1. Étɛ́ jí mɛ gěgé ka nɔ sɔ́ ayi ɖó ɖo égbé?

 A KA ɖó ayi wú ɖɔ ɖo égbé ɔ, mɛ gěgé tíin bɔ nǔ yěɖésúnɔ tɔn lɛ́ wɛ nɔ ɖu ayi mɛ nú yě hú mɛ ɖěvo lɛ́ tɔn a? Ði kpɔ́ndéwú ɔ, mɛɖé lɛ́ nɔ zán tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é dó dɔn ayi wá yěɖée jí, bo nɔ lɛ́ ɖó nǔ e yě wa lɛ́ é agban. É ɖo mɔ̌ có, mɛ kléwún ɖé nɔ kpa susu nú Jexóva Mawu ɖo égbé. Ðo xóta élɔ́ mɛ ɔ, mǐ ná ɖɔ xó dó nǔ e è ní xɔ susu nú Jexóva sín tínmɛ nyí é kpó nǔ e ɖó ná sísɛ́ mǐ bɔ mǐ ná wa mɔ̌ é kpó jí. Mǐ ná lɛ́ kplɔ́n lěe mǐ sixú xɔ susu e Mawu jɛxá é n’i gbɔn é kpó lěe éɖésúnɔ mɛtún ɔ ná xɔ susu nú nyǐkɔ tɔn ɖo malínmálín mɛ gbɔn é kpó.

ÉTƐ́ KA NYÍ TÍNMƐ È NÍ XƆ SUSU NÚ JEXÓVA TƆN?

2. Nɛ̌ Jexóva ka ɖe susu tɔn xlɛ́ ɖo só Sinayíi tɔn jí gbɔn? (Kpɔ́n ɖiɖe ɔ lɔmɔ̌.)

² Étɛ́ ka nɔ nyí susu? Ðo Biblu mɛ ɔ, xókwín “susu” ɔ sixú dó gesí nǔ ɖěbǔ e ná zɔ́n bɔ mɛɖé ná nyí mɛ nukúnɖéjí é. Jexóva ɖe susu tɔn xlɛ́ ɖo ali bǔnɔ ɖé nu ée Izlayɛ́li ví lɛ́ gosín kannumɔgbénu ɖo Ejípu b’ɛ ná nɔ zaan é. Dǒ nukún ninɔmɛ ɔ mɛ kpɔ́n: Izlayɛ́li ví lǐvi mɔ̌kpán kplé ɖo Sinayíi só ɔ kpá bá kpé Mawu yětɔn. Akpɔ́kpɔ́ wiwi ɖé dó dó só ɔ jí. Ajijimɛ kpowun ɔ, azizɔ kpé fí bǐ, ayǐkúngban dán wǔ syɛ́nsyɛ́n, bɔ jǐ lɛ́ ɖo wun kɛ wɛ bo ɖo gbe dó wɛ, bɔ lanzo ɖo nǔ ɖɔ wɛ syɛ́nsyɛ́n. (Tín. 19:16-18; 24:17; Ðɛh. 68:9) Dǒ nukún lěe é ná ko jí wǔ nú Izlayɛ́li ví ɖěɖěe ɖo fínɛ́ lɛ́ é sɔ hwenu e Jexóva  wa nǔ énɛ́ lɛ́ dó xɔ susu nú éɖée é mɛ kpɔ́n.

3. Nɛ̌ mǐ ka sixú sɔ́ Jexóva su gbɔn?

³ Amɔ̌, gbɛtɔ́ lɛ́ ka lo? Mǐ ka sixú xɔ susu nú Jexóva dóó a? Ganjí, mǐ sixú kpé wú. Ali e nu mǐ nɔ xɔ susu nú Jexóva ɖe é ɖokpó wɛ nyí gbɔn xó ɖiɖɔ nú mɛ ɖěvo lɛ́ dó hlɔ̌nhlɔ́n jí wǔ tɔn kpó jijɔ tɔn ɖaaɖagbe lɛ́ kpó wú gblamɛ. Mǐ nɔ lɛ́ xɔ susu nú Mawu hwenu e é ná hlɔ̌nhlɔ́n mǐ bɔ mǐ wa nǔɖé bo sɔ́ susu ɔ jó n’i é. (Eza. 26:12) Mɛ e xɔ susu nú Jexóva lɛ́ é sín kpɔ́ndéwú nukúnɖéjí ɖé wɛ axɔ́sú Davídi nyí. Ðo ɖɛ e Davídi xo ɖo togun Izlayɛ́li tɔn nukɔn é ɖé mɛ ɔ, é ɖɔ nú Mawu ɖɔ: ‘Jexóva, towe wɛ nyí susu, hlɔ̌nhlɔ́n, acɔ́, axɔ́súɖuɖu kpó wěziza kpó, ɖó nǔ e ɖo jǐnukúnsin kpó ayǐkúngban jí kpó lɛ́ bǐ wɛ nyí towe.’ Ée Davídi xo ɖɛ ɔ kpé é ɔ, ‘togun ɔ bǐ dó kú nú Jexóva.’—1 Tan 29:11, 20.

4. Nɛ̌ Jezu ka sɔ́ Jexóva su gbɔn?

⁴ Hwenu e Jezu ɖo ayǐkúngban jí é ɔ, é xɔ susu nú Tɔ́ tɔn gbɔn tuuntuun ɖɔ é wɛ nyí Jɔtɛn nǔjíwǔ émítɔn lɛ́ tɔn gblamɛ. (Mak. 5:18-20) Jezu lɛ́ xɔ susu nú Jexóva gbɔn ali e nu é ɖɔ xó dó Tɔ́ tɔn wú ɖe é kpó lěe é wa nǔ xá mɛ ɖěvo lɛ́ gbɔn é kpó gblamɛ. Jezu ɖo nǔ kplɔ́n mɛ wɛ ɖo kplɔ́ngbasá ɖé gbe ɖokpó. Nǎwe e jí gbigbɔ nyanya ɖé ɖe sín xwe 18 ɖíe é ɖo mɛ e ɖo tó ɖó è wɛ lɛ́ é mɛ. Gbigbɔ nyanya ɔ ko zɔ́n bɔ nǎwe ɔ nɔ zɔn tɔ́tɔ́ bo nɔ sixú jlɔ́ ǎ. É vɛ́ wǔ tawun! Wǔvɛ́sexámɛ sísɛ́ Jezu bɔ é sɛkpɔ́ nǎwe ɔ bo ɖɔ xó élɔ́ lɛ́ n’i kpó xomɛnyínyɔ́ kpó: “Nǎwe, è ko gbɔ azɔn towe nú we.” Énɛ́ gúdo ɔ, é ɖó alɔ jǐ tɔn, bɔ tlóló ɔ, nǎwe ɔ jlɔ́ bo “jɛ susu kpa nú Mawu jí.” Azɔn tɔn gbɔ bǐ mlɛ́mlɛ́ bɔ wi lɛ́ jɛ ta tɔn! (Luk. 13:10-13) Nǎwe énɛ́ sín hwɛ jɔ b’ɛ kpa susu nú Jexóva, hwɛ mǐ lɔ tɔn jɔ bɔ mǐ ná kpa susu nú Jexóva.

ÉTƐ́ KA NƆ SÍSƐ́ MǏ BƆ MǏ NƆ KPA SUSU NÚ JEXÓVA?

5. Hwɛjijɔ tɛ́ lɛ́ mǐ ka ɖó bo ná nɔ ɖó sísí nú Jexóva?

⁵ Mǐ nɔ kpa susu nú Jexóva ɖó mǐ ɖó sísí e gɔ́ngɔ́n é n’i. Mǐ ɖó hwɛjijɔ e wú mǐ ná ɖó sísí n’i é gěgé. Jexóva wɛ nyí Ajalɔ̌nlɔn; hlɔ̌nhlɔ́n tɔn ɖó dogbó ǎ. (Ðɛh. 96:4-7) Nǔnywɛ́ tɔn e gɔ́ngɔ́n é jɛ wě vaan ɖo nǔ e é dá lɛ́ é mɛ. É wɛ nyí Jɔtɛn gbɛ mǐtɔn tɔn, é wɛ ka lɛ́ zɔ́n bɔ mǐ ɖo gbɛ. (Nǔɖe. 4:11) É ɖo gbejí. (Nǔɖe. 15:4) Nǔ e é nɔ wa lɛ́ é bǐ nɔ yi ta, bɔ é nɔ lɛ́ ɖe akpá tɔn lɛ́ hwebǐnu. (Joz. 23:14) Nǔ e wú gbeyíɖɔ Jelemíi ɖɔ xó élɔ́ dó wǔ tɔn é nɛ́: “Nǔnywɛ́tɔ́ e ɖo axɔ́súɖuto lɛ́ bǐ mɛ, gbɔn akɔta lɛ́ bǐ mɛ ɔ, è sixú jlɛ́ ɖě dó wǔ we ǎ”! (Jel. 10:6, 7) É ɖo wɛn ɖɔ, mǐ ɖó hwɛjijɔ ɖagbe e wú mǐ ná ɖó sísí nú Tɔ́ mǐtɔn jǐxwé tɔn ɔ é gěgé. Amɔ̌, é nyí sísí mǐtɔn kɛ́ɖɛ́ wɛ Jexóva jɛxá ǎ; é lɛ́ jɛxá ɖɔ mǐ ní yí wǎn n’i.

6. Étɛ́wú mǐ ka yí wǎn nú Jexóva?

⁶ Mǐ nɔ kpa susu nú Jexóva ɖó mǐ yí wǎn n’i tawun. Lin tamɛ dó jijɔ Jexóva tɔn ɖěɖěe zɔ́n bɔ mǐ yí wǎn n’i lɛ́ é jí. É nɔ kú nǔbláwǔ nú mɛ bo nɔ lɛ́ se wǔvɛ́ xá mɛ. (Ðɛh. 103:13; Eza. 49:15) Ényí wǔ kú mǐ ɔ, wǔ nɔ kú é lɔmɔ̌. (Zak. 2:12) É bló bɔ é bɔ wǔ nú mǐ bɔ mǐ ná sɛkpɔ́ ɛ bo zun xɔ́ntɔn xá ɛ. (Ðɛh. 25:14; Mɛ. 17:27) Gɔ́ ná ɔ, é nɔ sɔ́ éɖée hwe; é “nɔ nya bo nɔ kpɔ́n jǐxwé kpó ayǐkúngban kpán sɛ́dó. É nɔ sɔ́ wamamɔnɔ sí te sín kɔ́gúdu mɛ.” (Ðɛh. 113:6, 7) Ðó hwɛjijɔ énɛ́ lɛ́ bǐ wú ɔ, mǐ ba ná kpa susu nú Mawu ɖaxó mǐtɔn ǎ cé?—Ðɛh. 86:12.

7. Ali bǔnɔ tɛ́ ka hun nú mǐ?

⁷ Mǐ nɔ kpa susu nú Jexóva ɖó mǐ ba ɖɔ mɛ ɖěvo lɛ́ ní tuun i. Mɛ gěgé tíin bo tuun nǔgbó ɔ dó Jexóva wú ǎ. Étɛ́wú? Ðó Satáan nɔ fúnfún adingban baɖabaɖa lɛ́ kpé dó wǔ tɔn dó va nukún ayixa yětɔn. (2 Kɔ. 4:4) Satáan ko bló bɔ mɛ lɛ́ nɔ lin ɖɔ Jexóva nɔ ba hlɔn,  nǔ mɛtɔn kún nɔ ɖu ayi mɛ n’i ó, bo lɛ́ nyí wǔvɛ́ e se wɛ gbɛ ɔ ɖe lɛ́ é gěgé sín ɖɔ. Amɔ̌, mǐ tuun nǔgbó ɔ dó Mawu mǐtɔn wú. Ali hun nú mǐ bɔ mǐ ná ɖe mɛ lɛ́ ɖó ali jí, bɔ mɔ̌ mɛ ɔ, yě ná kpa susu n’i. (Eza. 43:10) Ðɛhan 96​gɔ́ ɔ sɔ́ ayi ɖó susu kpikpa nú Jexóva jí. Ée mǐ ná ɖo xó ɖɔ dó Ðɛhan énɛ́ sín akpáxwé ɖé lɛ́ jí wɛ é ɔ, lin tamɛ dó ali ɖěɖěe nu a sixú kpa susu e Jexóva jɛxá nǔgbó nǔgbó é n’i ɖe lɛ́ é jí.

NƐ̌ MǏ KA SIXÚ KPA SUSU E JEXÓVA JƐXÁ É N’I GBƆN?

8. Ðɔ ali e nu mǐ sixú kpa susu nú Jexóva ɖe é ɖokpó. (Ðɛhan 96:1-3)

⁸ Xa Ðɛhan 96:1-3. Mǐ sixú kpa susu nú Jexóva gbɔn nǔ e mǐ nɔ ɖɔ dó wǔ tɔn é gblamɛ. Ðo wěmafɔ énɛ́ lɛ́ mɛ ɔ, è byɔ́ togun Jexóva tɔn ɖɔ é ní ‘ji han dó kpa Jexóva,’ “xo mlá nyǐkɔ tɔn,” “jlá hwlɛngán e é nɔ ná mɛ ɔ,” bo “jlá susu e é ɖó ɔ gbɔn akɔta lɛ́ bǐ mɛ.” Ali énɛ́ lɛ́ bǐ nu wɛ mǐ sixú kpa susu nú Tɔ́ mǐtɔn jǐxwé tɔn ɔ ɖe. Jwifu gbejínɔtɔ́ lɛ́ kpó klisánwun xwe kanweko nukɔntɔn ɔ tɔn lɛ́ kpó xo nǔ kpɔ́n dó xó ɖiɖɔ nú mɛ ɖěvo lɛ́ dó nǔ ɖaaɖagbe e Jexóva ko wa nú yě lɛ́ é bǐ kpó hunjijɛ dó nyǐkɔ ɖagbe e é ɖó é kpó jí wú ǎ. (Dan. 3:16-18; Mɛ. 4:29) Nɛ̌ mǐ ka sixú wa nǔ ɖokpó ɔ gbɔn?

9-10. Étɛ́ nǔ e jɛ dó Angelena jí é ka kplɔ́n we? (Kpɔ́n ɖiɖe ɔ lɔmɔ̌.)

⁹ Kpɔ́n nǔ e jɛ dó nɔví nyɔ̌nu e nɔ nɔ États-Unis bo nɔ nyí Angelena a é jí é. É jɛ hun dó nyǐkɔ ɖagbe e Jexóva ɖó é jí kpó akɔ́nkpinkpan kpó ɖo azɔ̌xwé e é nɔ w’azɔ̌ ɖe é. Ðó azɔ̌watɔ́ yɔ̌yɔ́ wɛ Angelena nyí wútu ɔ, è ylɔ́ ɛ dó kplé ɖé domɛ. Ðo kplé énɛ́ jí ɔ, ali hun nú mɛ e jɛ azɔ̌ wa jí ɖo azɔ̌xwé ɔ bɔ é ma ko lín ǎ lɛ́ é nú yě ná ɖɔ xó kléwún ɖé dó gbɛzán yětɔn wú nú azɔ̌gbɛ́ yětɔn lɛ́. Angelena sɔ́ nǔ nú fɔtóo ɖé lɛ́ bá dó tínmɛ awǎjijɛ e é ɖó ɖo gbɛzán tɔn mɛ, ɖó é nyí Kúnnuɖetɔ́ Jexóva tɔn wútu é. Amɔ̌, cóbónú xó ná jɛ jǐ tɔn ɔ, azɔ̌gbɛ́ tɔn ɖé yí xó bo ɖɔ ɖɔ è kplɔ́n émí bɔ émí su ɖo nǔgbó ɔ mɛ. É jɛ slamɛ ɖɔ nǔ e mǐ ɖi nǔ ná lɛ́ é wú jí. Angelena ɖɔ: “Hǔn ce jɛ xixo jí. Amɔ̌, un ɖɔ nú nyiɖée ɖɔ: ‘Un ná tin bɔ mɛɖé ná ɖó adingban dó Jexóva kɔ wɛ a? Alǒ, un ná jɛ hun dó jǐ tɔn?’”

¹⁰ Ée azɔ̌gbɛ́ ɔ fó xó tɔn é ɔ, Angelena xo ɖɛ kléwún dó xomɛ. Énɛ́ gúdo ɔ, é ɖɔ xó n’i kpó xomɛnyínyɔ́ kpó bo ɖɔ: “Hwi ɖɔhun ɔ, nyi  lɔmɔ̌ ɔ, è kplɔ́n mì bɔ un nyí Kúnnuɖetɔ́ Jexóva tɔn, bo ka kpo ɖo Kúnnuɖetɔ́ Jexóva tɔn nyí wɛ káká jɛ égbé.” Ninɔmɛ ɔ d’ayihún ǎ có, Angelena ka yi agbɔ̌n jí hwenu e é ɖo fɔtóo ɖěɖěe sɔ́ akpakpa mɛ bɔ é ɖe ɖo nǔ gbigbɔ tɔn lɛ́ kɔn é xlɛ́ wɛ é kpó hwenu e é ɖo ayi hɛn dó jɛ hun dó nǔɖiɖi tɔn jí wɛ é kpó. (1 Pi. 3:15) Étɛ́ ka jɛ bɔ d’é wú? Ée Angelena ɖɔ xó kpé é ɔ, nya ɔ byɔ́ éɖée mɛ. É tlɛ ɖɔ nǔ ɖagbe e jɛ dó jǐ tɔn hwenu e é kpo ɖo vǔ bo nɔ dó gbɛ̌ xá Kúnnuɖetɔ́ Jexóva tɔn lɛ́ é ɖé lɛ́. Angelena ɖɔ: “É jɛxá ɖɔ è ní jɛ hun dó Jexóva jí. Wǔjɔmɛ wɛ é nyí ɖɔ è ní ɖɔ xó dó jɛ hun dó nyǐkɔ tɔn jí.” Mǐ lɔ ɖó wǔjɔmɛ ɔ bo ná kpa susu nú Jexóva, bo sɔ́ ɛ su ényí mɛ ɖěvo lɛ́ ná bo ma tlɛ nɔ ɖó sísí n’i ǎ ɔ nɛ́.

11. Sín hwexónu ɔ, nɛ̌ mawusɛntɔ́ nǔgbó lɛ́ ka nɔ xwedó nǔgbódodó e ɖo Ðɛhan 96:8 mɛ é gbɔn?

¹¹ Xa Ðɛhan 96:8. Mǐ sixú sɔ́ nǔ xɔ akwɛ́ mǐtɔn lɛ́ dó kpa susu nú Jexóva. Mɛsɛntɔ́ nǔgbó Jexóva tɔn lɛ́ ko wlí yɛ̌yi nú Jexóva gbɔn mɔ̌ hwebǐnu. (Nǔx. 3:9) Ði kpɔ́ndéwú ɔ, Izlayɛ́li ví lɛ́ ná nǔ dó tɛ́npli ɔ gbígbá kpó nukúnkpíkpé d’é wú kpó takúnmɛ. (2 Axɔ́. 12:5, 6; 1 Tan 29:3-9) Ahwanvú Klísu tɔn ɖé lɛ́ zán “nǔɖókan yětɔn lɛ́” dó wa mɛsɛntɔ́zɔ́ nú é kpó mɛsɛ́dó tɔn lɛ́ kpó. (Luk. 8:1-3) Klisánwun xwe kanweko nukɔntɔn ɔ tɔn lɛ́ lɔmɔ̌ jɔ fún dó sɔ hinhɛn nɔví súnnu kpó nɔví nyɔ̌nu kpó gbigbɔ tɔn yětɔn lɛ́ mɛ. (Mɛ. 11:27-29) Égbé ɔ, mǐ lɔ sixú kpa susu nú Jexóva gbɔn nǔ e mǐ nɔ ná kpó jlǒ kpó lɛ́ é gblamɛ.

12. Nɛ̌ nǔníná mǐtɔn lɛ́ ka sixú kpa susu nú Jexóva gbɔn? (Kpɔ́n ɖiɖe ɔ lɔmɔ̌.)

¹² Lin tamɛ dó nǔ e xlɛ́ ɖɔ nǔníná mǐtɔn lɛ́ nɔ kpa susu nú Jexóva lɛ́ é ɖokpó kpowun jí. Ðo 2020 ɔ, adɔ ɖé tɔ́n ɖo Zimbabwe bo nɔ ayǐ nú hwenu gěgé. Mɛ lǐvi mɔ̌kpán sín gbɛ wɛ ɖo axɔ́ nu ɖó yě sɔ́ ɖó nǔ ɖě bo ná ɖu ǎ, káká jɛ nɔví nyɔ̌nu e nɔ nyí Prisca é jí. Adɔ ɔ ɖo ayǐ có, Prisca kpo ɖo wɛn ɖagbe ɔ jlá wɛ mercredi lɛ́ bǐ kpó vendredi lɛ́ bǐ kpó, é ná bo tlɛ nyí ɖo gle hwenu ɔ nɛ́. Nɔzo tɔn lɛ́ nɔ ɖɔ slamɛ wǔ tɔn ɖó sinsɛnzɔ́ ɔ mɛ e é nɔ ɖo yiyi wɛ bo ma nɔ yi wa azɔ̌ ɖo gle tɔn mɛ ǎ é wú bo nɔ ɖɔ: “Adɔ ná kú wɛ a ɖe.” Prisca nɔ ná xósin yě kpó jiɖiɖe kpó ɖɔ: “Jexóva nɔ jó mɛsɛntɔ́ tɔn lɛ́ dó gbeɖé ǎ.” É sɔ́ lín ǎ, bɔ tutoblónúnǔ mǐtɔn hɛn sɔ ɛ. Nǔníná mǐtɔn lɛ́ wɛ zɔ́n bɔ sɔhɛnmɛnú énɛ́ lɛ́ tíin. É jí wǔ nú nɔzo Prisca tɔn lɛ́ bɔ yě ɖɔ n’i ɖɔ: “Mawu wɔn we gbeɖé ǎ, énɛ́ wú ɔ, mǐ ba ná kplɔ́n nǔ dó wǔ tɔn d’é jí.” Nɔzo tɔn lɛ́ tɛ́nwe jɛ kplé agun tɔn lɛ́ domɛ yi jí.

13. Nɛ̌ walɔ mǐtɔn ka sixú kpa susu nú Jexóva gbɔn? (Ðɛhan 96:9)

 ¹³ Xa Ðɛhan 96:9. Mǐ sixú kpa susu nú Jexóva gbɔn walɔ mǐtɔn lɛ́ gblamɛ. Vɔ̌sánúxwlémawutɔ́ ɖěɖěe nɔ wa sinsɛnzɔ́ ɖo xwé Jexóva tɔn gbe lɛ́ é ɖó ná nɔ mímɛ́ jí ɖo agbaza lixo. (Tín. 40:30-32) Amɔ̌, nǔ e tlɛ lɛ́ ɖo tají hú gǎn mǐmɛ́jíninɔ ɖo agbaza lixo é wɛ nyí walɔ mímɛ́ ɖíɖó. (Ðɛh. 24:3, 4; 1 Pi. 1:15, 16) Mǐ ɖó ná dó gǎn syɛ́nsyɛ́n bo ɖe “gbɛtɔ́ xóxó ɔ” nyi ayǐ, énɛ́ wɛ nyí zǐnzán kpó walɔ kpó kwíjikwíji lɛ́, lobo sɔ́ “gbɛtɔ́ yɔ̌yɔ́ ɔ” dó, énɛ́ wɛ nyí ali e nu mǐ nɔ lin nǔ bo nɔ wa nǔ ɖe b’ɛ nɔ ɖe jijɔ ɖaaɖagbe Jexóva tɔn lɛ́ xlɛ́ é. (Koló. 3:9, 10) Kpó alɔdó Jexóva tɔn kpó ɔ, gbɛblíblízántɔ́ akowunká lɛ́ kpó alǎnnúwatɔ́ akowunká lɛ́ kpó sixú húzú jijɔ bo sɔ́ gbɛtɔ́ yɔ̌yɔ́ ɔ dó.

14. Étɛ́ nǔ e jɛ dó Jack jí é ka kplɔ́n we? (Kpɔ́n ɖiɖe ɔ lɔmɔ̌.)

¹⁴ Lin tamɛ dó nya e nɔ nyí Jack bo nyí alǎnnúwatɔ́ bo lɛ́ báɖá tawun bɔ mɛ lɛ́ nɔ ylɔ́ ɛ ɖɔ Awǒvi é sín kpɔ́ndéwú jí. É sín alǎnnú e Jack nɔ wa lɛ́ é wú bɔ è ɖó kúhwɛ n’i. É ɖo mɔ̌ có, hwenu e Jack ɖo te kpɔ́n hwenu e è ná hu i é ɔ, nɔví súnnu e nɔ ba gankpá e mɛ è sú i dó é kpɔ́n é ɖé xwlé Biblu kplɔ́nkplɔ́n ɛ bɔ é yí gbe. Jack dó nǔ baɖabaɖa gěgé sin có, é ka kpé wú bo ɖe gbɛtɔ́ xóxó e é nyí é nyi ayǐ, bɔ ɖo nukɔnmɛ ɔ, é jɛxá bo bló batɛ́mu. Jack húzú sɔmɔ̌ bɔ gbe e gbe è ɖo nǎ hu i wɛ é ɔ, gantɔ́cɔ́tɔ́ ɖé lɛ́ ya avǐ hwenu e yě ɖo éɖabɔ dó n’i wɛ é. Sɔ́ja e nɔ wa azɔ̌ ɖo gankpá ɔ mɛ lɛ́ é ɖokpó ɖɔ: “Gantɔ́ baɖabaɖa ɖé wɛ Jack nyí ɖo fí ɖ’ayǐ. Amɔ̌ din ɔ, gantɔ́ ɖagbe hú gǎn lɛ́ ɖokpó wɛ é nyí.” Ée è hu Jack é ɔ, aklúnɔzángbla e bɔ d’é wú é mɛ ɔ, nɔví súnnu e nɔ yi kpé nukún dó kplé aklúnɔzángbla tɛ́ntin tɔn wú ɖo gankpá ɔ mɛ lɛ́ é xo go gantɔ́ ɖé bɔ azɔn nukɔntɔn ɔ nɛ́ é wá kplé ɔ domɛ nɛ́. Étɛ́ ka sísɛ́ ɛ bɔ é wá kplé ɔ? Hǔzú e Jack húzú é wɛ jí wǔ n’i, bɔ é ba ná tuun nǔ e é ɖó ná wa ba sɛn Jexóva é. É ɖo wɛn ɖɔ, walɔ mǐtɔn sixú kpa susu nú Tɔ́ mǐtɔn jǐxwé tɔn ɔ!—1 Pi. 2:12.

NƐ̌ JEXÓVA KA NÁ SƆ́ NYǏKƆ TƆN SU ÐO MALÍNMÁLÍN MƐ GBƆN?

15. Nɛ̌ Jexóva ka ná sɔ́ nyǐkɔ tɔn su bǐ mlɛ́mlɛ́ ɖo malínmálín mɛ gbɔn? (Ðɛhan 96:10-13)

¹⁵ Xa Ðɛhan 96:10-13. Wěmafɔ gǔdo tɔn Ðɛhan 96​gɔ́ ɔ tɔn énɛ́ lɛ́ ylɔ́ Jexóva ɖɔ Hwɛɖɔt ɔ́ kpó Axɔ́sú kpó nǔjlɔ́jlɔ́watɔ́. Nɛ̌ Jexóva ka ná sɔ́ nyǐkɔ tɔn su ɖo malínmálín mɛ gbɔn? É ná wa mɔ̌ gbɔn blǒ e é ná bló bɔ nǔjlɔ́jlɔ́wiwa ná tíin é gblamɛ. Zaanɖé din ɔ, é ná sú kún dó nú Babilɔ́nu ɖaxó ɔ, ɖó cí ɖěɖěe é kɔn dó nyǐkɔ mímɛ́ tɔn wú é wú. (Nǔɖe. 17:5, 16; 19:1, 2) Mɛ ɖěɖěe ná mɔ bɔ è ná sú kún dó nú Babilɔ́nu ɖaxó ɔ é ɖé lɛ́ sixú wá xo kpóɖó nú mǐ ɖo mawusinsɛn mímɛ́ ɔ mɛ. Gǔdo mɛ, ɖo Aamagedɔ́ni hwenu ɔ, é ná sú kún dó nú gbɛ Satáan tɔn blěbú, bo ná sú kún dó nú mɛ ɖěɖěe klán gbe xá ɛ bo kɔn mǎsin dó nyǐkɔ tɔn wú lɛ́ é bǐ, amɔ̌, é ná hwlɛ́n mɛ ɖěɖěe yí wǎn n’i, nɔ se tónú n’i bo nɔ lɛ́ gó ɖó sísɔ́ ɛ su wú lɛ́ é bǐ. (Mak. 8:38; 2 Tɛ. 1:6-10) Ðo mɛtɛ́nkpɔ́n gǔdo tɔn e ná bɔ dó Axɔ́súɖuɖu xwe afatɔ́n tɔn Klísu tɔn wú é gúdo ɔ, Jexóva ná klɔ́ cí sín nyǐkɔ tɔn wú bǐ mlɛ́mlɛ́. (Nǔɖe. 20:7-10) Hwenɛ́nu ɔ, ‘mɛ e ná tuun susu Jexóva tɔn ɖo ayǐkúngban jí lɛ́ é ná sukpɔ́ sin e ɖo xu mɛ é ɖɔhun.’—Xab. 2:14.

16. Étɛ́ a ka kán ɖ’é jí bá wa? (Kpɔ́n ɖiɖe ɔ lɔmɔ̌.)

¹⁶ Kpɔ́n lěe é ná sɔ́ akpakpa mɛ sɔ, ɖɔ mɛ e ɖo gbɛ lɛ́ é bǐ ná sɔ́ Jexóva nyíkɔ su é! Amɔ̌, cóbónú hwe énɛ́ nu ná su ɔ, mǐ sixú wa éé nyí mǐtɔn é gbɔn susu kpikpa nú Mawu hweɖébǔnu e ali tɔn hun nú mǐ é gblamɛ. Bo ná dó d’alɔ mǐ bónú mǐ ná sɔ́ ayi ɖó azɔ̌ tají énɛ́ jí ɔ, Hǎgbɛ́ alixlɛ́mɛtɔ́ ɔ sɔ́ Ðɛhan 96:8 b’ɛ nyí xóta xwe 2025 tɔn mǐtɔn. É ɖɔ: ‘Mi sɔ́ Jexóva nyíkɔ su.”