɛ ɖò sinsɛnzɔ́ Mawu tɔn mɛ é dó mɔ nǔ e xɔ akwɛ tawun é ɖé. Pɔlu jló ɖɔ Timɔtée ‘ni hɛn nǔnina e Mawu na ɛ é ɖó gbɛ̀.’ (2 Tim. 1:6) Pɔlu zán xókwín khaʹri·sma ɔ nú “nǔnina.” Nǔnina e è ma jɛxa ǎ é wɛ xókwín Glɛkigbe tɔn enɛ nɔ dó gesí tawun. Timɔtée mɔ nǔnina enɛ hwenu e è sɔ́ ɛ bɔ é na wà devízɔ́ nú agun ɔ ɖò ali bǔnɔ ɖé nu é.—1 Tim. 4:14.

Etɛ Timɔtée ka ɖó na wà nú nǔnina enɛ? Ðò Glɛkigbe mɛ ɔ, ‘è ni hɛn nǔnina e  Mawu na mɛ é ɖó gbɛ̀’ sín tinmɛ wɛ nyí ‘è ni bló bonu nǔnina e Mawu na mɛ é ni ɖò jiji wɛ myɔ ɖɔhun.’ Enɛ wu ɔ, hwenu e Timɔtée xà xógbe Pɔlu tɔn lɛ é ɔ, é sixu ko lin tamɛ dó myɔ ɖěɖee è nɔ flɔ́ ɖò xwégbe bɔ ye sixu wá huzu akán hɛhɛ ɖé kpowun hweɖelɛnu é jí. È ɖó na bló bɔ akán enɛ lɛ na ɖò jiji wɛ, bo na na myɔ lobo lɛ́ na yǒzo hugǎn. Xókwíntinmɛwegbo ɖé ɖɔ ɖɔ xókwín Glɛkigbe tɔn (a·na·zo·py·reʹo) ee Pɔlu zán é sín tinmɛ wɛ nyí akpakpa ni sɔ́ mɛ dó azɔ̌ ɖé wu, alǒ kan ɖiɖó d’ewu. Enɛ wu ɔ, Pɔlu ɖò wě ɖè xá Timɔtée wɛ ɖɔ: ‘Ðǒkan dó azɔ̌ e è sɔ́ d’así nú we é wu!’ Égbé ɔ, mǐ ɖó na wà nǔ ɖokpo ɔ, enɛ wɛ nyí ɖɔ mǐ ɖó na ɖókan dó sinsɛnzɔ́ mǐtɔn wu.

Ðò wema-sɛ́dó-mɛ enɛ mɛ ɔ, Pɔlu lɛ́ ɖɔ nǔ ɖevo e na d’alɔ Timɔtée bɔ sinsɛnzɔ́ tɔn na kpa ɛ hugǎn é. Pɔlu wlán ɖɔ: “[Gbigbɔ] e ɖò mǐ mɛ ɔ ni d’alɔ we, bonu a ni hɛn nǔkplɔnmɛ titewungbe e è sɔ́ dó así nú we lɛ.” (2 Tim. 1:14) Nǔ xɔ akwɛ tɛ è ka sɔ́ d’así nú Timɔtée? Ðò wemafɔ e jɛ nukɔn nú wemafɔ enɛ é mɛ ɔ, Pɔlu ɖɔ xó dó “xó jɔ xó” ɖé lɛ wu; enɛ wɛ nyí nǔgbo ɖěɖee ɖò Mawuxówema ɔ mɛ lɛ é. (2 Tim. 1:13) Ðó Timɔtée nyí Klisanwun sinsɛnzɔ́watɔ́ ɖé wu ɔ, é ɖó na kplɔ́n nǔgbo ɔ nɔví e ɖò agun ɔ mɛ lɛ é kpo mɛ e ɖò xá tɔn mɛ lɛ é kpo. (2 Tim. 4:1-5) Gɔ́ na ɔ, è lɛ́ jɔwǔ Timɔtée bɔ é na nyí mɛxo agun tɔn ɖé bo na nya xɛ ɖò lɛngbɔ̌kpó Mawu tɔn jí. (1 Pi. 5:2) Timɔtée sixu hɛn nǔkplɔnmɛ e è sɔ́ d’así n’i é, enɛ wɛ nyí nǔgbo e é ɖó na kplɔ́n mɛ lɛ é, gbɔn gbigbɔ mímɛ́ Jehovah tɔn kpo Xó Tɔn kpo wu ginganjɛ gblamɛ.—2 Tim. 3:14-17.

Égbé ɔ, è sɔ́ nǔgbo ɖé d’así nú mǐ lɔ, bɔ mǐ ɖó na kplɔ́n mɛ lɛ. (Mat. 28:19, 20) Mǐ ɖó na wɔn lě dò nǔgbo enɛ xɔ akwɛ sɔ é ǎ, enɛ wu ɔ, mǐ ɖó na nɔ xoɖɛ lobo nɔ kplɔ́n Xó Mawu tɔn hwɛhwɛ. (Hlɔ. 12:11, 12; 1 Tim. 4:13, 15, 16) Enyi è jɔwǔ mǐ bɔ mǐ na nyí mɛxo agun tɔn alǒ sinsɛnzɔ́watɔ́ hwebǐnu tɔn ɔ, azɔ̌ sixu jɛ azɔ̌ jí nú mǐ. Azɔ̌ mɔ̌hun nɔ zɔ́n bɔ mǐ ɖó na nɔ sɔ́ mǐɖée hwe, bo na lɛ́ ganjɛ alɔdó Mawu tɔn wu. Enɛ wu ɔ, mǐ sixu hɛn nǔ e è sɔ́ d’así nú mǐ é, alǒ nya xɛ ɖ’eji, enyi mǐ nɔ wlíbo na, lobo nɔ lɛ́ ba alɔdó Jehovah tɔn bá dó kpé nukún d’ewu ɔ nɛ.

Azɔ̌ ɖěɖee è sɔ́ d’así nú Timɔtée lɛ é kan éɖokponɔ ǎ. É kan mɛ ɖevo lɛ lɔ. Enɛ wu wɛ Pɔlu ɖɔ nú Timɔtée ɖɔ: “Nǔ e un ɖɔ, bɔ a sè . . . ɔ, sɔ́ dó así nú mɛ e wu è ɖeji dó, bɔ ye lɔ na sixu kplɔ́n mɛ ɖevo lɛ é.” (2 Tim. 2:2) Ɛɛn, Pɔlu ɖɔ nú Timɔtée ɖɔ é ni kplɔ́n nǔ e é ko kplɔ́n lɛ é bǐ nɔví sunnu ɖevo lɛ. É ɖò taji ɖɔ nɔví agbanɖotananɔ e ɖò agun Klisanwun tɔn mɛ égbé lɛ é lɔ ni tɛ́n kpɔ́n bo wà nǔ ɖokpo ɔ. Nɔví agbanɖotananɔ ɖagbe ɖé nɔ hwlá nǔ e é tuùn dó azɔ̌ ɖé wu é ǎ. É nyɔ́ wà ɔ, é nɔ kplɔ́n mɛ ɖevo lɛ bonu ye lɔ na kpéwú bo wà azɔ̌ enɛ. É nɔ ɖò adohu adohu jí ɖɔ ye sixu wá tuùn nǔ hú emi, alǒ nyɔ́ azɔ̌ ɔ wà hú emi ǎ. Enɛ wu ɔ, agbanɖotananɔ ɔ ɖó na nɔte ɖó nǔ nukɔn nukɔntɔn e kúnkplá azɔ̌ ɖé é kplɔnkplɔn mɛ jí kpowun ǎ. É ɖó na ɖè sín jlǒ mɛ bo na d’alɔ mɛ ɖěɖee kplɔ́n nǔ wɛ é ɖè lɛ é bɔ ye na nɔ wá gbeta ɖagbe lɛ kɔn; enɛ wɛ nyí ɖɔ ye na huzu Klisanwun e zin lɛ é. Mɔ̌ mɛ ɔ, ‘sunnu e wu è ɖeji dó’ b’ɛ kplɔ́n nǔ lɛ é na wá kpéwú bo d’alɔ agun ɔ hugǎn.

É ɖò wɛn ɖɔ wema wusyɛn dó lanmɛ nú mɛ tɔn e Pɔlu sɛ́dó Timɔtée é xɔ akwɛ ɖò Timɔtée nukún mɛ. Mǐ sixu dó nukún lee Timɔtée na nɔ vɔ́ wěɖexámɛ xɔ akwɛ enɛ lɛ gbéjé kpɔ́n gbɔn, lobo na nɔ ɖò tamɛ lin dó lee é sixu zán ye ganji ɖò azɔ̌ e è sɔ́ d’así n’i lɛ é kɔn gbɔn é jí mɛ kpɔ́n.

Mǐ lɔ jló na hɛn wěɖexámɛ enɛ dó ayi mɛ. Gbɔn nɛ̌ é? Mǐ sixu dó gǎn bo bló bɔ nǔnina e è sɔ́ d’así nú mǐ é na nɔ ɖò jiji wɛ myɔ ɖɔhun, wlíbo nú nǔ e è sɔ́ d’así nú mǐ é, lobo nɔ kplɔ́n nǔ e mǐ tuùn lɛ é bǐ mɛ ɖevo lɛ. Mɔ̌ mɛ ɔ, lee Pɔlu ɖɔ nú Timɔtée gbɔn é ɔ, mǐ sixu “wà mɛsɛntɔ́ Mawu tɔn sín azɔ̌ [mǐtɔn] ganji.”—2 Tim. 4:5.