1. Etɛwu Jehovah ma ka nɔ jlɛ́ mǐ dó mɛ ɖevo lɛ wu ǎ?

NǓ WUNMƐ wunmɛ wɛ Jehovah nɔ yí wǎn na. Enɛ jɛ wě ɖò nǔ ɖaaɖagbe e é dá lɛ é mɛ; gbɛtɔ́ lɛ lɔ ɖ’emɛ. Mǐ mɛ ɖokpo ɖokpo gbɔn vovo. Enɛ wu ɔ, Jehovah nɔ jlɛ́ we dó mɛ ɖevo lɛ wu gbeɖé ǎ. É nɔ gbéjé ayi towe kpɔ́n, enɛ wɛ nyí mɛ alɔkpa e a nyí ɖò xomɛ é. (1 Sam. 16:7) É lɛ́ tuùn ɖɔ a ɖó nǔwukpíkpé lɛ, gǎnmaɖó lɛ, bo nɔ lɛ́ flín fí e a sù ɖè é. Gɔ́ na ɔ, é nɔ byɔ nǔ e zɛ nǔwukpíkpé towe lɛ wu é we ǎ. Mǐ ɖó na nɔ wà nǔ Jehovah ɖɔhun, bo na nɔ ɖó linlin ɖokpo ɔ e é nɔ ɖó dó mǐ wu é. Mɔ̌ mɛ ɔ, mǐ na ɖó linlin e ɖò “jlɛ̌ mɛ” é, bo na nɔ mɔ mǐɖée zɛ xwé wu ǎ, mɔ̌ jɛn mǐ ma ka na nɔ mɔ ɖɔ mǐ kún vó nǔɖe ó ǎ é nɛ.—Hlɔ. 12:3.

2. Etɛwu é ka nyla ɖɔ è ni jlɛ́ mɛɖée dó mɛ ɖevo lɛ wu?

² Nǔgbo ɔ, kpɔ́ndéwú ɖagbe mɛ ɖevo lɛ tɔn sixu kplɔ́n nǔ mǐ. Ði kpɔ́ndéwú ɔ, vlafo mǐ tuùn nɔví sunnu alǒ nɔví nyɔnu ɖé bɔ sinsɛnzɔ́ ɔ bí alɔ n’i. (Ebl. 13:7) Mǐ lɔ sixu gbɔn yɛkan enɛ mɛ, bo ba ali e nu mǐ sixu bló bɔ sinsɛnzɔ́ ɔ na bí alɔ nú mǐ ɖè lɛ é. (Fili. 3:17) Amɔ̌, vogbingbɔn ɖé ɖò è ni xwedó kpɔ́ndéwú ɖagbe mɛɖé tɔn kpo è ni jlɛ́ mɛɖée dó mɛ ɔ wu kpo tɛntin. Mɔ̌ wiwa sixu zɔ́n bɔ mǐ na jɛ mɛ nú jló jí, awakanmɛ na kú mǐ, alǒ mǐ tlɛ na mɔ ɖɔ mǐ kún vó nǔɖe ó. Lee mǐ ko mɔ gbɔn ɖò xóta e wá yì é mɛ é ɔ, agbahwlɛnhwlɛn xá mɛ ɖevo e ɖò agun ɔ mɛ lɛ é na lɛ́ wà nǔ dó mǐ wu ɖò gbigbɔ lixo. Enɛ wu ɔ, Jehovah byɔ mǐ kpo wanyiyi kpo ɖɔ: “Mɛ ɖokpo ɖokpo ni byɔ éɖée mɛ, bo kpɔ́n nǔ e wà wɛ é ɖè lɛ; enyi nǔ e wà wɛ é ɖè lɛ sixu nyí xomɛhunhunnú n’i ɔ, é ni hun xomɛ ɖò éɖée mɛ; é ma jlɛ́ éɖée dó mɛ ɖě lɛ wu ó.”—Ga. 6:4.

3. Gǎn tɛ lɛ a ka ko dó ɖò gbigbɔ lixo b’ɛ nɔ dó awǎjijɛ nú we?

³ Jehovah ba ɖɔ nukɔn e yì wɛ a ɖè ɖò gbigbɔ lixo é ni dó xomɛhunhun nú we. Ði kpɔ́ndéwú ɔ, enyi a ko bló baptɛm ɔ,  xomɛ na hun we ɖɔ a nya nǔ enɛ gbé bo jɛ kɔn! Hwiɖesu wɛ wá gbeta ɔ kɔn bo wà mɔ̌. Wǎn e a ka yí nú Mawu é wɛ zɔ́n bɔ a wà mɔ̌. Dǒ nukún nǔ e wà wɛ a ɖè sín hwenɛnu lɛ é bǐ mɛ kpɔ́n. Ði kpɔ́ndéwú ɔ, wǎn e a yí nú Biblu xixa kpo nǔ kplɔnkplɔn mɛɖesunɔ tɔn kpo é ka lɛ́ gɔ́ngɔ́n d’eji à? Ðɛ e a nɔ xò dìn lɛ é ka nɔ gosin ayi mɛ hugǎn à? (Ðɛh. 141:2) A ka nɔ kpéwú dìn bo nɔ bɛ́ xóɖɔɖókpɔ́ xá mɛ lɛ ganji hugǎn à? Azɔ̌wanú e è sɔnǔ na nú sinsɛnzɔ́ ɔ lɛ é zinzán ka lɛ́ bí alɔ nú we d’eji à? Gɔ́ na ɔ, enyi a ko ɖó xwédo wɛ ɔ, Jehovah ka ko d’alɔ we bɔ a ko huzu asú ɖagbe ɖé, asì ɖagbe ɖé, alǒ mɛjitɔ́ ɖagbe ɖé à? Huzuhuzu e a bló ɖò ali enɛ lɛ nu lɛ é sixu dó awǎjijɛ nú we tawun.

4. Etɛ lɛ jí mǐ ka na ɖɔ xó dó ɖò xóta elɔ mɛ?

⁴ Mǐ sixu d’alɔ mɛ ɖevo lɛ bɔ gǎn e dó wɛ ye ɖè ɖò gbigbɔ lixo é na dó awǎjijɛ nú ye. Mǐ sixu lɛ́ d’alɔ ye bɔ ye na gbɔ yeɖée jlɛ́ dó mɛ ɖevo lɛ wu. Ðò xóta elɔ mɛ ɔ, mǐ na mɔ lee mɛjitɔ́ lɛ sixu d’alɔ vǐ yetɔn lɛ gbɔn é, lee asú kpo asì kpo lɛ sixu d’alɔ yeɖée gbɔn é, kpodo lee mɛxo agun tɔn lɛ gɔ́ nú mɛ ɖevo lɛ sixu d’alɔ nɔví sunnu lɛ kpo nɔví nyɔnu lɛ kpo gbɔn é kpo. Gudo mɛ ɔ, mǐ na ɖɔ xó dó nǔgbododó Biblu tɔn ɖěɖee sixu d’alɔ mǐ bɔ mǐ na nya nǔ e wu mǐ sixu kpé lɛ é gbé, b’ɛ na kpa mǐ é ɖé lɛ jí.

5. Sɔgbe xá Efɛzinu lɛ 6:4 ɔ, etɛ mɛjitɔ́ lɛ ka ɖó na nyi alɔ na?

⁵ Mɛjitɔ́ lɛ ɖó na nɔ cɔ́ yeɖée, bo na nɔ jlɛ́ vǐ ɖě dó ɖevo wu, alǒ, byɔ vǐ ɖě ɖɔ é ni wà nǔ zɛ nǔ e wu é kpé lɛ é wu ǎ. Enyi mɛjitɔ́ lɛ nɔ wà mɔ̌ ɔ, ye sixu dó xomɛsin nú vǐ yetɔn lɛ. (Xà Efɛzinu lɛ 6:4.) Nɔví nyɔnu ɖé nɔ nyí Sachiko *, bo ɖɔ: “Mɛ̌si ce lɛ nɔ ɖó nukún ɖɔ má w’azɔ̌ hú wemaxɔmɛvígbɛ́ ce lɛ. Enɛ kɛɖɛ ka wɛ ǎ, nɔ ce lɔ nɔ ba ɖɔ nyi ni w’azɔ̌ ganji ɖò wemaxɔmɛ, enɛ ɔ, mɛ̌si ce lɛ kpo tɔ́ ce e má nyí Kúnnuɖetɔ́ ǎ é kpo na mɔ ɖɔ wemaxɔmɛví ɖagbe lɛ wɛ nyí Kúnnuɖetɔ́ lɛ sín vǐ lɛ, bɔ enɛ na sísɛ́ ye bɔ ye na ɖɔ xó ɖagbe dó nǔgbo ɔ wu. Nǔ ɔ wɛ nyí ɖɔ, é ba ɖɔ ɖò tɛnkpɔn lɛ ɖokpo ɖokpo hwenu hǔn, nyi ni má nɔ bló nǔ ɖebǔ gbɔ ó. Amɔ̌, enɛ ka sixu nyɔ́ bló gbeɖé ǎ. Un fó wemaxɔmɛ b’ɛ ko bló xwè gegě dìn có, hweɖelɛnu ɔ, un nɔ wá kanbyɔ nyiɖée ɖɔ, nǔ ɖagbe hugǎn e na Jehovah wɛ un ɖè é ka kpé à jí.”

6. Etɛ Ðɛhan 131:1, 2 ka sixu kplɔ́n mɛjitɔ́ lɛ?

 ⁶ Ðɛhan 131:1, 2 (Xà.) kplɔ́n nǔ taji ɖé mɛjitɔ́ lɛ. Axɔ́su Davidi ɖɔ ɖɔ “nǔ e hugǎn emi” é kún nɔ jló emi ó, alǒ nǔ e hú agbɔ̌n emi lɛ é wiwa kún nɔ jló emi ó. Mɛɖéesɔ́hwe tɔn kpo jlɛ̌jininɔ tɔn kpo nɔ bló bɔ ayi tɔn nɔ “jɛ ayǐ.” Etɛ xó e Davidi ɖɔ lɛ é ka sixu kplɔ́n mɛjitɔ́ lɛ? Bonu mɛjitɔ́ lɛ na nɔ sɔ́ yeɖée hwe ɔ, ye ɖó na nɔ ɖó nukún ɖɔ emi na nɔ wà nǔ e zɛ nǔwukpíkpé emitɔn wu é ǎ, mɔ̌ jɛn ye ma ɖó na lɛ́ ɖó nukún ɖɔ vǐ yetɔn lɛ ni wà mɔ̌ ǎ é nɛ. Enyi mɛjitɔ́ lɛ ɖò alɔdó vǐ yetɔn lɛ wɛ bonu ye na nya nǔ e jɛxa lɛ é gbé ɔ, ye sixu hɛn nǔwukpíkpé kpo gǎnmaɖó kpo vǐ yetɔn lɛ tɔn lɛ ayi mɛ dó vɔ́ ganjɛwu na ye. Nɔví nyɔnu ɖé nɔ nyí Marina, bo flín ɖɔ: “Nɔ ce nɔ jlɛ́ mì dó nɔví ce atɔn lɛ, alǒ vǐ ɖevo lɛ wu gbeɖé ǎ. É kplɔ́n mì ɖɔ mɛ lɛ bǐ wɛ ɖó nǔnina vovo lɛ, bɔ mǐ mɛ ɖokpo ɖokpo ka xɔ akwɛ nú Jehovah. Mɔ̌ e é wà é zɔ́n bɔ un nɔ yawǔ jlɛ́ nyiɖée dó mɛ ɖevo lɛ wu ǎ.”

7-8. Nɛ̌ asú ɖé ka sixu nɔ wlí yɛ̌yi nú asì tɔn gbɔn?

⁷ Asú e nyí Klisanwun é ɖé ɖó na nɔ wlí yɛ̌yi nú asì tɔn. (1 Pi. 3:7) È ni wlí yɛ̌yi nú mɛ sín tinmɛ wɛ nyí è ni nɔ kéya nú mɛ ɖevo lɛ ɖò ali bǔnɔ ɖé nu, bo nɔ lɛ́ ɖó sísí nú ye. Ði kpɔ́ndéwú ɔ, asú ɖé nɔ wlí yɛ̌yi nú asì tɔn gbɔn nǔ e nɔ xlɛ́ ɖɔ é ɖó sísí n’i lɛ é wiwa gblamɛ. É nɔ byɔ ɛ ɖɔ é ni wà nǔ zɛ nǔwukpíkpé tɔn lɛ wu ǎ. Mɔ̌ jɛn é ma ka nɔ lɛ́ sɔ́ ɛ jlɛ́ dó nyɔnu ɖevo lɛ wu ǎ é nɛ. Enyi asú ɖé nɔ wà mɔ̌ ɔ, nɛ̌ nǔ ka na cí nú asì tɔn? Nɔví nyɔnu ɖé nɔ nyí Rosa, bɔ asú tɔn nyí Kúnnuɖetɔ́ ǎ, lobɔ hwɛhwɛ ɔ, é nɔ sɔ́ ɛ jlɛ́ dó nyɔnu ɖevo lɛ wu. Alǎnnú e é nɔ ɖɔ kɔn nyi ayǐ é zɔ́n bɔ Rosa mɔ ɖɔ emi kún vó nǔɖe ó, bo nɔ lɛ́ xò nǔ kpɔ́n ɖɔ mɛɖé ka yí wǎn nú emi dóo à jí. É ɖɔ, “É byɔ ɖɔ è ni nɔ flín mì hwɛhwɛ ɖɔ un xɔ akwɛ ɖò Jehovah nukúnmɛ.” Asú Klisanwun ɖé nɔ wà nǔ gbɔn mɔ̌ ǎ, yɛ̌yi wɛ é nɔ wlí nú asì tɔn. É tuùn ɖɔ nǔ e wà wɛ emi ɖè lɛ é nɔ zɔ́n bɔ kancica e ɖò emi kpo asì emitɔn kpo tɛntin é, gɔ́ nú kancica e ɖò emi kpo Jehovah kpo tɛntin é nɔ lidǒ. *

⁸ Asú e nɔ wlí yɛ̌yi nú asì tɔn é nɔ mlá ɛ, nɔ vɔ́ ganjɛwu na ɛ ɖɔ emi yí wǎn n’i, bo nɔ lɛ́ kpa ɛ. (Nǔx. 31:28) Lee asú Katerina tɔn e xó mǐ ɖɔ ɖò xóta e wá yì é mɛ é d’alɔ ɛ bɔ é mɔ ɖɔ emi xɔ akwɛ gbɔn é nɛ. Hwenu e Katerina ɖò vǔ é ɔ, nɔ tɔn nɔ ɖè è kpò, bo nɔ lɛ́ sɔ́ ɛ jlɛ́ dó nyɔnuví ɖevo lɛ wu hwɛhwɛ, xɔ́ntɔn tɔn lɛ ɖò mɛ enɛ lɛ mɛ. Wǎgbɔ tɔn ɔ, Katerina jɛ éɖée sɔ́ jlɛ́ dó mɛ ɖevo lɛ wu jí, bo na dó kpɔ́n ɖɔ emi xɔ akwɛ à jí, é na bo tlɛ nyí hwenu e é huzu Kúnnuɖetɔ́ Jehovah tɔn ɖé gudo é ɔ nɛ. Amɔ̌, asú tɔn e nyí Klisanwun ɖé é d’alɔ ɛ bonu é na ɖí xwi xá linlin enɛ, lobo ɖó linlin e ɖò jlɛ̌ jí é dó éɖée wu. É ɖɔ: “É yí wǎn nú mì, nɔ kpa mì nú nǔ ɖagbe e un nɔ wà lɛ é, bo nɔ lɛ́ xoɖɛ dó ta ce mɛ. Gɔ́ na ɔ, é nɔ flín mì jijɔ ɖaaɖagbe Jehovah tɔn lɛ, bo nɔ lɛ́ d’alɔ mì bɔ un nɔ jlá linlin masɔgbe ce lɛ ɖó.”

9-10. Nɛ̌ mɛxo agun tɔn wanyiyinɔ lɛ ka d’alɔ nɔví nyɔnu ɖé, b’ɛ ma sɔ́ nɔ jlɛ́ éɖée dó mɛ ɖevo lɛ wu ǎ gbɔn?

⁹ Nɛ̌ mɛxo agun tɔn lɛ ka sixu nɔ d’alɔ mɛ ɖěɖee nɔ jlɛ́ yeɖée dó mɛ ɖevo lɛ wu lɛ é gbɔn? Mǐ ni ɖɔ xó dó kpɔ́ndéwú nɔví nyɔnu e nɔ nyí Hanuni é tɔn jí. Hwenu e é ɖò vǔ é ɔ, è nɔ kpa ɛ gbɔn mɔ̌ ǎ. É flín ɖɔ: “Winnya nɔ hu mì, bɔ un nɔ mɔ ɖɔ vǐ ɖevo lɛ nyɔ́nǔi hú mì. Hwenu e un kpò ɖò vǔ é  ɖokpóo wɛ un ko jɛ nyiɖée jlɛ́ dó mɛ ɖevo lɛ wu jí.” Hanuni ko wá nǔgbo ɔ mɛ bo lɛ́ nyí gbexosin-alijitɔ́ ɖé gudo, cobo ka lɛ́ kpò ɖò éɖée jlɛ́ dó mɛ ɖevo lɛ wu wɛ. Wǎgbɔ tɔn ɔ, é wá mɔ ɖɔ emi kún xɔ akwɛ sɔmɔ̌ ɖò agun ɔ mɛ ó. Amɔ̌ dìn ɔ, gbexosin-alijitɔ́ e ɖó awǎjijɛ é ɖé wɛ n’i. Etɛ ka d’alɔ ɛ b’ɛ ɖyɔ linlin?

¹⁰ Hanuni ɖɔ ɖɔ mɛxo agun tɔn xomɛnyɔtɔ́ lɛ wɛ d’alɔ emi. Ye ɖɔ n’i ɖɔ é ɖó tɛn ɖé ɖò agun ɔ mɛ, bo lɛ́ kpa ɛ nú gǎn e é nɔ dó é. É wlán ɖɔ: “Azɔn gegě wɛ mɛxo agun tɔn lɛ byɔ mì ɖɔ nyi ni dó wusyɛn lanmɛ nú nɔví nyɔnu e ɖò hudo mɛ é ɖé lɛ. Azɔ̌ enɛ lɛ e ye zɔ́n mì é zɔ́n bɔ un mɔ ɖɔ è nɔ ɖó hudo ce. Un flín ɖɔ mɛxo agun tɔn wanyiyinɔ lɛ dókú nú mì nú wusyɛn e un dó lanmɛ nú nɔví nyɔnu winnyawinnya ɖé lɛ é. Enɛ gudo ɔ, ye xà 1 Tɛsalonikinu lɛ 1:2, 3 nú mì. É byɔ ayi mɛ nú mì tawun! Lɛngbɔ̌nyitɔ́ wanyiyinɔ enɛ lɛ bló bɔ un mɔ lo ɖɔ nyi lɔ ɖó tɛn ɖé ɖò agun ɔ mɛ.”

11. Nɛ̌ mǐ ka sixu d’alɔ mɛ ɖěɖee xó Ezayíi 57:15 ɖɔ bɔ “nǔ cikɔ” nú ye lɛ é gbɔn?

¹¹ Xà Ezayíi 57:15. “Mɛ e nǔ cikɔ na lɛ” é sín nǔ nɔ ɖu ayi mɛ nú Jehovah tawun. Mǐ mɛ bǐ sixu dó wusyɛn lanmɛ nú nɔví sunnu kpo nɔví nyɔnu kpo vívɛ́ enɛ lɛ, enyi mɛxo agun tɔn lɛ kɛɖɛ ǎ. Ali e nu mǐ sixu nɔ dó wusyɛn lanmɛ nú ye ɖè é ɖokpo wɛ nyí ɖɔ mǐ ni nɔ ɖexlɛ́ ye ɖɔ nǔ yetɔn nɔ ɖu ayi mɛ nú mǐ. Jehovah jló ɖɔ mǐ ni nɔ ɖexlɛ́ lɛngbɔ̌ xɔ akwɛ emitɔn lɛ ɖɔ Emi yí wǎn nú ye. (Efɛ. 5:1, 2) Gɔ́ na ɔ, enyi mǐ nɔ sɔ́ mǐɖée hwe, bo nɔ lɛ́ nɔ jlɛ̌ jí ɔ, mǐ sixu nɔ d’alɔ nɔví mǐtɔn lɛ. Mǐ nɔ jló na dɔn ayi mɛ ɖevo lɛ tɔn wá mǐɖée jí, bɔ enɛ na zɔ́n bɔ mɛ ɖevo lɛ na jɛ wǔ hwan mǐ jí ǎ. É nyɔ́ wà ɔ, mǐ nɔ zán nǔwukpíkpé mǐtɔn lɛ, kpo nukúnnúmɔjɛnǔmɛ mǐtɔn kpo dó dó wusyɛn lanmɛ nú mǐɖée.—1 Pi. 4:10, 11.

12. Etɛwu mɛɖéesɔ́hwetɔ́ lɛ ka nɔ sɛkpɔ́ Jezu? (Kpɔ́n ɖiɖe e ɖò akpa ɔ jí é.)

¹² Lee Jezu wà nǔ xá ahwanvu tɔn lɛ gbɔn é gbígbéjé kpɔ́n sixu kplɔ́n nǔ gegě mǐ dó lee mǐ na nɔ wà nǔ gbɔn xá mɛ ɖevo lɛ é wu. É wɛ nyí nya nukúnɖeji hugǎn e nɔ gbɛ̀ kpɔ́n ɖò ayikúngban jí é. É ɖò mɔ̌ có, “mɛfífá wɛ [é] nyí, bo nyí xomɛnyɔtɔ́.” (Mat. 11:28-30) É nɔ ɖexlɛ́ gbeɖé ɖɔ emi wɛ nyí nǔnywɛtɔ́, alǒ fɔ nǔ e é tuùn lɛ é tɛ́ ǎ. É nɔ zán xógbe e bɔkun, gɔ́ nú nǔjlɛdonǔwu e dɔn mɛ, bo nɔ byɔ mɛɖéesɔ́hwetɔ́ lɛ sín ayi mɛ lɛ é dó kplɔ́n nǔ mɛ. (Luk. 10:21) Jezu cí sinsɛngán goyitɔ́ lɛ ɖɔhun ǎ, hwebǐnu wɛ é nɔ bló bɔ mɛ ɖevo lɛ nɔ mɔ ɖɔ emi xɔ akwɛ nú Mawu. (Jaan 6:37) É nɔ wlí yɛ̌yi nú mɛ lɛ.

13. Nɛ̌ xomɛnyínyɔ́ kpo wanyiyi kpo e Jezu nɔ ɖexlɛ́ é ka tɔ́n ɖò lee é nɔ wà nǔ gbɔn xá ahwanvu tɔn lɛ é mɛ gbɛn?

¹³ Xomɛnyínyɔ́ kpo wanyiyi kpo Jezu tɔn tɔ́n ɖò lee é nɔ wà nǔ gbɔn xá ahwanvu tɔn lɛ é mɛ. É tuùn ɖɔ nǔwukpíkpé vovo lɛ wɛ ye ɖó, bo ka lɛ́ ɖò ninɔmɛ vovo lɛ mɛ. Enɛ wu ɔ, ye bǐ sixu wà nǔ ɖokpo ɔ lɛ ǎ, mɔ̌ jɛn sinsɛnzɔ́ yetɔn ma sixu na sínsɛ́n ɖó bǎ ɖokpo ɔ mɛ ǎ é nɛ. É ɖò mɔ̌ có, gǎn e ye mɛ ɖokpo ɖokpo nɔ dó kpo ayi bǐ kpo é nɔ sù nukún tɔn mɛ. Jezu ɖè enɛ xlɛ́ ɖò lǒ e é dó dó sikágankwɛ wu é mɛ. Ðò lǒ ɔ mɛ ɔ, gǎn ɔ kpɔ́n lee “ɖokpo ɖokpo yetɔn nɔ bí dó azɔ̌ wu” gbɔn é dó zɔ́n azɔ̌ ye. Mɛsɛntɔ́ kanɖodónǔwutɔ́ we lɛ ɖě ɖu lè hú ɖě. É ɖò mɔ̌ có, gǎn ɔ kpa ye mɛ we lɛ bǐ kpo xógbe ɖokpo ɔ lɛ kpo: “A wà nǔ ɖó ganji; mɛsɛntɔ́ ɖagbe gbejinɔtɔ́ wɛ nú we.”—Mat. 25:14-23.

14. Nɛ̌ mǐ ka sixu nɔ wà nǔ xá mɛ ɖevo lɛ Jezu ɖɔhun gbɔn?

¹⁴ Hwebǐnu wɛ Jezu nɔ ɖè xomɛnyínyɔ́ kpo wanyiyi kpo xlɛ́ mǐ. É tuùn ɖɔ nǔwukpíkpé mǐtɔn lɛ kpo ninɔmɛ mǐtɔn lɛ kpo gbɔn vovo, bɔ enyi mǐ nɔ wà nǔ e wu mǐ  kpé é bǐ ɔ, xomɛ nɔ hun i. Mǐ ɖó na nɔ wà nǔ Jezu ɖɔhun. Mǐ ɖó na lɔn gbeɖé bo na bló bɔ nǔɖitɔ́ hatɔ́ ɖé na mɔ ɖɔ emi kún hwɛ́n nǔɖe ó, alǒ winnya na hu i, ɖó é sixu wà nú gegě mɛ ɖevo lɛ ɖɔhun ǎ wutu ǎ. É nyɔ́ wà hǔn, mi nú mǐ ni nɔ kpa nɔví sunnu kpo nɔví nyɔnu kpo mǐtɔn lɛ nú gǎn e dó wɛ ye ɖè bo ɖò Jehovah sɛn wɛ é.

15-16. Nɛ̌ nɔví nyɔnu ɖé ka ɖu lè nǔ e ɖò jlɛ̌ jí lɛ é gbé nyinya tɔn gbɔn?

¹⁵ Nǔ gbigbɔ tɔn lɛ gbé nyinya nɔ zɔ́n bɔ gbɛ̀ mǐtɔn nɔ ɖó nu. Amɔ̌, nǔ taji ɔ wɛ nyí ɖɔ, nǔ e gbé mǐ ɖó na nya lɛ é ɖó na sɔgbe xá nǔwukpíkpé mǐtɔn lɛ kpo ninɔmɛ e mɛ mǐ ɖè é kpo; mǐ ɖó na nɔ kpɔ́n dó mɛ ɖevo lɛ wu ǎ. Enyi mǐ wà mɔ̌ ɔ, mǐ sixu flú, bɔ awakanmɛ na lɛ́ kú mǐ. (Luk. 14:28) Mǐ ni ɖɔ xó dó kpɔ́ndéwú nɔví nyɔnu gbexosin-alijitɔ́ e nɔ nyí Midori é tɔn wu.

¹⁶ Midori sín tɔ́ e ma nyí Kúnnuɖetɔ́ ǎ é nɔ sɔ́ ɛ jlɛ́ dó nɔví tɔn lɛ kpo azɔ̌mɛvígbɛ́ tɔn lɛ kpo wu dó ɖè è kpò. Midori ɖɔ: “Un nɔ mɔ ɖɔ un kún hwɛ́n nǔtí ó.” Amɔ̌, ee Midori sù é ɔ, é jɛ jiɖe ɖó dó éɖée wu jí. É ɖɔ, “Un nɔ xà Biblu gbè bǐ gbè, bɔ enɛ nɔ d’alɔ mì bɔ un nɔ ɖó fífá ayi mɛ tɔn, bo nɔ lɛ́ mɔ ɖɔ Jehovah yí wǎn nú mì.” Gɔ́ na ɔ, é nya nǔ e ɖò jlɛ̌ jí lɛ é gbé, bo nɔ lɛ́ xoɖɛ, taji ɔ, dó byɔ alɔdó bo na dó kpé nǔ e gbé nya wɛ é ɖè lɛ é wu. Wǎgbɔ tɔn ɔ, nukɔn e yì wɛ Midori ɖè ɖò gbigbɔ lixo é nɔ dó xomɛhunhun n’i.

17. Nɛ̌ mǐ ka sixu ‘kpò ɖò ayixa mǐtɔn kpodo linlin mǐtɔn kpo huzu wɛ’ gbɔn? Lè tɛ lɛ é ka nɔ hɛn wá?

¹⁷ É nɔ byɔ hwenu cobɔ linlin masɔgbe e mǐ nɔ ɖó dó mǐɖée wu é nɔ wá huzu. Enɛ wɛ zɔ́n bɔ Jehovah byɔ mǐ ɖɔ: ‘Mi ɖó na kpò ɖò ayixa mitɔn kpodo linlin mitɔn kpo huzu wɛ.’ (Efɛ. 4:23, 24) É ɖò wɛn ɖɔ,  bonu mǐ na kpé enɛ wu ɔ, mǐ ɖó na nɔ xoɖɛ, nɔ kplɔ́n Xó Mawu tɔn, lobo nɔ lɛ́ lin tamɛ d’eji. Jǒ hwiɖée dó nú nǔ enɛ lɛ, bo byɔ Jehovah ɖɔ é ni na we hlɔnhlɔn. Gbigbɔ mímɛ́ tɔn na d’alɔ we, bɔ a sɔ́ na nɔ sɔ́ hwiɖée jlɛ́ dó mɛ ɖevo lɛ wu ǎ. Enyi mɛnújlojló, alǒ goyiyi jɛ nǔ wà dó wǔ we jí ɔ, Jehovah na lɛ́ d’alɔ we bɔ a na ɖ’ayi wu, lobo yawǔ wà nǔɖe.

18. Nɛ̌ xò e ɖò 2 Tan 6:29, 30 mɛ é ka dó gbɔ nú we gbɔn?

¹⁸ Xà 2 Tan 6:29, 30. Jehovah nɔ mɔ nǔ jɛ ayi mǐtɔn mɛ. É lɛ́ tuùn ɖɔ mǐ ɖò xwi ɖí xá gbigbɔ gbɛ̀ ɔ tɔn kpo nǔwanyido mǐɖesunɔ tɔn lɛ kpo wɛ. Enyi Jehovah ɖò gǎn e dó wɛ mǐ ɖè bá ɖí xwi xá linlin nyanya enɛ lɛ é mɔ wɛ ɔ, wǎn e é yí nú mǐ é nɔ jɛji tawun.

19. Etɛ wu Jehovah ka sɔ́ lee nǔ nɔ cí n’i dó mǐ wu é jlɛ́ dó?

¹⁹ Jehovah zán kancica e ɖò nɔ ɖé kpo vǐ tɔn kpo tɛntin é dó ɖè lee nǔ nɔ cí n’i dó mǐ wu é xlɛ́. (Eza. 49:15) Ðǒ ayi kpɔ́ndéwú vǐnɔ e nɔ nyí Rachel é tɔn wu. É wlán ɖɔ: “Vǐ nyɔnu ce Stephanie sín azǎn sɔgbe có un jì i ǎ. Ee un mɔ ɛ tlolo é ɔ, é hwe kaka bo lɛ́ ɖó gǎn ɖé ǎ. Amɔ̌, dotóo lɛ na gbè mì ɖɔ nyi ni nɔ sɔ́ ɛ ayihɔngbe ayihɔngbe hwenu e é kpò ɖò dotóoxwé, bɔ è ɖò nukún kpé dó wǔ tɔn wɛ ɖò sun nukɔntɔn ɔ mɛ é. Táan enɛ lɛ zɔ́n bɔ nyi kpo vǐ ce kpo vɛ́ tawun. Xwè ayizɛ́n ɖó wɛ é ɖè dìn cobo ka hwe hú gbɛ̌ tɔn jí lɛ. É ɖò mɔ̌ có, un yí wǎn n’i tawun ɖó é dó gǎn tawun cobo ɖò gbɛ̀, bo lɛ́ bló bɔ un ɖó awǎjijɛ tawun ɖò gbɛzán ce mɛ!” Enyi Jehovah mɔ bɔ mǐ ɖò gǎn dó wɛ bo na sɛn ɛ kpo ayi bǐ kpo ɔ, é nɔ ɖó wanyiyi e gɔ́ngɔ́n é mɔ̌hun nú mǐ. Enɛ nɔ dó gbɔ nú mǐ tawun!

20. Etɛwu mɛsɛntɔ́ Jehovah tɔn lɛ ka sixu hun xomɛ?

²⁰ Ðó a nyí mɛsɛntɔ́ Jehovah tɔn ɖé wutu ɔ, a xɔ akwɛ tawun ɖò xwédo tɔn e mɛ gbɛtɔ́ vovo lɛ ɖè é mɛ, bɔ hwi ɖɔhun ɖě sɔ́ ɖè ǎ. A kpɔ́n te hú nɔzo towe lɛ wɛ zɔ́n bɔ Jehovah dɔn we ǎ. Amɔ̌, é kpɔ́n ayi towe mɛ, bo mɔ ɖɔ a nɔ sɔ́ hwiɖée hwe, bo ɖò gbesisɔmɛ bo na kplɔ́n nǔ dó wǔ tɔn, lobo bló huzuhuzu lɛ. (Ðɛh. 25:9) Enyi a nɔ wà nǔ e wu a kpé é bǐ dó sɛn ɛ ɔ, kánɖeji ɖɔ é nɔ sù nukún tɔn mɛ. Dɛ e dɛ wɛ a ɖè é kpo gbeji e a ɖè é kpo nyí kúnnuɖenú e xlɛ́ ɖɔ a ɖó “ayi ɖagbe” é ɖé. (Luk. 8:15) Enɛ wu ɔ, kpò ɖò nǔ ɖagbe hugǎn e wu a kpé é na Jehovah wɛ. Enɛ ɔ, a na ɖó hwɛjijɔ ɖagbe e wu a na “hun xomɛ ɖò [hwiɖée] mɛ” é.