A ka xa Atɔxwɛ yaɖéyaɖé e tɔ́n wá yi lɛ́ é ganjí a? É nyɔ́, kpɔ́n ɖɔ a ka sixú ná xósin nú nǔkanbyɔ́ élɔ́ lɛ́ a jí:

Kpɔ́ndéwú tɛ́ Jexóva ka sɔ́ ɖ’ayǐ ɖo lěe è ná wa nǔ xá nyɔ̌nu lɛ́ gbɔn é kpáxwé?

É nɔ ɖe yě ɖó vo ǎ; é nɔ sɔ́ súnnu lɛ́ ɖ’ajo hú nyɔ̌nu lɛ́ ǎ. Mawu nɔ ɖótó nyɔ̌nu lɛ́, lěe nǔ nɔ cí nú yě é kpó nǔ e nɔ ɖu ayi mɛ nú yě lɛ́ é kpó nɔ ɖu ayi mɛ n’i. Gɔ́ ná ɔ, é nɔ ɖeji dó yě wú ɖɔ yě ná wa azɔ̌ émítɔn.—w24.01, wěx. 15-16.

Nɛ̌ mǐ ka sixú zán Efɛ́zinu lɛ́ 5:7 e ɖɔ “mi ma kpé nǔ ɖěbǔ xá yě ó” é gbɔn?

Mɛsɛ́dó Pɔ́lu gba akpá nú mǐ ɖɔ mǐ ní ma dó gbɛ̌ xá mɛ ɖěɖěe ná bló bɔ é ná vɛ́ wǔ nú mǐ bɔ mǐ ná tɛ́ dó nǔgbódodó Mawu tɔn lɛ́ wú lɛ́ é ó. Mɛ e mǐ nɔ zán hwenu ɖó kpɔ́ xá cɔɔ lě lɛ́ é kpó mɛ e mǐ nɔ wa nǔ ɖó kpɔ́ xá ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é kpó ɖo gbɛ̌dídó mɔ̌hun e ma sɔgbe ǎ lɛ́ é mɛ.—w24.03, wěx. 22-23.

Xɛxó alɔkpa tɛ́ lɛ́ wú mǐ ka ɖó ná cɔ́ mǐɖée dó?

Mǐ ɖó ná cɔ́ mǐɖée dó xɛxó e è ma gbéjé kpɔ́n ganjí ǎ b’ɛ gosín xɔ́ntɔn e mǐ tuun ganjí lɛ́ é, mɛ e mǐ ma tuun ǎ bɔ yě wlán nǔ sɛ́dó mǐ lɛ́ é kpó gǔfɔ́ndómawujítɔ́ ɖěɖěe nɔ bló nǔ cí nǔ ɖɔ yě ba ná kplɔ́n nǔgbó ɔ lɛ́ é kpó gɔ́n lɛ́ é wú.—w24.04, wěx. 12.

Lěe Jexóva ná ɖɔ hwɛ axɔ́sú Salomɔ́ɔ tɔn, mɛ ɖěɖěe kú ɖo Sodɔ́mu kpó Gomɔ́ɔ kpó lɛ́ é tɔn, gɔ́ nú mɛ e kú ɖo Sinvɔgbɛ ɔ hwenu lɛ́ é tɔn gbɔn é ɔ, étɛ́ mǐ ka tuun d’é wú? Étɛ́ mǐ ma ka tuun ǎ?

Mǐ sixú ɖɔ bo t’afɔ jí ɖɔ Jexóva ko sú kún yětɔn dó bǐ mlɛ́mlɛ́ ǎ. Amɔ̌, mǐ tuun ɖɔ é ɖó kúnnuɖenú lɛ́ bǐ, bo ka nɔ lɛ́ kú nǔbláwǔ nú mɛ titewungbe tɔn.—w24.05, wěx. 3-4.

Gǎnjɛwú tɛ́ “Só ɔ” e Mawu nyí é ka nɔ ná mǐ? (Sɛ́n. 32:4)

Mǐ sixú ba bibɛtɛn ɖo Jexóva gɔ́n. Mɛ ɖejidéwú wɛ é nyí; é nɔ ɖe akpá tɔn lɛ́ jɛ́n wɛ. Gɔ́ ná ɔ, é nɔ húzú ǎ; é nɔ wa nǔ sɔgbe xá mɛ alɔkpa e é nyí é bo nɔ bló bɔ linlin tɔn lɛ́ nɔ jɛnu.—w24.06, wěx. 26-28.

Étɛ́ ka sixú d’alɔ we bɔ a ná húzú sɔgbe xá agun yɔ̌yɔ́ ɖé?

Gǎn jɛ Jexóva wú, é ná d’alɔ we lěe é ko d’alɔ mɛsɛntɔ́ tɔn lɛ́ ɖo hwexónu gbɔn é. Ma nɔ sɔ́ agun towe xóxó ɔ jlɛ́ dó yɔ̌yɔ́ ɔ wú ó. Hɛn alɔnu towe ján ɖo agun towe yɔ̌yɔ́ ɔ mɛ, bo tɛ́n kpɔ́n bo zun xɔ́ntɔn yɔ̌yɔ́ lɛ́.—w24.07, wěx. 26-28.

Nǔ tɛ́ lɛ́ nǔjlɛ́dónǔwú atɔn e ɖo Matíe wěmata 25​gɔ́ ɔ mɛ lɛ́ é ka kplɔ́n mǐ?

Nǔjlɛ́dónǔwú lɛ̌ngbɔ́ lɛ́ kpó gbɔ̌ lɛ́ kpó tɔn ɔ tɛ ɖɛ̌ gbejíninɔ jí. Nǔjlɛ́dónǔwú ɖyɔ̌vǐ ɖo alɔjí ayiɖotenánɔ lɛ́ kpó xlonɔ lɛ́ kpó tɔn ɔ xlɛ́ ɖɔ è ɖó ná sɔ́ nǔ ɖ’ayǐ bo lɛ́ ɖó ayi te. Nǔjlɛ́dónǔwú dó taláan lɛ́ wú tɛ ɖɛ̌ lěe azɔ̌ syɛ́nsyɛ́n wiwa ɖo tají sɔ é jí.—w24.09, wěx. 20-24.

Nɛ̌ hɔnnúwa tɛ́npli Salomɔ́ɔ tɔn tɔn ka yi jǐ sɔ?

Ðo 2 Tan 3:4 mɛ ɔ, nǔwlánwlán ɖěɖěe è wlán kpó alɔ kpó lɛ́ é hwexónu tɔn ɖé lɛ́ ɖɔ “awabá 120,” b’ɛ xlɛ́ ɖɔ hɔnnúwa ɔ yi jǐ nú mɛ̌tlu 53. Amɔ̌, wěma ɖejidéwú ɖěvo lɛ́ ɖɔ “awabá 20,” b’ɛ xlɛ́ ɖɔ é yi jǐ nú mɛ̌tlu tɛ́nnɛ. É cí ɖɔ gǔdo tɔn ɔ sɔgbe xá dǒ tɛ́npli ɔ tɔn lɛ́ sín tlitli ɖɔhun.—w24.10, wěx. 31.

Étɛ́ ka nyí tínmɛ ɖɔ e è ɖɔ ɖɔ ‘asi ɖokpó wɛ mɛsɛntɔ́ agun tɔn ɖé ɖó ná ɖó’ é tɔn? (1 Tim. 3:12)

Tínmɛ tɔn wɛ nyí ɖɔ nyɔ̌nu ɖokpó wɛ é ɖó ná wlí alɔ xá, bo ka ɖó ná ba nyɔ̌nu ɖěvo ǎ. Gɔ́ ná ɔ, é ɖó ná wa nǔ xá nyɔ̌nu ɖěvo lɛ́ gbeɖé ɖo ali e ma sɔgbe ǎ é nu ǎ.—w24.11, wěx. 19.

Étɛ́wú mǐ ka sixú ɖɔ ɖɔ Jaan 6:53 kún ɖo lěe è ná nɔ bló gbadanu núɖuɖu Aklúnɔ tɔn ɔ gbɔn é xó ɖɔ wɛ ó?

Jaan 6:53 ɖɔ xó dó nǔ e wú é byɔ́ ɖɔ è ní ɖu agbaza Jezu tɔn bo lɛ́ nu hun tɔn é wú. Xwe 32 H.M. tɔn wɛ Jezu ɖɔ xó énɛ́ lɛ́ ɖo Galilée nú Jwifu ɖěɖěe ma ko ɖi nǔ n’i ǎ lɛ́ é. Amɔ̌, xwe ɖokpó gúdo wɛ è wá ɖó nǔwiwa gbadanu núɖuɖu Aklúnɔ tɔn ɔ ayǐ ɖo Jeluzalɛ́mu. Mɛ ɖěɖěe ná kpa acɛ xá Jezu ɖo jǐxwé lɛ́ é xó ɖɔ wɛ Jezu ɖe ɖo fínɛ́.—w24.12, wěx. 10-11.