MARY kpó asú tɔn John a kpó nɔ nɔ akpá gbɛ ɔ tɔn ɖé xwé, fí e è sixú jlá wɛn ɖagbe ɔ azɔ̌watɔ́ e gosín Philippines lɛ́ é gěgé ɖe é. Ðo jɛmɛjí Covid-19 hwenu ɔ, Mary bɛ́ Biblu kplɔ́nkplɔ́n gěgé, é ka nyí ɖo to e mɛ é ɖe é kɛ́ɖɛ́ ǎ, loɔ, é lɛ́ wa mɔ̌ gbɔn awa gbɛ ɔ tɔn ɖěvo lɛ́ xwé. Nɛ̌ é ka wa énɛ́ gbɔn?

Mary nɔ kan nǔ élɔ́ byɔ́ Biblu kplɔ́ntɔ́ tɔn lɛ́: “A ka tuun mɛ ɖěvo ɖé bɔ é ná ba ná kplɔ́n Biblu a?” Ényí yě ɖɔ ɛɛn ɔ, é nɔ byɔ́ yě ɖɔ yě ní d’alɔ émí bónú émí ná mɔ mɛ mɔ̌hun. Hwɛhwɛ ɔ, nǔkanbyɔ́ kléwún énɛ́ nɔ hɛn le wá. Étɛ́wú? Ðó hwɛhwɛ ɔ, mɛ e yí wǎn nú Xó Mawu tɔn lɛ́ é, nɔ ba ná má nǔ e yě kplɔ́n lɛ́ é xá mɛ e ɖo xwédo yětɔn mɛ lɛ́ é kpó xɔ́ntɔn yětɔn e sín nǔ nɔ ɖu ayi mɛ nú yě lɛ́ é kpó. Le tɛ́ nǔ mɔ̌hun kinkanbyɔ́ ka ko hɛn wá?

Mary sín Biblu kplɔ́ntɔ́ Jasmin dó è gesí nú Biblu kplɔ́ntɔ́ yɔ̌yɔ́ ɛnɛ. Mɛ ɖokpó ɖo yě mɛ bo nɔ nyí Kristine, bɔ nǔkplɔ́nkplɔ́n ɔ víví nu tɔn sɔmɔ̌ bɔ é byɔ́ Mary ɖɔ yě ná nɔ kplɔ́n nǔ ɔ azɔn we ɖo aklúnɔzángbla ɖokpó mɛ. Ée Mary kanbyɔ́ Kristine ɖɔ é ka tuun mɛ ɖěvo ɖé bɔ é ba ná kplɔ́n Biblu a jí é ɔ, é ɖɔ: “Ɛɛn, un ná dó xɔ́ntɔn ce lɛ́ gesí nú we.” Aklúnɔzángbla yɔywɛ ɖé gúdo ɔ, Kristine dó Mary gesí nú xɔ́ntɔn tɔn e ba ná kplɔ́n Biblu é ɛnɛ. Nukɔnmɛ ɔ, Kristine dó è gesí nú xɔ́ntɔn tɔn ɖěvo lɛ́; yě mɛɖé lɛ́ lɔ wa nǔ ɖokpó ɔ.

Kristine lɛ́ ba ɖɔ xwédo émítɔn e ɖo Philippines é ní kplɔ́n Biblu. Énɛ́ wú ɔ, é ɖɔ xó nú vǐ nyɔ̌nu tɔn Andrea. Bǐbɛ́mɛ ɔ, Andrea lin ɖɔ ‘sinsɛngbɛ́ta baɖabaɖa ɖé wɛ Kúnnuɖetɔ́ lɛ́ nyí, bo kún ɖi nǔ nú Jezu ó, bo nɔ zán Alɛnuwéma xóxó ɔ kɛ́ɖɛ́.’ Amɔ̌, ɖo nǔkplɔ́nkplɔ́n ɖokpó kpowun gúdo ɔ, linlin agɔ e é ɖó lɛ́ é blí bú. Ðo nǔkplɔ́nkplɔ́n tɔn lɛ́ hwenu ɔ, é nɔ ɖɔ: “Ényí Biblu jɛ́n ɖɔ mɔ̌ ɔ, nǔgbó jɛ́n é ná nyí!”

Nukɔnmɛ ɔ, Andrea dó Mary gesí nú xɔ́ntɔn tɔn we, gɔ́ nú azɔ̌gbɛ́ tɔn ɖokpó bɔ yě lɔ jɛ nǔ kplɔ́n jí. Gɔ́ ná ɔ, Mary tlɛ tuun ɖ’ayǐ ɖɔ Andrea sín tánti Angela éé ma nɔ mɔ nǔ ǎ é nɔ ɖo tó ɖó yě wɛ hwenu e yě nɔ ɖo nǔ kplɔ́n wɛ é ǎ. É wá jɛ gbe ɖokpó bɔ Angela ɖɔ nú Andrea ɖɔ é ní ɖɔ xó émítɔn nú Mary bónú é ná jɛ Biblu kplɔ́n xá émí jí. Angela yí wǎn nú nǔ e kplɔ́n wɛ é ɖe é. Sun ɖokpó kpowun gúdo ɔ, é kpé wú bo hɛn wěmafɔ gěgé tamɛ, bo ba ɖɔ nǔkplɔ́nkplɔ́n ɔ ní nɔ yi azɔn ɛnɛ ɖo aklúnɔzángbla ɖokpó mɛ! Andrea d’alɔ Angela bɔ é jɛ kplé lɛ́ wá jí ɖo gbesisɔmɛ gbɔn kan nu.

Hwenu e Mary se ɖɔ Kristine sín asú Joshua nɔ xɔ́ tó nǔkplɔ́nkplɔ́n Kristine tɔn é ɔ,  Mary kanbyɔ́ ɛ ɖɔ é ba ná xo kpóɖó nú yě a jí. Joshua ɖɔ: “Un ná ɖótó kpowun wɛ, ma kan nǔ ɖěbǔ byɔ́ mì ó; a kan nǔ byɔ́ mì céwún ɔ, te jɛ́n ná sí.” Ðo cɛ́jú atɔ́ɔ́n nukɔntɔn nǔkplɔ́nkplɔ́n ɔ tɔn lɛ́ mɛ ɔ, nǔ e é kanbyɔ́ lɛ́ é hú ée Kristine kanbyɔ́ lɛ́ é, bo ba ná gbɛ kan dó xóɖɔɖókpɔ́ jínjɔ́n Biblu jí ɔ nu.

Nǔ kléwún e Mary kanbyɔ́ é hun ali nú Biblu kplɔ́nkplɔ́n gěgé. É bló tito bɔ Kúnnuɖetɔ́ hǎtɔ́ tɔn lɛ́ ná kpé nukún dó Biblu kplɔ́nkplɔ́n lɛ́ gěgé wú. Biblu kplɔ́nkplɔ́n 28 wɛ Mary bɛ́ ɖo to vovo ɛnɛ mɛ.

Jasmin éé nyí Biblu kplɔ́ntɔ́ nukɔntɔn e xó è ɖɔ ɖo aga é bló batɛ́mu ɖo avril 2021. Kristine bló batɛ́mu ɖo mai 2022 bo lɛ́ kɔ yi Philippines bo ná nɔ kpɔ́ xá xwédo tɔn. Xɔ́ntɔn ɖěvo e Kristine dó gesí nú Mary lɛ́ é lɔ we bló batɛ́mu. Angela bló batɛ́mu sun yɔywɛ ɖé lɛ́ gúdo, bo nyí gběxosín-alijítɔ́ hwebǐnu tɔn din. Kristine sín asú Joshua kpó vǐ nyɔ̌nu yětɔn Andrea kpó, gɔ́ nú Biblu kplɔ́ntɔ́ gěgé ɖěvo lɛ́ ɖo nukɔn yi wɛ tawun.

Ðo xwe kanweko nukɔntɔn ɔ mɛ ɔ, wɛn ɖagbe ɔ yá wǔ vun kan ɖo xwédo lɛ́ kpó xɔ́ntɔn lɛ́ kpó tɛ́ntin. (Jaan 1:41, 42a; Mɛ. 10:24, 27, 48; 16:25-33) Kan nǔ élɔ́ byɔ́ Biblu kplɔ́ntɔ́ towe lɛ́ kpó jlǒɖótɔ́ ɖěvo lɛ́ kpó: “A ka tuun mɛ ɖěvo ɖé bɔ é ná ba ná kplɔ́n Biblu a?” Mɛ̌ ka sixú tuun Biblu kplɔ́nkplɔ́n nabí e è sixú bɛ́ hwenu e è kan nǔ énɛ́ e bɔkun é byɔ́ é?