1-2. (a) Ényí mǐ lin tamɛ dó gbɛzán Jezu tɔn kpó sinsɛnzɔ́ tɔn kpó jí ɔ, nɛ̌ mɔ̌ nǔ ka sixú cí nú mǐ? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

 ÉNYÍ mɛ e mǐ yí wǎn ná é ɖé kú ɔ, mǐ nɔ jɛ do tɔn tawun! Ðo bǐbɛ́mɛ ɔ, ényí mǐ lin tamɛ dó azǎn ɖěɖěe jɛ nukɔn nú kú mɛ vívɛ́ mǐtɔn ɔ tɔn lɛ́ é jí ɔ, mǐ nɔ se wǔvɛ́ tawun, ɖo tají ɔ, ényí é se wǔvɛ́ cóbó kú ɔ nɛ́. Amɔ̌, ényí hwenu ɖo yiyi wɛ bɔ mǐ lin tamɛ dó nǔ e é kplɔ́n mǐ alǒ wa, kabǐ ɖɔ dó dó wǔsyɛ́n lanmɛ nú mǐ, abǐ dó dó nǔkiko nú mǐ é ɖé jí ɔ, mǐ nɔ lɛ́ jɛ awǎjijɛ ɖó jí.

² Ðo ali ɖokpó ɔ nu ɔ, ényí mǐ xa nǔ dó wǔvɛ́ e Jezu mɔ é kpó kú tɔn kpó wú ɔ, wǔ nɔ kú mǐ. Ðo kú Klísu tɔn flínflín sín hwenu ɔ, mǐ nɔ ɖe hwenu ɖó vo bo nɔ lin tamɛ dó lě do vɔ̌sísá tɔn xɔ akwɛ́ sɔ é jí. (1 Kɔ. 11:24, 25) Bɔ ényí mǐ lin tamɛ dó nǔ e Jezu ɖɔ kpó nǔ e é wa hwenu e é ɖo ayǐkúngban jí lɛ́ é kpó bǐ jí ɔ, mǐ nɔ ɖó awǎjijɛ tawun. Ényí mǐ lin tamɛ dó nǔ e wa wɛ é ɖe din é kpó nǔ e é ná wá wa ɖo sɔgúdo lɛ́ é kpó jí ɔ, é nɔ lɛ́ dó wǔsyɛ́n lanmɛ nú mǐ. Tamɛ linlin dó nǔ énɛ́ lɛ́ kpó wǎn e é yí nú mǐ é kpó jí ná sísɛ́ mǐ, bɔ mǐ ná ɖe lěe nǔ su nukún mǐtɔn mɛ gbɔn é xlɛ́ ɖo ali tawun tawun ɖé lɛ́ nu, lěe mǐ ná mɔ gbɔn ɖo xóta élɔ́ mɛ é.

3. Hwɛjijɔ tɛ́ lɛ́ mɔ̌ wú gbɛxixɔ ɔ ka ɖó ná su nukún mǐtɔn mɛ?

³ Ényí mǐ lin tamɛ dó gbɛzán Jezu tɔn kpó kú tɔn kpó jí ɔ, é nɔ su nukún mǐtɔn mɛ. Ðo sinsɛnzɔ́ Jezu tɔn bǐ hwenu ɔ, é kplɔ́n nǔ mɛ lɛ́ dó nyɔ̌ná e Axɔ́súɖuto Mawu tɔn ná hɛn wá lɛ́ é wú. Nǔgbó Axɔ́súɖuto ɔ tɔn énɛ́ lɛ́ nɔ su nukún mǐtɔn mɛ tawun. Gbɛxixɔ ɔ nɔ su nukún mǐtɔn mɛ, ɖó é hun ali nú mǐ bɔ mǐ nɔ ɖu vǐví xɔ́ntɔn vívɛ́ zunzun xá Jexóva kpó Jezu kpó tɔn. Mɛ e ɖi nǔ nú Jezu lɛ́ é lɛ́ ɖó nukúnɖíɖó ɔ bo ná nɔ gbɛ káká sɔ́yi, lobo lɛ́ mɔ mɛ vívɛ́ná yětɔn e ko kú lɛ́ é bɔ yě ná  fɔ́n wá gbɛ. (Jaan 5:28, 29; Hlɔ̌. 6:23) Mǐ wa nǔ ɖěbǔ bo dó jɛxá nyɔ̌ná énɛ́ lɛ́ ǎ. Mǐ ka sixú lɛ́ wa nǔɖé bo sú nǔ e Mawu kpó Klísu kpó wa nú mǐ é sín axɔ́ yě gbeɖé ǎ. (Hlɔ̌. 5:8, 20, 21) Amɔ̌, mǐ sixú ɖe lě do nǔ e yě wa nú mǐ é su nukún mǐtɔn mɛ sɔ é xlɛ́ yě. Gbɔn nɛ̌ é?

4. Nɛ̌ Mali Magidálanu ɔ ka ɖe nǔsumɛnukúnmɛ xlɛ́ ɖó nǔ e Jezu wa n’i é wú gbɔn? (Kpɔ́n ɖiɖe ɔ.)

⁴ Ð’ayi kpɔ́ndéwú nǎwe Jwifu e nɔ nyí Mali Magidálanu é tɔn wú. É ɖo wǔvɛ́ se wɛ tawun, ɖó awǒvi tɛ́nwe ɖo ya dó n’i wɛ. É ná ko mɔ ɖɔ mɛ ɖěbǔ kún sixú d’alɔ émí ó. Énɛ́ wú ɔ, dǒ nukún lě do é ná ko su nukún tɔn mɛ sɔ, hwenu e Jezu nya yɛ nyanya lɛ́ sín jǐ tɔn é mɛ kpɔ́n! Nǔsumɛnukúnmɛ sísɛ́ ɛ b’ɛ húzú ahwanvú Jezu tɔn, bo nɔ zán hlɔ̌nhlɔ́n tɔn, hwenu tɔn kpó nǔɖókan tɔn lɛ́ kpó, dó nɔ gǔdo n’i ɖo sinsɛnzɔ́ ɔ mɛ. (Luk. 8:1-3) Nǔ e Jezu wa nú Mali é su nukún tɔn mɛ tawun, amɔ̌, é sixú ko gɔn tuuntuun ɖɔ Jezu ná wá wa nǔ nú émí hú mɔ̌ ɖo nukɔnmɛ. É ná sɔ́ gbɛ tɔn jó dó gbɛtɔ́ lɛ́ tamɛ, “bónú mɛ ɖěbǔ e ná ɖe xlɛ́ ɖɔ émí ɖi nǔ n’i é” ná sixú ɖu gbɛ mavɔmavɔ sín vǐví. (Jaan 3:16) Amɔ̌, Mali nɔ gbejí dó xlɛ́ ɖɔ nǔ e Jezu wa nú émí é su nukún émítɔn mɛ. Hwenu e Jezu ɖo ya ji wɛ ɖo yatín jí é ɔ, é ɖo akpá tɔn, ɖó nǔ tɔn nɔ ɖu ayi mɛ n’i, bɔ é lɛ́ ba ná dó gbɔ nú mɛ ɖěvo ɖěɖěe ɖo fínɛ́ lɛ́ é. (Jaan 19:25) Ée Jezu kú gúdo é ɔ, Mali kpó nyɔ̌nu we ɖěvo lɛ́ kpó hɛn nǔhwɛ́nkún yi yɔdo tɔn kɔn, bo ná yi sá nú cyɔ tɔn. (Mak. 16:1, 2) Jexóva d’ajɔ ɖaxó ɖé Mali, ɖó gbejí e é nɔ nú Jezu é wútu. É mɔ Jezu hwenu e é fɔ́n sín kú é bo ɖɔ xó xá ɛ; wǔjɔmɛ ɖé wɛ, bɔ ahwanvú lɛ́ gěgé ɖó ǎ.—Jaan 20:11-18.

5. Nɛ̌ mǐ ka sixú ɖe xlɛ́ ɖɔ nǔ e Jexóva kpó Jezu kpó wa nú mǐ lɛ́ é bǐ su nukún mǐtɔn mɛ gbɔn?

⁵ Mǐ lɔ sixú ɖe lěe nǔ e Jexóva kpó Jezu kpó wa nú mǐ lɛ́ é bǐ su nukún mǐtɔn mɛ gbɔn é xlɛ́ gbɔn hwenu mǐtɔn, hlɔ̌nhlɔ́n mǐtɔn kpó akwɛ́ mǐtɔn kpó zínzán dó nɔ gǔdo nú nukɔnyiyi azɔ̌ Axɔ́súɖuto ɔ tɔn gblamɛ. Ði kpɔ́ndéwú ɔ, mǐ sixú zé mǐɖée jó bo d’alɔ bɔ è ná gbá xɔ e  mɛ mǐ nɔ sɛn Mawu ɖe lɛ́ é, bo lɛ́ hɛn yě ɖó mǐmɛ́ jí.

6. Étɛ́wú mǐ ka sixú ɖɔ ɖɔ nǔníná ɖé wɛ gbɛxixɔ ɔ nyí bɔ Mawu ná mǐ mɛ ɖokpó ɖokpó?

⁶ Ényí mǐ lin tamɛ dó lě do Jexóva kpó Jezu kpó yí wǎn nú mǐ sɔ é jí ɔ, é nɔ sísɛ́ mǐ bɔ mǐ lɔ nɔ yí wǎn nú yě. (1 Jaan 4:10, 19) Tuuntuun ɖɔ mǐ mɛ ɖokpó ɖokpó takúnmɛ wɛ Jezu kú dó, nɔ zɔ́n bɔ wǎn e mǐ yí nú yě é nɔ lɛ́ jɛjí. Mɛsɛ́dó Pɔ́lu mɔ nukúnnú jɛ énɛ́ wú bo ɖe nǔsumɛnukúnmɛ xlɛ́ hwenu e é wlán xó élɔ́ lɛ́ sɛ́dó Galátinu lɛ́ é: “Mawu ví . . . yí wǎn nú mì, bo kú dó ta ce mɛ.” (Ga. 2:20) Gbɛxixɔ ɔ zɔ́n bɔ Jexóva dɔn we sɛkpɔ́ éɖée, bɔ énɛ́ zɔ́n bɔ a sixú nyí xɔ́ntɔn tɔn. (Jaan 6:44) Tuun e a tuun ɖɔ Jexóva mɔ nǔ ɖagbe ɖé ɖo ayi towe mɛ, bo sú axɔ́ ɖaxó ɖé bónú a ná dó sixú nɔ xɔ́ntɔn tɔn lɛ́ mɛ é víví nú we tawun ǎ cé? Énɛ́ ná hlɔ̌nhlɔ́n wǎn e a yí nú Jexóva kpó Jezu kpó é ǎ cé? É ná nyɔ́ ɖɔ mǐ ní nɔ kanbyɔ́ mǐɖée ɖɔ: ‘Étɛ́ wǎnyíyí énɛ́ ka ɖó ná sísɛ́ mì bɔ un ná wa?’

7. Lěe mǐ mɔ gbɔn ɖo fɔtóo ɔ mɛ é ɔ, nɛ̌ mǐ mɛ bǐ ka sixú ɖe wǎn e mǐ yí nú Jexóva kpó Jezu kpó é xlɛ́ gbɔn? (2 Kɔlɛ́ntinu lɛ́ 5:14, 15; 6:1, 2)

⁷ Wǎn e mǐ yí nú Mawu kpó Klísu kpó é nɔ sísɛ́ mǐ bɔ mǐ nɔ ɖe wǎnyíyí xlɛ́ mɛ ɖěvo lɛ́. (Xa 2 Kɔlɛ́ntinu lɛ́ 5:14, 15; 6:1, 2.) Ali e nu mǐ nɔ ɖe wǎnyíyí mǐtɔn xlɛ́ ɖe é ɖokpó wɛ nyí alɔ e mǐ nɔ ɖó ɖo wɛnɖagbejíjlázɔ́ ɔ mɛ kpó kanɖódónǔwú kpó é. Mǐ nɔ jlá wɛn ɔ mɛ ɖěbǔ e mǐ xo go é. Mǐ nɔ gɔn wɛn ɔ jlá mɛɖé, ɖó sinmɛ agbaza tɔn ɖěvo e é ɖó é, alǒ ɖó to ɖěvo mɛ e é gosín é wú ǎ. Mǐ nɔ lɛ́ jlá wɛn ɔ mɛ lɛ́ bǐ, dɔkunnɔ kpó wěmasetɔ́ kpó, wamamɔnɔ kpó mɛ e ma se wěma ǎ é kpó. Mɔ̌ e mǐ nɔ wa é sɔgbe xá linlin Jexóva tɔn, é wɛ nyí ɖɔ “gbɛtɔ́ lɛ́ bǐ ní mɔ hwlɛngán, bo ná tuun nǔgbó ɔ bǐ dégbédégbé.”—1 Tim. 2:4.

8. Nɛ̌ mǐ ka sixú ɖe wǎnyíyí xlɛ́ nɔví mǐtɔn lɛ́ gbɔn?

 ⁸ Mǐ nɔ lɛ́ ɖe wǎn e mǐ yí nú Mawu kpó Klísu kpó é xlɛ́ gbɔn wǎn yí nú nɔví mǐtɔn lɛ́ gblamɛ. (1 Jaan 4:21) Nǔ e hudó yě lɛ́ é nɔ ɖu ayi mɛ nú mǐ tawun, bɔ mǐ nɔ lɛ́ d’alɔ yě ɖo wǔvɛ́ yětɔn lɛ́ mɛ. Mǐ nɔ dó gbɔ nú yě hwenu e mɛ vívɛ́ná yětɔn ɖé kú é, nɔ yi ba yě kpɔ́n hwenu e yě ɖo azɔn jɛ wɛ é, bo nɔ lɛ́ wa nǔ e wú mǐ kpé é bǐ dó dó wǔsyɛ́n lanmɛ nú yě, hwenu e awakanmɛ kú yě é. (2 Kɔ. 1:3-7; 1 Tɛ. 5:11, 14) Mǐ nɔ kpo ɖo ɖɛ xo dó ta yětɔn mɛ wɛ, ɖó mǐ tuun ɖɔ “ɖɛ e hwɛjijɔnɔ nɔ xo ɔ nɔ ɖó hlɔ̌nhlɔ́n ɖésú.”—Ja. 5:16.

9. Ali ɖěvo tɛ́ nu mǐ ka sixú ɖe xlɛ́ ɖɔ mǐ yí wǎn nú nɔví mǐtɔn lɛ́ ɖe?

⁹ Mǐ nɔ lɛ́ ɖe wǎnyíyí xlɛ́ nɔví mǐtɔn lɛ́ gbɔn tíntɛ́nkpɔ́n bo nɔ fífá mɛ xá yě gblamɛ. Mǐ nɔ tɛ́n kpɔ́n bo nɔ xwedó kpɔ́ndéwú hwɛsɔ́kɛmɛ tɔn Jexóva tɔn. Ényí Jexóva sɔ́ jlǒ dó sɔ́ Vǐ tɔn jó bɔ é kú dó hwɛ mǐtɔn lɛ́ tamɛ ɔ, mǐ lɔ ɖó ná ɖo gbesisɔmɛ bá sɔ́ hwɛ kɛ nɔví mǐtɔn lɛ́ hwenu e yě jɛ agɔ dó mǐ é ǎ cé? Mǐ ba ná cí kannumɔ nyanya e xó Jezu ɖɔ ɖo lǒ tɔn lɛ́ ɖokpó mɛ é ɖɔhun ǎ. Kannumɔ énɛ́ sín gǎn sɔ́ axɔ́ ɖaxó e é ɖu dó è é kɛ ɛ có, éyɛ́ ka sɔ́ hwɛ kɛ kannumɔ gbɛ̌ tɔn ɖěvo e ɖu axɔ́ kpɛví títí ɖé dó è é ǎ. (Mat. 18:23-35) Ényí kwinkwin ɖé ɖo hwi kpó nɔví ɖé kpó tɛ́ntin ɖo agun ɔ mɛ ɔ, a ka ná sixú ɖe afɔ nukɔntɔn ɔ, bo xo fífá kan cóbó yi kú Klísu tɔn flínflín domɛ a? (Mat. 5:23, 24) Ényí a wa mɔ̌ ɔ, a ná ɖe xlɛ́ ɖɔ émí yí wǎn ɖaxó nú Jexóva kpó Jezu kpó.

10-11. Nɛ̌ mɛxó agun tɔn lɛ́ ka sixú ɖe wǎnyíyí e yě ɖó nú Jexóva kpó Jezu kpó é xlɛ́ gbɔn? (1 Piyɛ́ɛ 5:1, 2)

¹⁰ Nɛ̌ mɛxó agun tɔn lɛ́ ka sixú ɖe xlɛ́ ɖɔ yě yí wǎn nú Jexóva kpó Jezu kpó gbɔn? Ali tají e nu yě sixú wa mɔ̌ ɖe é wɛ nyí ɖɔ yě ná nɔ kpé nukún dó hudó lɛ̌ngbɔ́ Jezu tɔn lɛ́ tɔn wú. (Xa 1 Piyɛ́ɛ 5:1, 2.) Jezu ɖe énɛ́ xlɛ́ nyi wɛn nú mɛsɛ́dó Piyɛ́ɛ. Ée Piyɛ́ɛ gbɛ́ Jezu azɔn atɔn gúdo é ɔ, é lɛ́ ba vɛ́návɛ́ná bá xlɛ́ Jezu ɖɔ émí yí wǎn n’i. Ée Jezu fɔ́n sín kú gúdo é ɔ, é kanbyɔ́ Piyɛ́ɛ ɖɔ: “Sinmɔ́ɔ Jaan ví, a yí wǎn nú mì a?” Mǐ sixú kú d’é jí ɖɔ Piyɛ́ɛ ná ko wa nǔ e wú é kpé é bǐ dó xlɛ́ Gǎn tɔn ɖɔ émí yí wǎn n’i. Jezu ɖɔ nú Piyɛ́ɛ ɖɔ: “Kpé nukún dó lɛ̌ngbɔ́ví ce lɛ́ wú.” (Jaan 21:15-17) Nǔgbó ɔ, nú gbɛhwenu Piyɛ́ɛ tɔn e kpo é bǐ ɔ, é kpé nukún dó lɛ̌ngbɔ́ Aklúnɔ tɔn lɛ́ wú kpó wǎnyíyí kpó, dó ɖe xlɛ́ ɖɔ émí yí wǎn nú Jezu.

¹¹ Mɛxó agun tɔn lɛ́ mi, ɖo kú Klísu tɔn flínflín sín táan mɛ ɔ, nɛ̌ mi ka sixú ɖe xlɛ́ ɖɔ xó e Jezu ɖɔ nú Piyɛ́ɛ lɛ́ é ɖo tají tawun nú mi gbɔn? Ényí mi nɔ ɖ’alɔ ɖo mɛbakpɔ́n lɛ̌ngbɔ́nyitɔ́ tɔn mɛ hwɛhwɛ, bo nɔ lɛ́ dó gǎn bǔnɔ ɖé dó d’alɔ mɛ ɖěɖěe awakanmɛ ko kú lɛ́ é bónú yě ní lɛ́ kɔ wá Jexóva gɔ́n hǔn, lě do mi yí wǎn nú Jexóva kpó Jezu kpó sɔ é ɖe xlɛ́ wɛ mi ɖe mɔ̌ nɛ́. (Ezek. 34:11, 12) Mi sixú lɛ́ ɖe xlɛ́ ɖɔ Biblu kplɔ́ntɔ́ lɛ́ kpó mɛ yɔ̌yɔ́ e wá kú Klísu tɔn flínflín domɛ lɛ́ é kpó sín nǔ nɔ ɖu ayi mɛ nú mi gbɔn nǔ e wú mi kpé é bǐ wiwa bónú ahwanvú sɔgúdo tɔn énɛ́ lɛ́ ná vo gblamɛ.

12. Étɛ́wú tamɛ linlin dó xó ɖěɖěe Jezu ɖɔ ɖo zǎn e jɛ nukɔn nú kú tɔn é mɛ lɛ́ é jí ka nɔ ná mǐ akɔ́nkpinkpan? (Jaan 16:32, 33)

¹² Ðo zǎn e jɛ nukɔn nú kú Klísu tɔn é mɛ ɔ, é ɖɔ nú ahwanvú tɔn lɛ́ ɖɔ: “Mi ná mɔ wǔvɛ́ ɖo gbɛ ɔ mɛ, amɔ̌, mi kpankɔ́n! Un ko ɖu ɖo gbɛ ɔ jí.” (Xa Jaan 16:32, 33.) Étɛ́ ka d’alɔ Jezu bɔ é kpankɔ́n hwenu e kɛntɔ́ tɔn lɛ́ ɖo adǎn gblɔ́n n’i wɛ é bo nɔ gbejí káká yi kú? Jiɖe e é ɖó dó Jexóva wú é wɛ. Ðó Jezu tuun ɖɔ ahwanvú émítɔn lɛ́ ná gbɔn mɛtɛ́nkpɔ́n mɔ̌hun lɛ́ mɛ wútu ɔ, é xo ɖɛ sɛ́dó Jexóva ɖɔ é ní kpɔ́n yě jí. (Jaan 17:11) Étɛ́wú énɛ́ ka ná  mǐ akɔ́nkpinkpan? Ðó Jexóva ɖó hlɔ̌nhlɔ́n hú kɛntɔ́ mǐtɔn lɛ́ bǐ. (1 Jaan 4:4) Nǔ bǐ wɛ é nɔ mɔ. Mǐ kú d’é jí ɖɔ ényí mǐ ɖeji dó Jexóva wú ɔ, mǐ sixú ɖu ɖo xɛsi mǐtɔn lɛ́ jí, lobo ɖe akɔ́nkpinkpan xlɛ́.

13. Nɛ̌ Jozɛ́fu Alimatéenu ɔ ka ɖe akɔ́nkpinkpan xlɛ́ gbɔn?

¹³ Ð’ayi kpɔ́ndéwú Jozɛ́fu Alimatéenu ɔ tɔn wú. Jwifu lɛ́ nɔ ɖó sísí n’i titewungbe tɔn. É ɖo mɛ e ɖo hwɛɖɔxɔsá ɖaxó Jwifu lɛ́ tɔn mɛ lɛ́ é mɛ. Amɔ̌, ɖo sinsɛnzɔ́ Jezu tɔn hwenu ɔ, Jozɛ́fu kpankɔ́n ǎ. Jaan ɖɔ ɖɔ é ‘nyí ahwanvú Jezu tɔn, bo kún ka ɖe mɔ̌ xlɛ́ ó, ɖó é ɖo xɛsi ɖi nú Jwifugán lɛ́ wɛ wútu.’ (Jaan 19:38) Jozɛ́fu yí wɛn Axɔ́súɖuto ɔ tɔn có, é ka lɔn nú mɛ ɖěvo lɛ́ ní tuun ɖɔ é ɖi nǔ nú Jezu ǎ. É sixú ko nyí ɖɔ xɛsi wɛ ɖo ɖiɖi i wɛ ɖɔ ényí mɛ ɖěvo lɛ́ tuun ɖɔ émí nyí ahwanvú Jezu tɔn ɔ, yě kún sɔ́ ná nɔ sí émí ɖě ó. Ðěbǔ wɛ é ná bo nyí gbɔn ɔ, Biblu ɖɔ nú mǐ ɖɔ ɖo kú Jezu tɔn gúdo ɔ, Jozɛ́fu “kpankɔ́n bo yi Pilátu gɔ́n, lobo byɔ́ cyɔ Jezu tɔn.” (Mak. 15:42, 43) Jozɛ́fu sɔ́ tɛ́n kpɔ́n bo ná hwlá ahwanvú Jezu tɔn e é nyí é ɖě ǎ.

14. Ényí a ɖo xwi ɖí xá xɛsi ɖi nú gbɛtɔ́ wɛ ɔ, étɛ́ a ka ɖó ná wa?

¹⁴ Xɛsi ko ɖi we dó gbɛtɔ́ wú Jozɛ́fu ɖɔhun kpɔ́n a? Winnyá ka nɔ hu we hweɖélɛ́nu bɔ a nɔ gɔn ɖiɖexlɛ́ ɖɔ émí nyí Kúnnuɖetɔ́ Jexóva tɔn ɖo wěmaxɔmɛ, alǒ azɔ̌mɛ wɛ a? A ɖo nǎ nǎ ɖó nú wɛnjlátɔ́ nyínyí, alǒ batɛ́mu bíbló wɛ ɖó ado ɖo huhu we wɛ ɖó nǔ e mɛ ɖěvo lɛ́ sixú lin dó wǔ we é wú wɛ a? Ma lɔn nú linlin mɔ̌hun gbo kpo nyi ali jí nú we nú a gbɔ nǔ e a tuun ɖɔ é nyɔ́ é wa ó. Nɔ xo ɖɛ vívɛ́ sɛ́dó Jexóva. Nɔ byɔ́ ɛ ɖɔ é ní ná we akɔ́nkpinkpan bónú a ná wa jlǒ tɔn. Ényí a ɖo lěe Jexóva nɔ ná xósin nú ɖɛ towe lɛ́ gbɔn é mɔ wɛ ɔ, énɛ́ ná ná we hlɔ̌nhlɔ́n bɔ a ná lɛ́ kpankɔ́n hú gǎn.—Eza. 41:10, 13.

15. Ée Jezu ɖe éɖée xlɛ́ ahwanvú tɔn lɛ́ gúdo é ɔ, étɛ́ awǎjijɛ yětɔn ka sísɛ́ yě bɔ yě wa? (Luki 24:52, 53)

¹⁵ Wǔ kú ahwanvú lɛ́ tawun hwenu e Jezu kú é. Sɔ́ hwiɖée ɖó tɛn yětɔn mɛ. Xɔ́ntɔn vívɛ́ yětɔn kú. Énɛ́ kɛ́ɖɛ́ ka wɛ ǎ, é cí ɖɔ yě lɛ́ ba nukúnɖíɖó kpo ɖɔhun. (Luk. 24:17-21) Amɔ̌, hwenu e Jezu ɖe éɖée xlɛ́ yě é ɔ, é zán hwenu dó d’alɔ yě bɔ yě mɔ nǔ jɛ nǔ e é ɖó ná wa bɔ nǔɖɔɖayǐ Biblu tɔn lɛ́ ná jɛnu é mɛ. É lɛ́ sɔ́ azɔ̌ tají ɖé d’así nú yě bɔ yě ná wa. (Luk. 24:26, 27, 45-48) Ée Jezu yi jǐxwé ɖo azǎn 40 gúdo é ɔ, aluwɛ ahwanvú lɛ́ tɔn húzú awǎjijɛ ɖaxó. Tuun e yě tuun ɖɔ gǎn émítɔn ɖo gbɛ, bo ɖo gbesisɔmɛ bo ná d’alɔ émí, bɔ émí ná  wa azɔ̌ yɔ̌yɔ́ e é sɔ́ d’así nú émí é é d’awǎjijɛ nú yě. Awǎjijɛ e mɛ yě ɖe é zɔ́n bɔ yě kpa susu nú Jexóva, bɔ nǔ ɖěbǔ sixú ɖó énɛ́ te ǎ.—Xa Luki 24:52, 53; Mɛ. 5:42.

16. Nɛ̌ mǐ ka sixú xwedó kpɔ́ndéwú ahwanvú Jezu tɔn lɛ́ tɔn gbɔn?

¹⁶ Nɛ̌ mǐ ka sixú xwedó kpɔ́ndéwú ahwanvú Jezu tɔn lɛ́ tɔn gbɔn? Jexóva sinsɛn sixú hɛn awǎjijɛ wá nú mǐ ɖo kú Klísu tɔn flínflín sín hwenu, bo lɛ́ wa mɔ̌ ɖo xwe ɔ bǐ mɛ. Énɛ́ nɔ byɔ́ ɖɔ mǐ ní sɔ́ Axɔ́súɖuto Mawu tɔn ɖó tɛn nukɔntɔn ɔ mɛ ɖo gbɛzán mǐtɔn mɛ. Ði kpɔ́ndéwú ɔ, mɛ gěgé vɔ́ tuto bló nú azɔ̌ yětɔn, bo ná dó sixú ɖ’alɔ ɖo sinsɛnzɔ́ ɔ mɛ, yi kplé agun tɔn lɛ́, bo lɛ́ sɛn Mawu ɖo xwédo mɛ hwɛhwɛ. Mɛɖé lɛ́ wá gbeta ɔ kɔn bo ná gɔn nǔ agbaza tɔn e mɛ ɖěvo lɛ́ nɔ lin ɖɔ é ɖo dandan lɛ́ é gbé nya, bo ná dó sixú nyɔ́ zán d’é jí ɖo agun ɔ mɛ, alǒ yi sɛn Jexóva ɖo fí e è ɖó hudó wɛnjlátɔ́ Axɔ́súɖuto ɔ tɔn lɛ́ tɔn ɖe hú gǎn é. É nɔ byɔ́ didɛ cóbɔ è ná kpo ɖo Jexóva sɛn wɛ có, é d’akpá nú mǐ ɖɔ ényí mǐ sɔ́ nǔ e kúnkplá nukɔnyiyi Axɔ́súɖuto ɔ tɔn lɛ́ é ɖó tɛn nukɔntɔn ɔ mɛ ɖo gbɛzán mǐtɔn mɛ ɔ, émí ná kɔn nyɔ̌ná dó mǐ jí bɔ é ná túnflá.—Nǔx. 10:22; Mat. 6:32, 33.

17. Étɛ́ a ka kán ɖ’é jí bá wa ɖo kú Klísu tɔn flínflín sín táan élɔ́ mɛ? (Kpɔ́n fɔtóo ɔ.)

¹⁷ Mǐ ɖo nukún ɖó wɛ bo ná flín kú Klísu tɔn ɖo mardi 4 avril. Amɔ̌, ma nɔ te kpɔ́n hwe énɛ́ nu cóbó lin tamɛ dó gbɛzán Jezu tɔn, kú tɔn kpó wǎnyíyí e é kpó Jexóva kpó ɖe xlɛ́ mǐ é kpó jí ó. Gbɔn ali e hun nú we ɖo kú Klísu tɔn flínflín sín hwenu lɛ́ é bǐ sín yɛkan mɛ dó wa mɔ̌. Ði kpɔ́ndéwú ɔ, a sixú ɖe hwenu ɖó vo bo xa xóta “Nɛ̌ a ka ná sɔ́ nǔ nú flǐn ɔ gbɔn?,” lobo lin tamɛ dó nǔ e è ɖɔ ɖo fínɛ́ lɛ́ é jí. É ɖo Gbɛzán kpó sinsɛnzɔ́ kpó: Kplé sín azɔ̌wéma, avril 2019 mɛ, ɖo wěxwɛ 4gɔ́ ɔ jí. Ée a ná ɖo nǔ xa dó gbɛzán Jezu tɔn wú wɛ é ɔ, ba wěmafɔ ɖěɖěe ná zɔ́n bɔ nǔsumɛnukúnmɛ towe, wǎnyíyí towe, akɔ́nkpinkpan towe kpó awǎjijɛ towe kpó ná jɛjí lɛ́ é. Énɛ́ gúdo hǔn, tɛ́n kpɔ́n bo lin tamɛ dó ali tawun tawun e nu a sixú ɖe lě do nǔ su nukún towe mɛ sɔ é xlɛ́ ɖe lɛ́ é jí. A sixú kú d’é jí ɖɔ nǔ e a wa ɖo kú Klísu tɔn flínflín sín táan mɛ dó flín i lɛ́ é bǐ ná xɔ akwɛ́ ɖo nukún tɔn mɛ.—Nǔɖe. 2:19.